TabiLand

　　今日一連收到兩個突然而來又可能影響到前途的消息，心情既驚且喜。喜的是發現原來市道好轉，大量機會現在開始湧現出來；驚的是離開現在工作崗位，出外又得重頭上路，但留在這裏，前景也不太明朗，前途也不甚看好。真的是既離不開，也留不下。
　　曾經跟朋友討論過大家的前途問題，朋友一句「咁你到底想有甚麼發展？」我完全答不上咀。說真的，以前畢業時初踏入社會，說的當然是冠冕堂皇的偉大志向，但問到底問心那句，真的是沒甚目標。以前尚可說一句甚麼也不打緊，考好會計師試才再作打算吧去逃避去想。現在試已考好，但又怎樣？人生的大方向仍然是沒有，每日上班下班過著得過且過的生活，兩餐溫飽還有些微積蓄過著平常的生活，沒挑戰也沒挫折，沒成就也沒過錯。每日迷迷茫茫，穿梭於鬧市、同事、朋友及家人之間，完完全全也不知自己立足在何方？撫心自問一句，其實我到底想要甚麼？人生的目標是甚麼？事業上想有甚麼的成就？我真的答不出來。於是，我反問我朋友一句，「咁你又想要去到甚麼位置？」朋友竟也跟我一般答不出口……
　　我們這一輩，成長的年代算是富裕充足的時期，剛剛渡過了大陸十年浩劫文化大革命的年代，正值經濟開始起飛的繁盛時期，不強求甚麼物質享受的話，普通的電視撈飯、紅白機加碟機幾蚊隻GAME玩到你唔玩的年代，閒時落樓下屋村女的打羽毛球排球、男的踢波打籃球玩下「何濟公」，儲下萬變咭跟人幾蚊張交換的所謂抄賣已經好開心，每日都無憂無慮，父母口中就通常都係那句：「讀好書呀你，如果唔係第日要去擔泥辛苦死你呀！」係考試前會拿起枝藤條訓導一下你好讀書啦，所以由細到大成班朋友都係向著單一目標進發：讀好書！咁到底甚麼叫做讀好書？年年考第一就一定係好？又正值港英時代的後期，甚麼玫瑰園計劃這班細路從未仔細去想，殖民地時期也沒有教你愛國不愛國，只知道當時唔移民阿爸阿媽已經話我地好愛國。炒樓發達的年代，見到別人日日魚翅當粉絲咁食的暴發樣，社會貫輸的也成為眾人目標的也很自然是那一句：要發達！咁到底如何發達？也沒有仔細去想及去實踐，仍然是之前的幼承庭訓讀好書第日會發達。好啦到這班細路真係讀好書讀到大學的時候，金融風暴掃至，於是一班有幸繼續讀書的就狂用讀書來逃過成為成千上萬的失業大軍，番緊工的就個個話去資源增值繼續讀，做左樓蟹甚至負資產的父母一輩，只要保住份工去還債已經萬二分慶幸，對住我們這一班仍然係果句讀好書搵份好工第日唔駛憂。好啦這班細路終於長大真係讀好書搵到份工啦，達還未發，卻也個個都去到這裏已經止步了……
　　以上的成長過程，大家有沒有發覺從來無一個真係訓練呢班細路去認真思考自己前路的課堂，細路們的夢正是細路們父母的夢，他們生活的年代並不一定令他們能有機會「讀好書」，現在細路們真如他們的父母所想讀好書了，但那只是完成父母們未能真正完成的夢，細路們除了這個讀好書的夢想外，還有甚麼其他呢？以前問父母們你們對子女的期望，好可能是成為社會棟樑；現在問父母們同一個問題，看電視訪問竟也降格到「唔好危害社會」、「唔好拿綜援」、「唔好要社會養」就已經是了，莫提對社會作出貢獻呢！由這班無自己夢想的青年去支撐的社會，除了迷茫、無助外，還會有其他嗎？身為這班無夢的青年人的一員，我到現在問心那句依舊不知道自己到底想如何……… 繼續內文

　　本周非常努力，無論身心都嚴重付出，好攰呢！工作上，經常出現的對白就是「擺低先」，但心諗果句就係「又係我？」老闆都係果句「對你有拖無欠」，於是待辦事件就一件接一件，好野啦今次。這樣下去，等我係關鍵時間整個Sick Leave你嘆下呀老闆！講係咁講，可能咁練法，宜家夜睡早起都仲撐得住，番工鬼打都無咁精神，不過一搭車車就可以以九秒九速度迅速KO。
　　本周K書努力成果：(1)《看電影》241期：進入後半部了！(2)《西雅圖妙記》：五分之四，尚在努力中！(3)《中國秘史》：差小小進入清朝了！(4)《欣宜減肥日記》：Day19進行中；(5)《偵探學園Q》：15期進行中，今期小Q身世大揭秘！(6)CISA：本野終於開左波了，睇完開波講Control果度了；(7)VBA：就快睇完Chapter 3；(8)Accounting：係時候update一下堆HKAS，努力朝著最弱一環的Associates開始。
　　本日回帶成果：(1)殭屍三製作特輯，但唔係太吸引；(2)高橋留美子劇場，普通，人魚好睇些；(3)Third Watch，快速睇埋最後果十五分鐘；(4)Smallville 04×04，單撈左咁耐，早知唔單撈好過；(5)亞姐，收看中……
　　加埋今日去跑跑一千米，今日都算努力過，明天又得打起精神再作戰，努力向前衝！… 繼續內文

　　有睇開我日記又或識我的朋友，都知我經常幫襯屋企附近的太興餐廳，呢間餐廳都可算是伴著我在新居的日子。記得當初搬去愉翠苑時，附近可說是一片荒蕪，甚麼商舖也沒有，連最基本買份報紙或者買罐汽水都要步行十分鐘起碼至第一城才能解決，而呢個時候，太興就已經存在了，可說是伴著愉翠苑的成長。太興雖然是一間平平無奇的餐廳，可其出品無論是西餐、中菜、大大份鐵板都非常有水準，非常美味而價錢也適中（要食豪些咪貴些囉！），款式又多，伙記勤快有禮，雖然成間餐廳得兩個伙記，但接待客人比商場間五、六名伙記的同級茶餐廳還來得快及有禮貌，真是一間非常高質素的餐廳。可是，今晚是太興的最後一夜了……
　　自從太興隔離的同名太興酒家在某年回歸後失驚無神摺了以後，太興餐廳會摺的消息不絕於耳，直至大約一周前老闆終於承認因為業主不肯續租，所以無奈結業。業主不肯續租的原因，聽聞是想將太興、隔壁空置了的原太興酒家及樓上一個一直空置的舖位合埋租給中聯辦。抗議呀！又不是中旅社，開一間中聯辦又唔食得，開來把鬼！快D叫長毛去抗議示威呀！今晚是太興的最後一夜，多名熟客都前來光顧，包括我們一家在內。晚餐仍然維持水準，客人們都依依不捨地拍照留念。一想到過往太興陪伴我們的日子，就越是不捨，尤其是去年阿爹阿娘去旅行時，我跟妹子在太興渡過多少晚的晚飯，現在太興要結業，真是對其難捨難離……
　　老闆及老闆娘，記得擇地重開時要叫我們去賀你們開業啊！… 繼續內文

　　今日終於回晒上周錄落的帶，睇完人魚之森、Amazing Race、Third Watch、探偵學園之迷幻密碼等，也看完了Angel Heart 12及借回來的小Q 12了，真係睇左好多野。人魚之森終於大結局，不過點解無人魚之傷那個故事？Amazing Race終於Out左Charla果組，雖然佢地有時睇落有點野蠻，但臨尾Out佢地時又有點難過。Third Watch Bosco同Sergeant Cruz都好型，真係正！不過今日要講講的，是兩個混吉的東西，浪費了我的時間。
　　第一個混吉是Yahoo!單撈的新Game，見果幅圖同個Game名幾吸引咪單撈一小時試玩，A Series of Unfortunate Events根本同之前玩開果個Inspector Parker無分別，係唔玩凶案玩Unfortunate Events之嘛，完全只係一個換過包裝的遊戲，內容毫無分別，混吉指數達五個吉（五個滿分）。之前很喜歡玩Inspector Parker，因為比較喜歡玩這類型的推理遊戲，所以當玩呢個遊戲時，對其的熟口熟面完全感覺搵笨。第一次玩Swap Mode都仲好些，之後的消去Mode同Inspector Parker簡直絲毫無分別。限時一小時，有廿分鐘還去了吃東西，總之就係一個絕對搵笨及混吉的遊戲。

　　第二個混吉是國際台播的Snow Queen，之前睇安徒生果個時都講過下呢個Snow Queen的故事，怎知今次Hallmark改篇得實在不知所謂，除左男女主角尚算靚仔靚女外，其餘都好唔惦。上集都仲有阿導演胡大為出來客串一下賣餅，個女主角千辛萬苦去搵個男主角，將春夏秋遭遇改到不知所謂，失卻原著也都還衰過上次安徒生改篇的講述，好心佢出原著好過！隻北極Bear Bear最後竟然學美女與野獸般變左做個阿伯王子，仲要同美女與野獸般變左做王子後仲衰過動物時的模樣。最重要的講魔鏡的一分鐘我又竟因之前悶得滯轉戰同人ICQ而Miss左！講到個冰雪女王係威係勢，中左個心口針的愛不消五秒就玩完，真係豆腐渣工程囉！真係又係一套混吉指數達四個吉的電視電影……… 繼續內文

　　放棄了一段時間的民間藝術摺紙，最近又突然重現我腦海之中，於是乎幾近放棄的花海計劃又再重新係灶底掘番出來。近來工作本來已經很忙，大鵰及一眾禽獸們一係閉關自修，一係失驚無神醒醒你，跟著好像催命符咁催促得要命，真係估佢唔到，攪到人頭昏腦漲，有時，真係好想問下老闆，「你知唔知你自己做咁乜架？」
　　好，說回這個花海計劃，其實是指我想摺一盒的玫瑰花，但摺到半盒時就因為種種原因停了下來，於是乎到了今日我的花海計劃仍然停留在那半盒花花之中。我摺的玫瑰花其實摺出來效果不錯，也很穩妥，不易散開，但摺一朵就花費不少時間，而且因為選擇的紙比較細張，摺的時候特別要小心。還記得這隻玫瑰花摺法是中學時朋友教的，那時朋友的姐姐就快行畢業禮，朋友想省回錢錢於是不停咁摺摺摺去弄一紥花花，她真的很有心思及耐性。
　　今日摺完玫瑰花番寫字樓，同事見到我對摺紙這麼有興趣，於是又傳授了另一種花花摺法給我，今回是摺鬱金香，包括花花、花莖及花盆也有，真是完全摺了一盆花花出來，但我覺得花花及花莖還可接受，那個花盆就麻麻地了。其實諗諗下，除左花海計劃半途荒廢左外，仲有飲管星星接左幾粒之後又停滯左，個原本打算裝星星的玻璃樽仔又就咁放左係度，真係失禮……
　　不過，諗諗下又係時候睇下探偵學園之迷幻密碼了，咁多節目，睇怕呢堆手工藝都係繼續係度混吉……… 繼續內文