TabiLand

　　對於一個新界人來說，往返香港島與家實須花上一段較長的時間，但像今日這般不正常的「長」時間來說，卻弄得我一肚怒火！
　　話說今天放學時已六時廿數分，心想這個時間紅隧必定塞車，於是撘地鐵。在港島轉荃灣線是非常正常。因為想找位子坐的關係，選了在油麻地下車，問題便來了。由油麻地到太子站竟花了我足足超過十五分鐘有多！原因就是新型地鐵列車！當時我看到月台一輛滿載了人的列車，便想不如等下一班吧，怎知這一班就耐了，差不多成十分鐘先埋站，而滿載人的列車也足足等了十分鐘才能開出。但樓上荃灣線完全正常服務，於是便開始越儲越多等調景嶺線的市民。在十多分鐘後，這輛新型列車終於可以開得出，但因兩條線的不配合，旺角及太子站也積滿乘客，太子站的人幾乎上不到車，除了人多外架新列車又龜速行駛，開門關門至起動時間花了很久，結果由油麻地至鑽石山站花了差不多廿五分鐘……
　　撘地鐵也這麼慢……接著等巴士回家更慢……因送車尾而又花了差不多十分鐘的等車時間，臨門埋站前又撞著兩位超龜速學神在一個很慢的燈位前徘徊，我那刻真想粗口大罵……平時如果選撘地鐵的話，最快小於一時內便回到家，多則也只是一小時多幾分鐘，但今天……足足花了一小時又四十分鐘！比撘塞車的巴士還要慢！這個時間夠我撘直通車返到廣州、撘飛機飛去台灣、又或撘車入屯門！大佬，沙田話晒都拍住市區，但因為交通錯配（巴士狂兜路）令我以超長時間回家，今日真係怒火街頭！… 繼續內文

　　最近灣仔區除了地鐵站附近多了檔無人理會的法輪大法反廿三條攤位外，也多了很多現代丐幫人馬，而且這班人馬手法極度……有問題，以下是小女子近日所遇到的其中兩位：
　　嫌疑丐幫一號：在太原街一帶埋伏，專向善心及好「蝦」人士埋手，看準目標後失驚無神彈出來，口口聲聲話成日無食過野問人拿錢開飯，完全搏同情。雖然香港地現在失業率高企，但未至於當街當巷問人拿錢才能開飯吧……初時一心想話俾五蚊打發她走，點知呢位丐幫一號竟然不知足，要拿廿蚊！大佬，麥記二三四套餐五蚊都可買漢堡飽加雪糕了！我一餐午飯仔都平過廿蚊雞啦！食乜呀你，行丐仲咁多要求，激起我把火話唔俾，呢位一號竟然死扯著我件衫唔放手。有冇攪錯，咁咪即係光天化日之下強搶？最後俾了五蚊雞後強行走人……一號仲多謝都無句……
　　嫌疑丐幫二號：在皇后大道東合和地段一帶徘徊，也是向善心人士埋手，尤好後生女仔，因為多數屬好人。也是看準目標無端出擊，初時以為佢唔識路，點知一開口劈頭第一句就係要錢，話山長水遠從元朗、屯門等地到香港鬧市搵女，點知個女上了大陸，現在無錢番屋企又唔識路，要求拿（注意，完全無個「借」字，傳統上問人拿錢都會話「借」，雖然實無回頭）廿幾蚊番屋企。雖然香港至元朗就車費真係幾貴，但個阿婆二號有乜理由自己一條友咁傻又無端端出來找女，而且長者有半價喎，做乜又廿幾蚊咁貴？經歷過一號事件後知道又係那班騙錢怪，一於唔理急步走人，換來是出現了一個在背後不停咒罵的阿婆免費替你下咒……
　　難道我個樣好「蝦」？短期內已遇到這類人兩次了。奉勸各位來灣仔要小心這類人士，尤其是你個樣和善又好「蝦」的……… 繼續內文

　　俗語謂：「一日為師，終生為父」。雖然這種說法於今時今日的社會上好像有點過時，亦誇張了少許，不過我心目中仍覺得既然為師，尊敬之心仍應常存的。
　　今天在一個偶然的機會下，重遇中學時期的老師。說實在，彼此應該有起碼五年的時間未見過面，只靠平時每年一度的聖誕咭維持聯繫，但在彼此擦身而過之際，我們都一眼便認出對方。這位老師便是我初接觸會計的啟蒙老師，也是由於他我選擇了會計作我決定行的道路。老師看來還過得不錯，與我一樣在書店裏也專找會計的參考書呢！
　　彼此閒談之下才發覺，老師記得我是因為我的聖誕咭啊！沒幾個學生還會寄聖誕咭給老師，所以老師說很多謝我的咭呢。老師說這句話時頓然令我有點不知所措……其實我因為懶，卻又想聯繫一點點情誼才每年例行公事般寄聖誕咭，但估不到這張咭在老師的心目中卻還很有地位，或許這才是老師想要的吧……自己又教出一名社會的棟樑了……… 繼續內文

　　今日由朝激氣到放工，激死我呀！
事件一：朝早番工等小巴，明明排好晒隊，點知架小巴來到，差不多全滿，得番一個位，一位女士在眾目睽睽之下打尖插隊一個戰步衝了上車！我們成班排緊隊當然個個嘩嘩聲！特別是排第一的我啦！本來應該我上的嘛！有冇攪錯，成條排緊隊的人個個「罵罵聲」，那位女士還是若無其事上車！咁都得！咁cheap的人都係第一次見，群眾壓力下仍舊不守規則，天啊！
事件二：今天的工作是聯絡人，但衰在我不是用家之一，對用家的要求不太清楚，偏偏卻要由我問東問西，結果我都唔知點攪，問來問去都無野睇啦……既滿足不到老闆要求，又滿足不到用家要求，仲要受問的那間公司的氣，再加上用家無緣無故壓下來的氣……真係氣頂……谷到想喊，但又要忍住，點可以衰俾呢班人睇的……忍呀！但放工上了巴士還是忍不住喊了……… 繼續內文

　　不要說我唱衰香港飲食業，但昨天跟今天所遇到的兩間食店的服務，真的是絕對需要改善！
　　先說昨天的午餐。前日跟友人吃完日本料理，覺得價錢及美味程度可以接受，便帶了我家妹子去幫襯，等其整牙前吃一下較高級料理，因為我家一向都不會吃這些，出街食飯頂多去快餐店，阿妹整牙後肯定有一陣子沒胃口吃東西，現在多帶她吃東吃西作補償。這間要被我點名批評的食店位在沙田新城市廣場地下名咖啡店對面叫雪Ｘ乜乜的日本食店，說裝修及其他屬一般水平。
　　事緣在等點了茶等待期間，侍應生剛要為鄰檯上茶，但她又不出聲叫我借借，致令其不夠位過，她又捧不穩東西，結果一碗麵豉湯淋了在我身上！之後成店的侍應個個好似傻了般企係度望住我，望乜？仲唔幫手？只得那個姐姐仔立刻拿了紙巾及毛巾起勢幫我抹，個貌似經理都有幫下手o既……不過她們抹完一輪後完全當無事發生過般行開了。唔係呀嘛大佬！雖然你碗麵豉湯唔夠熱，無燙傷我（其實隻手都紅左一陣，因為碗湯始終係熱湯），駛唔駛當無事發生過？第一攪成個客咁理應收錢俾番個折呀？唔俾折頭都算，咁俾杯free drink都不算太過份，作道歉補償嘛，你攪到個客咁喎！都唔俾都算了，幫我換個個位都得啦！都唔識做，真係完全當無事發生！真係激氣呀！上次同班friend去唱K，朋友俾玻璃碎（上手留下，掃唔乾淨）割傷小小，人地個經理立即送果盤及俾折頭，咁先係做生意的態度，客人先會順嘛……呢間舖唔駛旨意我會再幫襯！
　　點名批評食店之二位於灣仔合和中心低層，今天去飲茶下單叫食物竟等了差不多廿多分鐘才上點心，而那些點心只不過是出面擺檔隨時叫的款式，即係在出面拿入來便可以，等了這麼久！明知午市個個趕住食完做野嘛！更離譜是叫了一碟炒麵等了差不多一小時也不來，期間起碼叫人追了四、五次，每次個侍應好似無反應，叫佢追之後好似無回事，最後在甜品都食完叫佢取消之際竟然捧碟炒麵出來！趕住走點食呀！仲要態度非常之差喎！
　　真係學華仔話齋：今時今日，咁o既服務態度點得o架？我都唔係好過份o者？我只係要求些合理的待遇之嘛！… 繼續內文