經過一星期的工作，又到可見可愛可休息的周末了！回想起本星期俾樹妖傳召作證兩次，仲要好似審犯咁逐條數審問真係好鬼激氣，老闆肥嘢又白白痴痴，真係無名火起。好，說回正題，由於家中病人仍舊臥病在床，所以便由另類家長即係家姐我出席妹子的保你大畢業典禮。晨早起來，其實都唔係晨早，由於本小姐的極級KO再破紀錄，攪到十點俾妹子大鑼大鼓才懂起身，攪這攪那趕出門口，結果比預定時間11:15遲左小小，很是抱歉！各位請多包涵！
是日保你大校園花香處處，人如潮湧，無他，成千上萬的畢業生和家長今天全跑到這裏來慶祝嘛！早上乘第一節的人還被困在紅館未跑出來，速速到處留影，我的工作當然是當一名稱職的阿四與及機婆，負責替妹子拿著道具服裝及當攝影師，不停走來走去。應約的表弟及妹子網友也算唔話得，跟我們到處亂跑玩足朝早。沿途有妹子的騎呢同學甲（熊貓人）及同學乙（憂鬱人）插入加影，又去參觀埋DESIGN學系的唔知咩室等，再鼠上Podium又食又飲，終於一行五人去了尖東家鄉雞整個全桶套餐飽食一頓，算係咁啦，幾鬼飽。
飽餐一頓，表弟及妹子網友先行離隊，我們又再次回到People Mountain People Sea的保你大校園，此時由於第一節的人已經散場，更為人多，就算影相也只見人頭而不見景點了！差不多夠鐘入場，家長們依舊坐係背台位，我跟妹子的坐位簡直就是一個大斜角遙遙相對，要不是妹子拿著大Bear Bear，怎也看不見她！開場首先頒了四個榮譽博士俾四件名人，但除左靳埭強外另三件都唔多識，其中一件更加唔俾面唔來添！跟住精采了，受頒授人士致辭開始KO，校長致辭簡直係KO最盛時候，而環看四周，KO了的家長近七成！去廁所的也佔一成！之後終於到畢業生上台，由於人數眾多，只有博士生可逐個上台，其餘的都係派代表上台再用射燈射住成班畢業生就算。
如是者繼續沉悶，直至頒多媒體科藝理學碩士時，全場嘩然！當然，上台的代表竟然係爆炸猛男！怎會知佢係爆炸猛男？因為佢戴住個爆炸假髮上台啊！在如此莊嚴的畢業禮上佢竟然也繼續玩野，對住同屬一系及同屬一校的同學們，這是否在各位臉上貼金呢？我想知道阿校董會主席見到佢時有冇笑呢？獲頒完後這件爆炸猛男更將頂碩士帽放在爆炸假髮上面，當行過校長潘宗光前面時，校長跟他握手，卻整鬼甩左爆炸猛男頂帽啊！全場係度勁笑呢！過左爆炸猛男，又差不多到妹子果科了，只見射燈射向她們的坐位，呢一刻歡呼聲又響起了！
玩完呢個畢業禮，再在保你大校園搵班朋友影影影（機婆又要出動），便回到新城市廣場吃晚飯。哎吔家長又要出動，去了七樓的燒又燒食，野幾好食，叫了壽司、漢堡等，都OK啦，係份量少了一點。聖誕節的新城市廣場幾美，不過人很多，又玩足成日，都係早點打道回府抖抖了，明天要展開回帶大行動啊！… 繼續內文
小羊
家中病人病情反反覆覆，很是擔心，卻又愛莫能助，只得無奈地繼續渡日……
老闆的老闆的老闆的老闆給予驚人指令，朝早九點告訴你今日下午三點係死線，但是在盤數都未埋之下，三點可以交到甚麼Schedules呢？只得將一盤未對過未埋數未做adjustments（總之係乜都無做過的一盤假帳）的數字亂砌一通交貨，反正遲早都要做番果堆adjustments埋數的了，可不等埋完數才砌Schedules呢？呢d咁無謂又明知白Do硬的事，我係唔會做的！白痴！不過我老闆及老闆的老闆卻照做可也，所以今日全不理會老闆及老闆的老闆肥野了，你們自己白Do吧！
今天路過看見可愛的小羊群，好Cute呀！番幼稚園的小羊，仲有著洋裝的小羊，羊咩咩啊！可惜的是你們太貴了，窮人買不起，唯有跟你們拍張照吧……… 繼續內文
人人有叉用
公司攪了個周年旅行，內容主力是燒烤節目，為左彌補上次流會的燒烤約會，再加上懶開就懶的心態之下，有人book好晒車又唔駛自己帶野，於是便跟同事們報名參加。懶洋洋的周日要人早起是有點難度的，所以一上車基本上都是想爭取時間KO，奈何有件唔稱職的Part-time領隊，加上兩件像開籠雀般的小朋友幫手甲及乙，沿途都很嘈吵，但這一小點嘈吵及太陽曬係阻止唔到KO之王的KO的，照訓得著可也！
第一站到達的是蕉坑獅子會自然教育中心，睇下花花草草瓜瓜菜菜，漫步於田園之間咁啦，果堆農館漁館郊野館都OK多野睇，堆模型都幾cute，不過人多了點，特別多婆婆嬸嬸……不過本來的預定項目探貝貝變了去這裏，好似都係探貝貝吸引些……
第二站到達的是雲泉仙館，都很久沒去過了，不知怎的鑊鑊去這裏，定必碰到菊花展。我們去的時間，還適逢下午食齋的時間，到處坐滿叔叔婆婆嬸嬸等眾。這麼久沒去過，館外賣奇怪貨品的小攤子竟也增加了不少，農產品（菜乾、豆、蕃薯乾）等還有像夜欄的商品，又是一大堆的人。無記皇帝御用花園個湖心亭等也在這裏見到了，不過季節不對，荷花謝晒了。
等了這麼久終於入到正題，去到天水圍的有叉用燒烤樂園。這個燒烤場的名字早已令我們笑了一陣，有叉用……這個燒烤場也算大，跟當年未拆的歡樂城（前身青龍水上樂園）來說，這個燒烤場也差不多。雖說任食任燒，但人的肚子畢竟是現實的，怎麼可吃到這麼多呢？不過都幾好味，雞翼牛扒豬扒，飽飽。
玩左成日，都係時候抖抖，但一想到第二日仲要番工，心情立刻由高峰滑落……… 繼續內文
樓盤傳真
近日跟同事傾談，大家都對近來越改越奇怪及畸形的樓盤名指指點點，適逢今日東方日報列了不少出來，不講也不知，這些樓盤原來係咁地區……
君悅華庭：全無聽過呢個樓盤，原來係天后架？唔知點華法？
盈溢居 ：個字咁難寫又唔順口，仲要係屯門……
宇晴軒 ：唔係出JOB去附近貨倉點貨路過，都唔知呢檔野係長沙灣。
翠逸雅園：完全唔知呢個地步，原來係元朗？
海名軒 ：搭車路過望得多，但又係唔提就唔知係紅磡。
君匯港 ：原來奧運站果度除左奧海城仲有其他屋苑……
港威豪庭：尖沙咀，請問係邊架？
海翡翠 ：呢個原來又係屋苑名？實在奇怪異常，仲以為珠寶名，係長沙灣？
一號銀海：奧運站附近有咁多屋苑咩？
御林豪庭：西半山？唔曉喎……
碧海藍天：呢個唔係用來形容風景的形容詞，竟然係屋苑，又係長沙灣。
君臨天下：更加唔覺得呢個係屋苑名，尖沙咀？
好，今晚萬千烏龜賀台慶，可以有藉口提早做總鏢頭押解煩人離開。病人情況繼續好轉，各位有心了！… 繼續內文
狗狗和你MSN
是日無聊小故事：狗狗正在跟朋友MSN玩視像會議，身旁的大貓忍不住偷看兼指指點點，但狗狗一於好少理，繼續同人MSN，於是對方把他們拍下，告訴他們的主人這班動物偷玩事件，如是者一網成擒……
今日下午在家發呆，打開從公司拿回來的文件，對住一大堆Code及數字，呆呆地click來click去，都不知道自己在幹甚麼，真是無聊透頂。
家中病人明天動刀子，很是擔心但也未能有所作為，唯有祝願一切平安順利！… 繼續內文