周日閒暇，終於看了劉華的新戲之一【童夢奇緣】，又一個講述小朋友一夜之間成長的故事，也是一個童心跟成人世界相互交流的戲。類似故事背景的戲，很不期然令人想起Tom Hanks的【BIG】，還有勉強也算同類的【Jack】。【BIG】中的Tom Hanks一夜成長為一個大人，純潔的童心感動了很多人，也喚起了一班成年人的童心，可社會是現實的，成年人的世界始終是殘酷的，認清成人世界的你虞我詐，Tom Hanks還是回去當一個小孩，小朋友始終要經歷一次成長才成。【童夢奇緣】中的光仔卻沒辦法回頭了，雖然他也像Tom Hanks般發現長大以後，並不像想像中的快樂，但他比Robin Williams的Jack更不幸，早衰得比他還快，就算後悔地說下次不敢，也沒有下次的機會了。
光仔的童年並不快樂，跟父親重重誤解，以為長大後離家一切便會得到解決，可發覺長大後問題根本就沒解決過，反而種種的經歷令他理解到背後的種種瓜葛，理解令他能解開心結，跟家人重修舊好，只不過這短短的兩三日理解時間，付出的代價卻是龐大的。馮小剛飾的流浪大叔說過：「生命是一個過程，可悲的是它不可以重來，可喜的它不須要重來。」所以人生根本就沒有「下次不敢」的機會，但小朋友每次給父母責罵都總是喊下次不敢，這是小朋友的特權，因為他們還有父母去接納和包容他們的下次。
整套戲最好看的我反而覺得是機舖那一段，華仔看見林家棟跟黃日華在機舖的另一面，小朋友說大人唔明佢地，但小朋友又有嘗試過明白大人嗎？家棟說那班中學生這樣，小朋友的話一早衝過去打人了，大人呢？怎麼可以？只得無奈地坐在這裏一笑而過。還有黃日華對住老年的光仔大喊「我疼你係因為我真係好疼惜你！」那段遲來的一家釋懷，讓人感嘆不已，珍惜眼前人。
題外話，劇情方面確是不錯，劉華的化妝也很妙，但那堆背景特技有點突兀，好像為弄特效而弄的，對故事及劇情推展幫助不大。真的能帶動觀眾情緒及劉華跟黃日華的父子情描述略嫌不足，但整體來說也是一套相當不錯的戲，有親情也有大人與小孩之間的描繪，確值一看。… 繼續內文
萬惡女王
登登登登！出自妹子手筆的「萬惡女王」登場！亦即是我。
西北石湖的厲害
周日閒置在家，剛剛才回帶睇完活得很滋味同Monster，熄機準備K書又或午睡之際，被爹爹叫了去大家齊齊研究EXCEL Macro創製更表之法。抬頭一望窗外，雖有陽光，卻煙霧迷漫，一看便知空氣污染指數奇高，天氣很差。又回想起午間新聞說颱風龍王爬左過台灣，一定是甚麼焚風影響，今天又熱又焗，唉，真是躲在家好過。
跟爹爹研究EXCEL很是無聊，他狂問我點解咁樣做唔到人家的效果，卻又不給機會人家去試，怎會曉喎？都唔知係咩問題，不過算啦……就是因為這般無聊，於是就隨口找些話題，例如講下天氣咁啦……「呀，咁好天有陽光又會係咁行雷，呢D旱天雷，天氣真係差了……」豈料說時遲那時快，呢D旱天雷越行越密，還突然閃左一下電，此時爹爹也跟我一起望向窗邊，我還說我有冇眼花，係咪真係閃電，點知跟住就勁了……
各位有沒有看過湯告魯斯套世界大戰，呢個時候的情景竟然跟呢套野開頭堆閃電有D相似！講完呢句我有冇眼花，之後果真再來兩下閃電，之後突然有一、兩秒的平靜時刻，我仲爆左句咩天氣呀！跟住勁了，平靜完果兩秒，突然吹起強風，一股仲勁過十號風球的強風突然吹來，我家所有向東之窗門應風被吹埋，向西的窗卻被強風吹開，廳中房中的雜物被吹倒。被這強風一嚇，正在研究EXCEL的兩人及廳中的阿娘立時將家中所有窗戶關起。這個時候，窗外的天色黑黑沉沉，很是恐怖。說時遲那時快，大雨跟隨而至，已經跑去關晒所有窗門的眾人，正準備繼續渡過閒置的星期日時，卻沒料到強風的程度已經超乎眾人所料……
繼續坐在機前的阿爹，突然呼叫說冷氣機漏水！我忙去看過究竟，竟見雨水像有靈性般從冷氣機、窗邊湧入房中，忙去拿布。沒料到原來除爹爹房外，我房及妹子房也有同樣情況！妹子擺在窗邊的工作紙沒了，而重災區竟然是我房！床頭濕左、窗旁的衣服濕了，水還從窗邊繼續湧入，還恐怖過鬼水兇靈啊！
如是者，周日的節目便是……抹窗抹地大行動，還有晾乾東西大行動了！… 繼續內文
夾夾、夾麵機
掛著三號風球的長週，番工一開波接到老闆肥仔的電話號召，沒料到同一時間，小強像聲控一般也同時爬出，快些爬番入肥仔房吧！你係屬於果度的，只係上次肥仔房洗地毯你們才逃難的，番去吧！回應肥仔的電召入房，沒料到肥仔係因為寂寞得滯想搵人吹水，天啊！人家要做事的，你吹水找第二個吧。轉眼又到收工時刻，約了爹娘去食飯，不過食飯之前，陪爹娘去了郵局換即食麵清仔產品。估不到現在郵局乜生意都做，自負盈虧果然不同，郵差叔叔同郵差姐姐做得咁甘都係為左幫郵局賺錢錢。
換完清仔床單同夾麵機，去了德米創作料理試食，主因是因為阿娘寄去某節目抽獎抽中了張現金券，月尾到期，在不蝕底的心態下，怎也要吃！否則以「節儉為美德」的爹娘，係絕對唔會去大雞樂大快活美金快餐樓下茶餐廳以外的餐廳吃東西！說回今餐，作為阿娘生日晚宴的前哨戰，今回午市只是小試牛刀。德米的東西也幾特色及好吃，唯一問題係好細碟，看來阿娘生日晚宴要好好部署才成。不過如果係喜歡肉餅的朋友，德米飯（勉強可稱為中式壽司啦）應該會合你口味，有大量不同款式的肉餅啊！當我們看著侍應捧個吉鍋上來說是手唧魚麵時，我看見阿爹跟我一樣，眼中出現一絲疑惑，但又怕露出自己的大鄉里而保持沉默，原來手唧魚麵係會咁上檯的，呵呵！
番到屋企拿出清仔玩具出來玩了！夾麵機其實係一部玩具來的，但同親朋戚友談起時，個個都以為係用來夾即食麵，仲問駛唔駛要麵粉？會唔會好難洗？點知D麵熟未等等之類的問題，真係有點攪笑。夾麵機其實似冒險樂園那堆夾公仔機的縮小版，加番清仔清妹圖案，將公仔變左做即食麵玩具之嘛，唔係用來夾即食麵架！不過部機的設計也幾像真，要入錢錢先有得玩，又個夾同真的夾公仔機一般係無乜力的，所以都幾難夾，慢慢玩吧……
差點唔記得，今日開始又有Survivor做了！估不到Bobby Jon咁鬼Cheap，咁快反白眼，佢同Stephenie真係差得遠……… 繼續內文
敗家之旅
約了人去新城市廣場交收，將不要的東西拍賣套現，豈料擺低四本書，卻又買回兩本新出漫畫，沿途還看見心愛的大口仔2006月曆，仲有美輪美奐的魔女宅急便2006年Schedule Book，無錢袋入袋還要倒貼，真是敗家之旅。也因為這個新城市廣場之行，坐了很久沒坐過的沒冷氣巴士（熱狗），還豪吃了大雞樂的下午茶餐，大熱狗加火腿米粉再加蒟蒻雪糕紅豆冰，飽死之餘還要肥死，真係唔知自己攪乜錯食得咁鬼豪，夜晚還要做節出街食晚飯，真係要又飽又肥咁過中秋了……也因為幫襯大家樂，遇到一個考驗香港服務業人員的盲毛師奶，如果香港多幾個咁人，我睇怕幾好脾氣的人都會被激死。以下係案件重演……
事發當日大約兩點四十五分，本人正排隊幫襯某大雞樂的下午茶餐，因為剛剛落更關係，得番一個收銀姐姐（收銀）係櫃台，這時，一個拖住細路的盲毛師奶（盲毛）正排係我前面準備買野，而我身後排滿了等食大嬸們同等落注（是日跑馬）阿叔們……
收銀：要D咩食呀？
盲毛：（半鹹淡廣東話腔）火腿米粉。
收銀：無火腿米粉喎。
盲毛：我要火腿米粉。
收銀：火腿米粉係配茶餐架，無得就咁叫，你要咩茶餐配呀？
盲毛：我要火腿米粉呀！幾錢？（呢個時候佢件細路開始扭計）
收銀：（開始唔耐煩）都話要配茶餐架囉，咁你要咩茶餐呀？
盲毛：個牌有的嘛，我要火腿米粉！
收銀：無散叫的，要配茶餐架，你到底要D乜食？
（收銀姐姐眼見呢位盲毛身後有一眾越等越嬲的顧客，開始趕客了……）
盲毛：（個仔又再度扭計）唔好嘈呀！咁要茶餐啦！
收銀：你有冇睇個餐牌，有好多款茶餐，你要邊款呀？
盲毛：我要火腿米粉呀！
收銀：你到底要D乜呀？我地有好多款茶餐，你要講要邊款先得架！
盲毛：（就咁手指指個餐牌方向）我咪指左囉，要米粉呀！
（呢個時候我開始懷疑盲毛到底係咪唔識字……）
收銀：（開始被激死feel）我睇唔到你指咩，你到底要乜野呀？
盲毛：火腿米粉呀！我要火腿米粉呀！（開始歇斯底里）
（又係呢個時候，身後等左好耐的顧客開始空群而出……）
阿叔：求其叫個豬扒包死開啦！（呢位阿叔拿著馬經，好明顯開始火起。）
阿嬸：行埋一邊諗清楚先啦！阻鬼住晒！（阿嬸都好嬲。）
哥仔：（粗口）叫咩你呀？
盲毛：（再次指向餐牌中附係茶餐後面寫明加五蚊的火腿米粉果行）我要呢個火腿米粉呀！
收銀：（眼泛淚光）都話左果個係要配茶餐架……
（此時噓聲四起）
盲毛：（借個仔過橋，大力手握著一百蚊紙）我地都係唔食住，我地走！
收銀：（真係流出淚水）我講極佢都唔聽……（抹乾淚水向著下一個顧客即係我，又再次擠出那些微的笑容）請問要咩食？
多幾件呢D咁人，就算做到劉華所謂的服務態度，都係死……… 繼續內文