終於睇晒今期金像獎提名的最佳影片，我覺得睇晒咁多套之後，反而最喜歡忘不了同PTU，貪他們夠簡單直接，好像無間道Ⅲ，睇到人頭暈暈，最終又係一句，「臥底係會繼續來」！真是有點吃不消。
在阿爸催促之下，拿拿聲完成無間道Ⅲ，今次的劇情比前傳同正傳複雜很多，也不是很有故事性，睇完感覺是有一種特別營造時空交叉兼穿梭同幻想與真實及敵我之間又再交叉並排的推進，聽我形容也覺得很複雜吧？我的感覺就是……「懶」高深！其實個故事很簡單，劉華在幫梁朝偉埋單後瘋了，黎明無聊地任劉華幫佢埋單，為了要湊足人數（上集已有這麼多，結局篇應該要有番咁上下人數做臥底），於是連大陸都要有臥底陳道明加入戰團，一於來個中港臥底交流團！這集中很喜歡梁朝偉的表演，最搶戲同最正常，其餘一干人等真是行行企企，劉華扮一個發了瘋的警察也尚算稱職，但完全感受不到他的無間，只知道他發了瘋，因為最無間的今次要算觀眾，套用前傳最後一句話：「無間有三」，這集齋睇劉華、黎明及陳道明已令大家暈舵舵，果然無間有三……
有乜理由個差館咁大架？簡直不懂善用資源！成個保安科（阿爸話即前政治部）得一部水機？既然黃sir同梁朝偉都知黎明係自己人，有乜理由韓琛那單野在正傳攪成咁？曾志偉應該是成套無間道中最勁的一個，要咁多個臥底去伏佢一個，佢派一個就攪惦晒眾人（雖然佢最終都係俾自己隻臥底玩死），劉華如果不是要「做一個好人」應該會係電影史上最強之臥底，發瘋後也是最強之一員，做情報收集及竊聽都可以一人包辦。另，如果係睇大陸版的朋友，今次這一集應該怎樣駁下去？正傳中劉華明明俾吳延燁拉了喎！最後，真是希望這集是最後的了，不要再拍些這麼多臥底的戲，終極無聊……