繼續上星期的金像獎提名巡禮睇碟，繼睇完PTU、金雞2同忘不了後，今天終於看了無間道Ⅱ，故事上其實套野有小小複雜，而又太多臥底，睇到我阿爸話不如大家一早交換班人咪得囉，無謂你派一個來，我又派一個去，接著原來成班都係臥底，真係攪笑非常！
今集故事係無間道的前傳，所以在第一集無出過場的人物都預左他們在這集要死，而也由於實在有太多的臥底，重心放晒在個故事發展，少了內心戲的發揮，觀眾睇到完場時只是吸收了個故事，無乜情感的交流。例如陸啟昌（胡軍）做了黃志誠（黃秋生）的替死鬼時，黃哭得呼天搶地，但由於之前太小情感交流，身為觀眾的我一點感覺也沒有，齋想講好鬼悶，得啦得啦，知佢死左啦，快點下段啦！不過胡軍的出場係幾鬼型，今集基本上係睇佢同吳鎮宇的。
鎮宇的倪永孝很有型，攻於心計卻算漏曾志偉的韓琛，也於此看出一個不簡單的韓琛。講番鎮宇，成套戲最身處無間的可謂佢同黃志誠，扮華仔同偉仔年青版的陳冠A同余文樂在這套戲的角色雖然吃重，卻無甚發揮的機會，完全被鎮宇、胡軍、志偉等搶晒戲，反而大配角智叔仲搶鏡過他們，智叔真係好鬼惦，冷面得來都幾型。
唯一獨挑大旗的女角嘉玲姐的Mary，角色也很吃重，因為整個事件的始末都關於佢，為了幫心愛的男人上位而牽起江湖腥風血雨，也牽引著陳冠A、秋生同志偉三個，這套戲她可謂功不可沒，也一人獨撐起整套男人戲裏女性的地位。另一位戲內令人留意的女角是惠英紅，扮永孝的家姐，渾身都覺得是一個身在江湖中的女人，拍得住Mary的魅力，果然，戲內每一個黑社會大佬背後必要有一個女人……
最後要講的是，套戲裏面太多臥底了，看完有點搵笨感覺，今次影評完畢。