Annual Leave再次囤積居奇，又放假陪家人殺上深圳。今次終於可以行e道啦！好似入車票咁，真係話咁就過關！有了深圳通嘟嘟搭地鐵，去東門話咁快啦！都係幫襯唐宮飲茶，今次記得同法國餐包影番張相啦！好味呀！再加上俾阿爹勁塞野食，真係攬住個肚走啦……食完再去行東門，依舊沒我想要的X畫集，卻有我想要的DVD！太陽廣場買一百送五十呀！買了衫衫再去幫襯可樂店呢！
下一站華強路，今次真係行左入去堆電腦商場。嘩！乜賣電子零件市場咁鬼似D中藥市場？一個個攤位，堆電子零件、電線等似成斤買藥咁款，個個攤位擺部notebook係枱就係開緊工，果堆電子板真係唔曉睇。過兩個街口（條馬路好恐怖），個商場行入去似旺角先達咁款，乜牌手機、MP4、遊戲機、電子狗（係防盜儀器，唔係果隻識Play音樂的狗狗呀）、音響設備等通通應有盡有。逛完電子商場，本諗住今日唔去茂業去萬佳百貨，點知行錯左路，怪不得行極也未到。最後反正都行了這麼久，索性轉去吉之島，途中見到科學館站，真正的深圳科學館了！不過，間野個門面咁殘的……吉之島依舊狂掃超市，蒙牛雪糕超大杯只售2.8！不過咁大杯點食呢，算數吧。買完一輪，向著今次總站中森明菜進發。由科學館站行去大劇院站，途中經過真正的深圳大劇院，原來成日講的那幅小平畫像就在這裏！
由於唔知中森明菜所在大廈的確實地點，行錯了小小路，原來由萬象城行過去就差不多。成間中森明菜都幾大下，兩層樓，仲有鐵板燒專區，下次要去試鐵板燒才成！兩層樓其實也有不少地方係間晒房，聽聞入房座底消費要千二！食物價錢來說，較香港平少少啦，質素普通，不過估唔到平日都咁Full，看來深圳的朋友也很愛吃日菜吧……
食飽搭101回程，售票員兼任播咪及掃地阿嬸，架車行行下拿了支掃帚出來掃地，真係好攪笑。翌日番工，腦細以為放了一日假回來我便會對其向我掟野的惡行的仇視之心熄滅，妄想吧！向我掟野呢D咁無品的行為，等著瞧吧！衰人！… 繼續內文
寬頻復活記
耶穌受難節前夕：寛頻無緣無故慢下來，得ICQ同MSN係開到的，最後連呢兩樣都開不到，宣告香香。唯時已夜深，暫且放下。
耶穌受難節：晨早打電話去和記投訴，落了Order等覆，結果等到下午KO埋先至打來，機樓Check過說非常正常，唔用Router又上到，咁又好似唔關和記事。跟住開始不停向外尋找協助，睇下咩情況，暫時解決方法，好似人家制水咁，有限度供水，家中三部腦，邊部要上網人手駁線駁果部。
耶蘇受難節翌日：下午第一個急救員表弟來救駕，懷疑係和記BLOCK Router，玩左幾次Reboot後，決定去買LAN卡放棄Router再來過，急急買完原料回家，沒料到缺Cross Over線，結果數小時的拯救行動失敗收場，繼續維持有限度供水服務……
復活節：隔壁陳生借來佢的Wireless Router再試，一切正常，因此正式宣告我家的Router玩完，陳生說借他的後備Router再戰江湖，下午繼續維持有限度上網服務，順道回帶K書，結果夜晚有Router但無火牛，拯救行動再次失敗，輪街喉式手動接線寛頻服務繼續……
復活節星期一：終於忍無可忍，既然認定舊Router壞，決定買另一個新的來玩。上午繼續回帶K書（終於K晒成個月前本《看電影》啦！），下午去一城Tea時順道去電腦店問買個最平最Cheap最簡單的Router番來，一駁，得左！寛頻終於正式復活。奈何三小時後，和記出海似乎出左問題，支持抗日，所有日本網頁皆不能Load到，現在唯有繼續監察中……… 繼續內文
下流社會
日前看罷《都市日報》，談及日本所講的下流社會，甚有同感。日本的中流即中產，下流則指日本經過長年經濟不景氣後，由中流下滑至低下層的下流。就如作者葉志偉所說，跟我現在所處的朋友階層也很相似。死慳死抵讀完大學，出到社會卻只會找到合約制的工作，然後定期續約，但續不續原則上不與工作表現掛鈎，而是視乎公司還有沒有錢。在這種情況下，這班人很長期也只與公司保持若即若離的關係，時常口中話搵長工跳槽但又搵唔到，所賺薪金也不見得怎樣哈哈哈，僅夠糊口、交通及付家用。在公司見到一班大自己十年左右的上一輩，這班人跟你做的可能差不多，但福利人工及穩定性卻差很遠，你就得份MPF（勿忘記還有扣起5%），人家無Pension都有ORSO，我地平時錢都唔見多，老來真係唔知可以做咩，心中常有種不公平之感。漸漸生活開始鬆散怠慢，因為無多餘錢也沒多餘空間給你發展，變得生活毫無目的。
引述日本仔本書所言，下流人交流能力與生活能力都差，人生沒有甚麼大願望，收入職位不見上漲，大多處於單身狀態（何來錢錢結婚？）。他們當中，大多數人悠閒生活，喜愛坐在電腦前上chat-room打機，女性則愛唱歌、跳舞等。日本人口老化、經濟長期不景氣，大公司開始把長期工變合約制，形成新一代個人所得、學歷與生活需求等差距越來越大。聽落聽落，我們又何常唔係咁款，無前途無希望，打份餓你唔死但永無發達or進昇的工……
作者寫了十幾項指標測試閣下是否下流人，中六項或上的話，可能是「下流人」了。死啦，中左好多……
01.年收入未達年齡的十倍以上（以1萬日圓為單位計算）
02.不愛想得太多，要及時行樂
03.覺得活出自己沒甚麼不好
04.生活只想隨心所慾
05.嫌麻煩、懶得出門、不修邊幅
06.喜歡獨處
07.生性樸實、不顯眼、不出眾
08.覺得流行就是展現自我風格
09.覺得吃東西是一件很麻煩的事情
10.常吃零食與快餐
11.可以待在家中玩電腦遊戲或上網一整天都不厭倦
12.未婚（男性33歲以上、女性30歲以上）… 繼續內文
回帶短評
近期hot topic係D乜？邊緣化囉。咁究竟邊緣化即係乜（阿娘問）？這個嘛……我都唔係好知喎。到底點解政務司司長報紙會叫佢肥龍？又到底佢講的邊緣化係乜？香港邊緣化又點？邊緣化我諗係指脫離中心啩，咁本來做轉口中心呀乜乜港物物港的，宜家大陸都咁鬼先進，唔駛靠香港食出，做唔到中心咪邊緣化囉，係咪咁解呢？（純粹個人意見）
忙於工作，工餘繼續懶散唔想用腦，回帶項目如下：
輪舞曲：虎頭蛇尾，非常一套無間道，那堆臥底會繼續來，竹哥無論造形角色都充分充斥著陳永仁的影子，崔智友，普通啦，同竹哥互相交換話日語韓語心得啩？不斷冒出來的臥底好令人諗起無間道。還有，竹哥同有娜講你的真名係乜乜的時候，唔知點解有D睇緊星球大戰「I am your father」的feel。結局有點來得倉卒（以前面的結構來說）及一廂情願，美中不足我覺得浪費了小狗Justice！
西遊記：一早預左佢得啖笑，每集有點似睇幪面超人，等怪獸出，大義凜然地行出來講對白，再打到怪物落花流水，澳洲景出來出去都係出沙漠同舊大石，但總覺孫悟空太肥，豬八戒太瘦太細粒，唐僧成日企埋出來齊齊打唔似唐僧，唯一深印象係黃泉之路果集。
NANA：剛剛播出第一集未得閒睇，只睇過電影版，但真人版比較睇唔慣，期望動畫版好看一點吧，看漫畫版，我覺得最後娜娜的結局會好突然同淒慘……
Angel Heart：比漫畫稍稍節奏不同，但覺得動畫版的節奏未能好好掌握，沒想像中好看。
翼之奇幻旅程：唔好提，未睇過一套改篇CLAMP漫畫改篇得這麼差（魔法騎士係畫功差，個故事都尚可以），集集都悶到抽筋，離譜之作！
xxxHoLic：故事風格有些類似東京BABYLON，以社會問題入故事內，期待中的一套動畫。
尚有一系列CD、電影未及清理，繼續擺吧……另最近決定花小小時間玩下網上學習，不過對住個Mon來上堂都好鬼累……… 繼續內文
忙．病．累
三月整個月都在忙幫腦細們弄他們的那盤爛帳，左扭右扭，左繡右繡，又時刻被問這個Audit Trail，真係想爆粗打佢地，我們做Adjustments就下下問Audit Trail，大腦細講一句咁做又唔見佢俾番堆Audit Trail出來？跟住再失憶問你點解咁做，頂！你叫架！真係不爆粗不快！再加上三月開始趕年結埋數，真係忙到痴線，結果捱到三月最尾果日，病了！
從來未試過病得咁應，三月尾二果日已經開始黎料，覺得好似食滯左咁，下午時開始覺得抖氣左膊痛痛，心諗一定係俾死肥野激親所以咁，早早撤退回家諗住抖下無野，點知夜晚訓著仲痛得緊要，連個胃都一齊在痛，攪到都無乜訓過，終於第二日頂唔順就咁Sick Leave，醫師話可能個胃發炎，結果捱左三日清茶淡飯……
經歷完以上事件，目前尚在努力埋數中，病好了但仍然忙到傻，趕住埋年結，日日不停手咁做都仲係有大堆Back Log，攪到個人好鬼累，難道真係應左蘇師父果句「辛苦個人力量得財運」？
花花仍舊栽種中，無論網上種的同過期罐頭小椒也在栽種中，估不到過期的罐頭小椒仍舊頑強生長中，出了兩塊小葉，厲害！
點唱：林憶蓮 願
最好知己 永在身旁 聽我講 我從不說謊
我想相聚 誰便再聚 我想歡樂便隨意去追
我想相信 我做得對 想到人極疲累
我自信有日如願 縱使天高地厚 仍被我逆轉
假使一生會沒了沒完 總有日會如願