自從做左業主之後,煩惱陸續而來,原來有樓人士都幾煩。首先,揀完樓就要去搵按揭,銀行甲跟銀行乙甚至銀行丙的計價專員計出來咪又係差不多,只係呢個P-2.X%隔離果個P-2.XX%又或呢個現金回贈果個送律師費那個送電器之類,越多選擇越眼花繚亂,終於用EXCEL計完選了個P減最多的銀行,卻又要審查一下在下的上會資格。上到會搞完按揭,又到約律師簽約,當然少不了那因估價超高而要付的印花稅還有律師費。
花費完一筆後,終於可以收樓拿鎖匙。收到樓就輪到裝修環節,雖則不打算豪裝,但也要搞搞地板搞搞牆紙搞搞電掣搞搞大門搞搞燈燈,還要聯絡中電水記仲有管理署,擺低錢錢按金,有電有水師父才可以開工裝修,不過,一睇之下,電電公司竟然寫錯在下大名!搞錯!照住身份證抄都打錯字!裝修玩左兩個星期,輪到去選購牆紙,想當年我家的牆紙只是從承辦商那幾本指定貨色選擇,現在要自己去旺角那一條牆紙街左看右看,越多選擇越眼花繚亂越心思思拿不定主意,結果要揀日重賽,今天再去選購,終於揀了,是先選某間牆紙舖再選了某一、兩個系列去選,收窄少少範圍才能入手。得閒還要去監場偷看一下師父的進度。
下一步是甚麼?燈?大門鎖?窗簾?傢俬?總之有排煩。題外話,近一、兩日,香港的天氣很奇怪,經歷了春夏秋冬階段,先有春天的濃霧,船都撞了幾隻,潮濕到不得了,接著有高達廿九度的氣溫,因潮濕又熱竟在冬天開了冷氣,今天冷峰到下午開始涼涼地有入秋的感覺,到夜晚返風了又回到冬天,這般的天氣很易病,真的要小心身體才成。
做業主喎, 你估咁易, 之後仲有D差餉地租燈油火臘管理費,
一闊三大, 將來日子耐左, 仲有自己間屋同屋苑維修D錢錢要比,
要儲錢真係比之前難好多架喇!