TabiLand

　　話說十二月的某日，本小姐在幫襯KFC食緊雞脾的時候，睇到張招紙講KFC將會推出數獨機供換購，另舉辦了一個數獨王大賽宣傳一下，只要填了招紙的表格便有機會參加。由於果日實在太過無聊，於是一路食雞脾一路填鬼晒張表格，仲袋住左張表幾日唔鬼記得左，之後某日發現仲係個袋度之下，就交了表格。沒想到的是這個無聊人之後都唔記左的事情，踏進了2006年竟然收到電話叫人去比賽。好呀，是但啦，都係繼續無聊……為了遷就比賽，還跟同事調了長短週，去參加這個詳情已經不太記得的雞王之王爭霸戰。
　　事前都無乜準備，要知道這個無聊人都係得閒無聊的時間才會去用下腦玩下數獨（絕對不是因為流行），又玩唔到時絕對會發脾氣地掉低一走了之，不過既然參賽，本星期都很免為其難搵些網頁練習一下。是日晨早出發（同番工時間竟是一樣的早！）點名報到，獲派雞王尚未推出市面的電子機一部練習，眼見身邊的學生組參賽者努力按按按，那我也按按按吧。但實在是死蠢，較了個最難度高的來試玩，攪到自己玩來玩去都未玩到，打擊信心。幸好，經過講解一輪後，原來是用Easy Mode來比賽的，便立即轉攻Easy Mode。這個時候，電話響起，甚麼？朋友竟來了？噢！這些出醜人前的醜行（證明如斯一件無聊人）怎能讓人看呢……
　　簡介一輪後中場休息，食物飲品俾班學生組參賽者家長搶掃一空，果然係好強的吞噬力！中間的花絮就在此暫略了，先來一次預賽，讓各參賽者熟習一下，噢，Random左個咁鬼難的，按極都未按到答案，結果大大落後，簡直打擊信心！跟住又休息等件嘉賓乜教授來。乜教授話明講三分鐘廢話果真只講三分鐘，還要最尾整句「夠三分鐘未呀？」，簡直笑爆嘴（在場人仕保持儀態俾足面佢）。學生組開賽先，班細路個個起勢地按，非常認真，終於純純認真學生妹妹勝出！到公開組了！一看自家的對手，有一件吋爆樣子的哥仔，一早就覺得呢條友WIN硬兼來Show Quality（賽前大熱門，預賽亦拋離其他對手，結果大熱勝出）；至於師奶們，大概陪跑；大叔們，可能推理力強，但按機慢，大概也是陪跑；餘下的哥仔們，應該係最強勁的對手。好，開賽，幸好Random出來的幾合心水，但按著按著，再加上司儀的一句過左三分鐘，隻手竟不其然地震起上來，越按越不對路，此時冠軍已經以三分幾十秒勝出。慘了，隻手震到幾乎按不到掣，但我個腦仍以手不能及的速度運算中，差兩個格咋，隻手震到已經近乎跌機了，死命按著，亞軍出了，努力按埋佢，立即舉手！好野呀！趕及拿了個季軍，只輸亞軍三秒鐘！到叫我寫低個名紀錄時，我隻手仍然震得幾近寫不到字，怎麼會緊張成這樣啊？玩下之嘛？
　　好，如果各位在那堆三姑八婆雜誌或報紙的一角見到像小妹的樣子的相登了出來，請不要驚訝，這只是閣下一個無聊的朋友某一日幹的一件無謂小事，多謝各位！… 繼續內文

　　踏入2006年的第一篇雜記，真是要講一句合皮扭耳！一眨眼間我們已由2005年跑到2006年裏，到底2005年我攪過些甚麼呢？繼續唔知做乜的餵雞生涯，有時真的懷疑自己是當餵雞的還是做打機人？為甚麼我的工作有某程度上好似去左程式開發般？不如索性轉投IT行業吧。繼續日鵝夜鵝吵吵罵罵老闆肥野，為何過了成年堆工作肥野仍舊不入腦，勞氣指數持續高企！繼續肥肥肥食到肥晒？繼續做一條社會的飳米大蟲？唉！希望踏入2006一切會變得美好一點吧！
　　昨天去參觀友人的新居，嘩！48樓！比小妹住得還要高！新居入伙，入門動手事項——駁電線！要知道這些電線喇叭線天線左右聲道線視訊傳輸線電話線LAN線等等，一向以來也是煩到七彩，為人所不願理之。加上精巧的裝修，那堆傢俬中要為線線開窿窿兼左穿右插，這堆爛鬼線就完全煩得一團糟。正當我們成功駁好一條電視線，滿以為收工之際，屋主才展示出更加多姿多彩也無窮無盡的線，天呀！不禁爆了一句：「玩咩？咁鬼多又唔早D拿出來，係就一次過穿呀嘛！」如是者大家出盡辦法左穿右插盡情駁線，終於叫駁晒影視系統的一堆線，個個均扒在梳化回氣。豈料此時竟傳來屋主的惡耗，架DVD機跟電視未能駁通喎！出現偏紅或偏藍畫面（視乎你插唔插晒堆視訊線），天呀！唔好再玩了！經過一輪插完再拔，拔完再插後，問題仍舊未能解決，眾人心灰意冷呆坐梳化，獨剩屋主繼續研究，我就拿了個DVD遙控在亂按一通，反正都唔得了，按錯無乜損失。「喂，呢個tvmode即係乜呀？」屋主說也不知道，咁我就繼續亂按了。這個時候，個電視同DVD突然戲劇性地駁通兼出正常畫面，友人遂問「你做左D乜呀？」「咪按掣囉！求先咪問個tvmode做乜架囉！」就係咁，一切問題獲得解決，而我也由於一個按鈕被封「電器專家」了……
　　乘著呢個亂按一通，亂試一番的求知精神，今天完成了小妹生平的第一個Excel Macro，又係屢敗屢試的精神，加上死蠢的方法（係都要搵二萬條來test，搵個二千條test咪省回不少時間囉！）終於完成，Hay! Excel Macro我也懂了！
　　踏入2006年，終於正正式式成為一名餵雞師了！但，成二千幾蚊的會費，實在係……好，踏入2006年，希望是豐盛及進步的一年！
　　P.S. 謝謝友人們送的禮物（過左Boxing Day都唔記得拆），羊之國又向前邁進一步！… 繼續內文

　　本星期將在香港展開世貿會議，出左名跟住呢個世貿會議的示威團隊亦整裝待發。對於身處高危地區工作的我來說，今日尚未受到封路、示威等的威脅，但朝早番工時眼見一堆商舖封晒木板，聖誕裝飾收起了，好像外國打風撤退一般。還有，最重要的是今日無都市日報派！攪錯呀！抗議世貿！至於聽日會否受到封路影響塞車等，就要聽天由命了。
　　也由於世貿，公司本星期都不太敢安排太重要的事情，唯恐有甚麼突發事情影響公司運作。亦因如此，本星期難得的早早收工回家，可以好好抖番個星期，早早食晚飯，連阿娘心情也好些。食飽飯阿娘拿出她的新玩具在把玩，又說要買把新的掃帚取代爛爛地用緊果把，結果買左把咁野番來，都幾好玩……… 繼續內文

　　今朝一如既往看著方向日報的副刊時，正看到一段有關八十年代的物品的介紹，有幾樣野真係幾能勾起童年回憶，也特別有同感，例如《再見螢火蟲》的罐仔糖、大肉腸、唧唧冰等，接著看到介紹有關紅白機同液晶體遊戲機，睇睇下突然諗起自己果堆遊戲機。想當年個個屋企實有部紅白機用來宴客，差在係你會唔會再俾錢買部碟機，咁就反旦碟玩到嘔都未天光了，至於自家果部更加係買埋把紅外線槍番來玩射雀仔的！兵峰、孖寶兄弟、食鬼仲有果D幾十合一，仲有隻功夫貓黨呀真係好好玩架。液晶體遊戲機方面，家中也有不少珍藏。阿爹見我睇得咁興奮，就提議拿些家珍出來睇下，如是者又倒出家中珍藏來看看，估不到這麼久沒玩這些遊戲機竟也還能玩到，Made in Japan果然不同凡響。以下係當年心水推介：

  
伊賀對甲賀：雙打機精選，雖然只得Attack同向左向右轉功能，但可雙方對打，簡直係復仇遊戲始祖，鬥快按掣當面對打亦得，躲在樹叢暗算對手亦得，得左！
猩猩Hockey：又一對打遊戲精選，當年無記錯出過三款這類可以放兩個遊戲控制出來的遊戲（無記錯有款係鬥噴殺蟲水），個遊戲控制器更加發展到有上下左右同Attack，打打下仲有最剋人憎裁判彈出來幫（害）你，正！
神偷：1983年出品，集響鬧、計數機及遊戲機於一身，要避開警察、狗狗仲有紅外線的追截逃離現場，原來當年已經有咁厲害的遊戲機了！
　　總括一句，擺左咁多年都仲玩到，無論係電同遊戲機的水平也是上上之選。最厲害的還是那部黃色的神槍手遊戲機，太耐連放電的位置也開不到，卻仍能運作及發出清脆的遊戲聲音，簡直恐怖！… 繼續內文

　　近日看了港產片殺破狼，一部陽剛味極重的電影，正確點來說，應該差不多是一套全男班的片，暴力得很！故事其實好簡單，再正確一點來說大概是沒有甚麼劇情可言，任達華飾的陳Sir想釘死洪金寶飾的大佬王寶，奈何身患Cancer要走人，將會handover的甄子丹飾的馬軍就在這一日準備接手，卻又遇著陳Sir等人拿到餅加工帶可以釘死王寶，又同一日係王寶兒子滿月，於是就打打打同砌生豬肉咁囉。論劇情方面，就真係幾無聊架，但套片尚算拍得幾有風格，但要等左成個鐘吳京再出場先正式開始這個都市擂台。Round 1吳京KO阿樂一場就普通可接受，Round 2吳京KO智叔同夏昭聲就得個噴血effect，係咁勁噴血。Round 3吳京vs甄子丹就當然係勁打啦！甄子丹果枝超級警棍仲勁過機警果枝電磁警棍呀！Final Round甄子丹vs洪金寶就真係勁，又血又打！那招互相風車跟住兩個都飛出大西洋真係嘆為觀止！總體來說，可以用一個「打」字來形容這套片！但受不了噴血的就請留意了。… 繼續內文