去年的七．一，萬民怒氣沖沖，反對廿三條；今年的七．一，驕陽似火，人們繼續默默地起革命。不過對於像我這種懶鬼來說，甚麼反對、遊行都與我無緣，主要原因，因為懶……不過，這不代表我不關心國家大事，不代表我會默默承受社會既定的一套。一向我都保持著思想的自由，我想做甚麼想甚麼說甚麼也是我的自由（當然我不會犯法），奉行劍心中齋藤一的格言「惡．即．斬」的處事方針，奉行我自己的「正義」。
好，正經事講完，又係時候講番堆廢話匯報一下近況：
Qoo網裏種的啤梨強越來越大粒，唔知大粒左咁多會有乜後果？當太大粒的時候係咪可以摘下來的呢？仲有呢個遊戲還要玩幾耐的？種到啤梨強變成士多啤梨乾才完結？
近期大熱阿妹勁玩的Pinky Street，明明在迷失東京時見到有很多，早知唔好咁吝嗇買多幾個。阿妹幫我砌左個小琳子，佢話個款有D似我喎……
之前路過西田看見做緊八折，所以入了套菠蘿油王子公仔，每次見到情迷海龜Pizza就想起佢請菠蘿油王子食了塊蟹柳，好可愛呀！咁多隻之中以麥嘜的蛋撻王子最漂亮，其他也都很可愛，McQueen同McBing都算係咁啦。
今天終於去了游水，回想起來都成三年未落過水，之前幾年因為搬屋、考試、家事等等原因未能下水，今年終於可以著番件泳衣落水。雖說著起套戰衣似模似樣，不過本小姐係唔識游水架！踩水還可以（阿爹教叫做唔沉得的自救保命招），淺水游幾步都仲得，換氣游得遠就，呵呵呵唔好提！馬鞍山個泳池叫做幾近同設施不錯，比起以前去開的九龍公園好，除左全程室外暴曬之外。很多阿叔阿伯霸住嬉水池的噴射裝置在享用免費水力按摩，實在好唔明點解個阿伯可以坐係個瀑布下面成半個鐘頭，咁大的衝擊力，衝咁耐佢唔痛咩？