女王的教室

女王之教室  無記播的女王的教室不經不覺進入尾聲,片中的極權老師阿久津真矢真是好鬼型,著得型,所作所為更加是型到爆。主角神田和美不知怎的越看越覺得這個角色很討厭,妹子說太完美的角色會令人生厭,可能吧。反而進藤光更加吸引人,馬場同學都好似無神田和美咁討厭。魔鬼教師真矢的教法雖然嚴峻,但也不無道理。出來社會做事,並不是所有事情都有道理有解釋,也並不是所有事情都會順著道理得出結果,這個社會終究還是屬於人治社會,人與人的交往、人與人的關係,都在在影響每件事情的進展。
  真矢對待學生的確是嚴峻,但卻也不是毫無道理。為甚麼小息時不上廁所?為甚麼揀飲擇食?遲到還要大條道理?明明自己做錯卻又要一眾人去忍受甚至幫你執手尾?法家思想的出現當然有其原因,真矢只是將這些法門集中在校園推出罷了。總體而言,真矢這個角色真是非常吸引,由頭COOL到尾(連件衫都由頭箍到實),對下周的結局有點期待。至於特別篇已經看過,對真矢魔鬼教師的形成作了一個補充,好睇。看罷上集,對真矢這個答案很有感觸。
進藤光:點解我地要讀書求學問?我地努力讀書,入到好既大學,跟住入埋好既公司,到底有D咩意義呢?點解我地要努力不懈咁讀書?
真矢:唔應該問係咪一定要讀書求學問,應該問自己想唔想咁做。係今後人生既道路,你地會遇到好多完全唔認識唔能夠理解既野,有一D非常美好,有D充滿樂趣,總之你地會接觸到好多好不可思議既事。係咁既情況下,人係應該滿心歡喜咁去探求原因,渴望知道眼前新鮮事物的由來。如果一個人無左好奇心,佢就唔可以再稱為常人,連馬騮都不如。如果一個人連認識多一D世界事物既意欲都無,試問佢仲會有D咩作為?無論你既學識幾豐富,只要你一息尚存,世界上仲有好多你唔認識既野,雖然好多人擺出一副乜野都知乜野都識既樣,其實佢地只係虛有其表。無論你讀乜野大學、係乜野公司做野、係乜野年紀,只要你仲有求學既心,亦一樣可以有所作為。但係如果你已經無左好奇心,咁同行屍走肉根本無分別。讀書既目的唔係為左攞到好既成績,係為左將來做一個頂天立地既人。

  1. 小空

    差點唔記得左提,某程度上,阿久津令我諗起我和殭屍中的馬小玲,又係一個魔鬼Miss,但係係一個好Miss。

  2. Ah Sa

    今集阿久津老師同進藤光既對話, 確實今人叫好! 而家香港d死靚仔咁難教, 如果有阿久津呢類型既老師出現, 香港未來就有希望了! 咪以為果d淨係識叫: yo! 會考冇難道d扮野怪至係識教書!

發佈留言

發佈留言必須填寫的電子郵件地址不會公開。 必填欄位標示為 *

*