分類: 生活

☆　無王管倒數廿二日，今天掃地好求其。
☆　新來的直屬老闆有點唔惦，樣樣野都攪好耐，希望只是適應期的緩衝，否則……
☆　本人保持一貫的工作態度，有野來盡快攪惦，你點review是你的問題。
☆　好鬼累，我要睡覺了。… 繼續內文

　　無王管倒數廿三日，繼續掃地執報紙打瞌睡。今天去了大家樂吃那個火鍋，天啊！原來象拔蚌要七點至有得食，今天提早收工去霸檯食飯卻吃不到象拔蚌，因為阿妹唔想齋坐等到七點，咁唯有食那個帶子東星班肥牛火鍋加酸梅湯加碗仔翅，大家樂的姐仔唔多識做，我就快煲乾水三催四請都唔過來加水，攪到我塊冬瓜黏底了……
　　是日全華人焦點都集中於那隻神舟五號身上，從早到晚所有新聞及特備節目全跟神舟五號或中國航天事業或楊利偉或前華裔太空人有關。不過作為中國第一名太空人（中國時興叫航天員，好似幾「專業」的稱謂），不成功便成仁，要不名揚天下，要下就做烈士。試想想，從來無人能保證火箭能順利升空否，航天員又要跟超級火藥庫（火箭）綁在一起，有甚麼事變做手動都係假，一早就變炮灰啦！幸好今次能夠順順利利升空，我都覺得有少少感動，中國人終於能夠送人上太空了。可能中國的航天員是由軍隊陪訓，而整隊航天隊又好像歸屬軍方，我總覺得楊利偉的對答很「軍方」，同埋航天員自己一個人在返回倉時都幾悶。
　　一年一度的預算案就快又開工，最近忙於執數，而又時已夜深，明早看看新聞吧！看看楊利偉明早返家情況。好累，要睡了。… 繼續內文

☆　無王管倒數廿四天，爸媽飛抵紐約。
☆　84M今早準時抵步，全車熟客安全達陣，四眼哥哥及時趕到。
☆　大老闆例會延遲一周舉行，所有Schedule又要重新整理。
☆　保險轉Plan竟抽中要驗身，很正常未死得。
☆　家鄉雞新出品葡國雞套餐既不抵食又不好食，不值推薦。
☆　終於收晒摺好衫，掃好地，推埋把風扇，掉晒D廢紙。… 繼續內文

　　無王管倒數廿五天，阿爸阿媽去旅行，家中無王管，唯我獨大，哈哈！不過衰在連家務都唯我獨大，哈哈！
　　今天如常因劉馬仔的好提議，走那冤枉的二百米路，到達明明近在咫尺的84M巴士站。講起這二百米冤枉路就把幾火，明明巴士站就在對面，卻因一個完全不方便居民及車輛設計的紅綠燈及強迫居民使用不方便紅綠燈的石墩而要走二百米的U型冤枉路。弄得我每早上班條頸也要向左後方擰，因為行緊上一百米時是看不到巴士到站否，要隨時預備勁跑二百米。又話說這架84M成十五分鐘才班，因此我們打工一族每早皆準時搭乘同一班車，雖然大家無幾句，但朝朝早見慣見熟，基本上也有點默契，好像搭校／廠車一般一同上班，唔多唔少都有點感情。不過今早，一向有遲無早，超過十五分鐘才一班的84M今天竟然準時七點半殺到。通常早五分鐘到達車站的我向後一瞄，咦！平日見慣見熟的只有四眼西裝叔到站，其他人呢？遙看二百米的起跑點，肥哥哥正在上一百米的盲點位，看不到巴士已到站，藍格裙學生妹聽著walkman也在盲點位，只得四眼哥哥及白裙學生妹看到突如奇來的巴士而開始二百米競跑。
　　說時遲那時快，四眼哥哥已到了U型轉彎位，就快進入下一百米直路。可惜，真係可惜，今日的特早車令很多人也失預算，所以不是太多人上車。當四眼哥哥到達最後五十米時，巴士已經開出了。白裙學生妹就在七十米放棄了，但四眼哥哥志氣可嘉，向著下一站直跑，又來一個二百米了！坐在巴士上面看著巴士緩緩開出，四眼哥哥急步競跑，心想，跑快點呀！走了一班車要等成十五分鐘以上的啊！又就在巴士開出的同時，看到剛走到U型轉彎位的肥哥哥目瞪口呆的看著早來的84M開出。跑呀跑，四眼哥哥就快趕到下一站了。一定要有人上車呀！幸好下一站巴士站前有另一輛巴士埋站中，阻延了我們的84M一點，終於給四眼哥哥趕到了！勁呀，果真有志者事竟成！下次各位追車一族記著要努力呀！… 繼續內文

轉載自朋友電郵笑話一則，姑且聽之：
就職於某間電訊公司電話查詢熱線的朋友公諸同好的攪笑事件：
電：代表本人　問：代表查詢資料的戌利／粉皮
電：１０８３，有乜野可以幫到你？
問：我想查甜夢Ｋ劉更次電話。
電：甜夢Ｋ係咪屯門區呀？
問：係囉…我要劉更次的電話呀！
電：劉更次係咪醫生呀？
問：唔係呀！佐野果ｄ呀…
電：佐野？　做野呀？（本人開始好唔耐煩……）
問：咪係囉！　（佢都開始好唔耐煩喇…）
電：咁係咪公司名呀？
問：唔係呀！！！！　佐野呀…
電：咁劉係咪劉德華個劉呀？
問：劉呀！！！唔係劉德華個劉呀！（本人個心開始少少聲…）
電：咁更係咪更改個更呀？
問：唔係呀……劉更次呀…你係咪鄉趕人黎架？（本人真係火都黎埋…）
電：係咪政府部門呀？（語氣好差）
問：係呀……搵野佐果ｄ呀……
電：你等等啦…
（本人開始苦思呢條粉腸要搵既係乜，５秒鐘後我終於諗到喇…）
原來佢要搵既係…………
勞工處！！！！　真係眼都反埋…… 繼續內文