貴酒店果然係貴酒店，巨蛋酒店個自助早餐都好食過人，個乜乜蛋餅好好食架！仲有意粉生果任食，簡直係正呀！朝早要食飽些，因為迪士尼裏食店太貴，早餐食飽些，午餐可以Skip齋食晚餐得了，可以省回荷包不小。食完早餐，眾團友就向迪士尼樂園出發了！大部份團友都向原案迪士尼進發，但三年前我們來的時候，已經連無無聊聊一堆日文的灰姑娘鬼屋都掃埋，真係無乜野無玩過了，所以就決定去迪士尼海洋，全團得另一對富豪夫婦跟我們一樣決戰海洋。在原案迪士尼門口等領隊安頓好那一堆家庭裝團友後便向迪士尼海洋出發。但出發時竟然發覺多了一對母女去迪士尼海洋，原來她們兩邊也去，還自費三百幾四百蚊港紙一位入海洋，果然是有錢人家，有錢亦豪至此，莫說香港人無錢呀！
入場前已聽過同事朋友及領隊對海洋的評價，「細、無乜野玩、幼稚」，亦由於這個評價，一直認為可以海洋可以慢慢行、慢慢玩，不過當捱到出場時，回頭一想其實係不應抱這樣的心態的。無錯，迪士尼海洋對比起原案迪士尼來說的確細，無太多機動遊戲，而機動遊戲對比於環球片場、富士急等來說是幼稚的，但絕不代表要行晒是件易事。說回正題，一入場見到那個地球，就不其然想起環球片場個Logo，再行入點就進入第一個區地中海港灣。這個區域的建築物的確幾似地中海建築，幾漂亮。呢個區域有貢多拉坐，那位划船的哥仔的確幾熱情，我見隔離船那個船夫都不像我們船那個那麼喜歡講野（一堆聽不懂的日文），還唱了兩嘴意大利歌……
由於領隊的極力推薦，於是一開波就跑去失落河三角洲地段想玩Indiana Jones，怎知經過發現港區時發現n年前Twins拍音樂特輯時的水上逗趣船無人排，於是拿拿聲入了去玩，還要左邊一次右邊一次咁連玩左兩次，後來夜晚又行番黎呢鼠再玩第三次，簡直欲罷不能，此船其實有點像水上咖啡杯，在水上不停咁轉來轉去……玩完逗趣船後見另一重點遊戲風暴騎士都無人排隊，於是又走去玩埋先，簡單來說呢個遊戲就是動感映院再加噴水噴風功能，都算好玩的。
終於跑到Indiana Jones處，發覺根本用不著拿Fast Pass，因為實在係無乜人排隊！這個遊戲係坐車車入去探險，基本上係黑、噴風、同左右搖搖咁，不刺激，但幾有趣。出來後發覺原來最尾滾大石閃電時係影左相的，影出來的效果又係有兩條傻婆在傻笑，不過隔離那張仲攪笑，有個小朋友用手掩面唔敢睇，睇到我們成班人笑到扒晒地。呢個區域無太多遊玩設施，影相位也不多（可能懶得滯無行晒），於是又匆匆向下一個區域進發。
阿拉伯海岸亦即阿拉丁遊玩設施的基地，因為家人對神燈老妖的特殊癖好，對這區任何關於燈神精靈的陳設也特別注意。燈神旋轉木馬妹子當然霸住隻精靈來坐，令人比較意想不到的是神燈劇場，起初以為只是普通立體劇場（戴個3D眼鏡），豈料是一個真人魔術表現配合卡通人物同時演出的節目，兩者配合得很好，最最稱奇是精靈會跟你開個玩笑的！咪當齋睇戲咁簡單！另外這區亦有個辛巴達七海航行，又可以坐船船去睇木偶公仔，這個船船入面的木偶弄得很精美，會眼眨眨同口郁郁的。
下一個區域係小魚仙主題的美人魚礁湖，有室內同室外設施，室外有個超短程過山車同彈彈下的旋轉寄居蟹，這個旋轉寄居蟹可說是成個迪士尼海洋最激的一個了！轉轉下會擰轉頭彈彈下的，不過對比其他遊戲仍然是超幼稚……區域的室內部份裝修得像水晶宮般漂亮，也估不到在幼幼稚稚的噴水區域穿來插去竟然是好有趣的，可能平時太少機會咁樣玩水。室內所有幼稚玩兒全被我們掃場，咖啡杯更加玩了兩次！我懷疑阿妹真的很久未玩過咖啡杯，她對迪士尼海洋裏任何轉轉的玩兒也特別有興趣，包括轉來轉去的逗趣船及咖啡杯！裏面仲有個美人魚劇場，以空中吊起那堆魚蝦蟹營造海底效果，尚算新鮮。
玩餐飽後行番去地中海區域睇巡遊，我們去的時段真的不太好，地心探險之旅不開放，夜間巡遊也不做，只有白天的巡遊可以看。海洋的巡遊當然也在水上發展，米奇老鼠等全部坐好漂亮的船船出現，另加一大班英雌駕水上電單車在湖上穿插，真的大部份駕水上電單車的都是女人來的呀！眾多船船之中，唐老鴨的那隻算最矚目，因為有條唔知乜龍跟住隻船後面。這個巡遊另一攪笑地方是美妮會上了岸跳一會舞，之後棄船再俾米奇拐帶上第二隻船，於是睇完後我就說了句：「有冇攪錯！米奇拐帶美妮呀！」也於睇巡遊期間，我們打開乾糧袋，吃著那個奶油包同豆沙包，攪惦左個午餐。呀！差點忘記了，自從九一一後，入迪士尼要查袋，帶乾糧千祈唔好帶得咁誇，會俾人收左架！
充完電後，去了神秘島區域，地心探險之旅不開放實在係太過份，亦令這個區域無晒野好玩。海底兩萬哩實在係好幼稚，無人排隊兩丁友可以坐晒成隻潛艇，入面又焗又睇堆假魚，一睇就知個潛水效果係隻窗放水啦，我妹話唯一仿真度高係潛艇裏面又熱又焗，真的好像不夠空氣般……匆匆睇完就向美國海濱區進發。美國海濱區就更加乜玩野都無，唯一係影下相咁囉，隻大郵船係餐廳來的，唔幫襯無得入，吝嗇！不過這區商店較多，同埋賣的東西較其他區靚同實用。
原則上去到這個時刻已叫做大致上行晒成個迪士尼海洋，於是我們就放軟手腳再返去某些區域玩多幾轉同找卡通人物影相。精靈是必然要找的人物之一，米奇同美妮因為太多人排隊俾我們放棄了，唐老鴨、高飛狗、精靈、松鼠等全部都掃晒，最難頂要說阿拉丁同茉莉公主，我想這對演員可能都會同樣覺得惡頂，終日扮恩愛望得多都厭啦！隻馬騮就好攪笑，成日滿場飛跑來跑去搵番阿拉丁，搵完又分開再跑過。精靈就麻麻煩煩，成日擰來擰去個頭，等左好耐佢至肯擰完影相。就咁行下行下，當行到五點幾時，才發覺錯過了個要塞探險同隻古船，果度都算幾靚架嘛，於是又再去兜番個圈。要塞裏有不同建築同一隻古船，那邊亦有堆大炮。大炮雖然係假，但拉下掣都會發出炮響同噴煙，算幾有氣氛。就咁行下行下又坐下貢多拉，係時候食晚飯了。是日晚飯要算自己掏腰包最豪一次，兩丁友食左成百六蚊港紙食兩碟意粉，好貴呀！
食完飯基本上已開始覺得累，不是十八廿二的我開始頂唔順，於是開始掃埋那堆小火車同蒸汽船，貪佢有得坐下抖抖。行多陣再掃下商店，已差不多放煙花。其實迪士尼海洋的夜景都算幾靚，地中海港灣望過去真的很有去了地中海的味道。開始見到人霸位後，我跟妹子也求求其其找了個位，向著原案迪士尼裏座城堡方向望過去等待。迷失東京果然係迷失東京，原來個煙花唔係係城堡頂的，係在其後方，但亦因為這個錯誤的以為，自己個求求其其的位竟出奇不意地變了個絕佳的睇煙花位置！無心插柳竟然霸到個好位！太神奇了！
睇完煙花都差不多夠鐘，去番入口等領隊來。玩完一日覺得長此下去，迪士尼海洋都可以考慮執笠，因為無乜人又無乜野玩，再俾佢發展新玩意的空間又不大，不過如果迪士尼個版權都夠佢捱咁日子的話，都可以拖下的。上車時遊原案迪士尼的家庭裝團友大多滿載而歸兼累得睡到死豬般。個個玩到創晒的團友番酒店後就係整頓行裝的時候，因為這群團友明天就要回香港了。我跟妹子Stay Behind的，所以今晚我得好好執拾好行裝同想清楚有冇野遺漏，但妹子也是累得很快睡到死豬般……… 繼續內文
行下行下轉眼間又兩個鐘，行去HELLO KITTY LAND的購物部，感覺同行入香港任何一間Saniro專門店實在找不到多大分別，尤其是大口仔的東西比香港還要小，有冇攪錯！也基於同香港Saniro幾近差不多樣又裏面的東東大部分Made in China，所以HELLO KITTY LAND的收鑊係零。行到十二點四匆匆衝出HELLO KITTY LAND往多摩市集直奔，發覺呢個市集實在很美，應該早點衝出來行，但現在發現已經太遲，我們的時間只夠衝入麥記買外賣套餐。係呢個時候身體語言又再發揮作用，手指指買個套餐，麥記阿姐也很醒目立刻拿出一個英文Menu給我們指，基本上我們係認圖唔認字，跟著好隱約咁聽到佢堆日文問題中有Set呢個字眼，於是答佢Set-Do！Take Out！呢位阿姐都算醒目，明白我們在攪乜，好，就咁就攪惦個午餐了。
食完麥記上旅遊車向著東京市中心出發，下一站銀座！銀座也是三年前來過了，今次鎖定目標為博品館及佢隔離的BURBERRY！博品館果然有很多有趣的玩具，但價錢同樣地很有趣……銀座BURBERRY仍然是沒有背囊款式的袋袋，不過我都照掃了個手提款的，因為我原來連一個手提袋也沒有……掃貨完畢循例地去銀座嘜頭車站留影，迷失東京主題又再度發揮，唔記得左個車站位置，又向著錯的方向搜索……今次給妹妹找到正確方向，速速影完相番上車向著六本木進發。
終於到了富士急動感樂園，未入門前驚見霧雨中的過山車竟然有開！好一班敢死之士，落大雨還玩那個七十幾米的激激過山車！領隊呼籲我們在入場前先不要被園外的魔鬼商店勾魂，要勾都出場才去，因為要入園醫肚先。富士急在這些年來都算有改進，多了些食飯的地方和遊玩設施，例如鬼屋都細屋換大屋，但略嫌新鬼屋的格局望埋去太新。我覺得最抵死是那張餐券，寫明班工作人員唔識中文，唔好問佢地野，唔係呀化，笑死我了！是日午餐拉麵加炒飯都算不錯。基本上富士急裏面我們都是行行企企買下野。妹子答應了友人去高達館看看，於是又在高達館處逗留一下，鬼太郎館門外裝修好似有點不同了，多加了哈姆太郎區及利佳娃娃區咁囉，好快又完全一個景點觀摩。
終於到了是日行程最後一站，石和溫泉旅館。呢鼠都係三年前來過了，還是跟以前一個樣子，不過今次有床睡，沒得睡褟褟米了。是日晚餐溫泉料理，豪情團友外加魚生船一隻，全團就好像只得我們兩姐妹沒叫魚生船。沒法子啦，妹子都唔多食魚生，得我一條友點食喎！難道似坐對面對母女咁，咁鬼富有食隻咁貴魚生船食剩都唔肉痛咩……溫泉料理裏面有很多山間野菜，唔，芽菜都幾甜，青椒都唔錯，粒薯仔就差小小，原則上我食就無乜問題，問題就在唔多食菜的妹子身上，於是唯有奉獻左碟吞拿魚俾佢……
迷失東京終於正式開拍，是日也是本小姐生日，可晨早就要出發往機場了！搭乘A41時我只想睡覺，完全沒精神去看青馬大橋風光，大佬！六點鐘開車，五點幾就要起身了！去到機場，只見領隊的背脊，他正忙於攪機票，終於等到佢轉身，噢！一位阿叔……可以有靚仔一點的領隊嗎？寄了行李，快快幫襯大家樂攪惦埋個早餐，等到食完早餐，也到入閘的時候了。匆匆走過關卡，跟妹子的迷失東京之旅正式展開！國泰的飛機確是不錯，有電視睇，於是我跟妹子都可以再睇一次The Return of the King了，不過個飛機餐實在係太細了，件甜品檸檬蛋糕又出奇地……難食！算！都係睡覺好過……
一轉眼又到達成田空港，我跟妹子當然快人一步理想達到，排隊過關排得很前，到拿行李時都只見兩、三pair團友，領隊於是叫我們出閘先在機場再等。怎知等等等，等了很久也未見消息，之後領隊告訴我們，有位團友有假證件，要上去辦些手續，請再等等。就在這個時候，在成田空港的等候室裏，竟給我和妹子發現了一部可以上網的電腦，由於這部腦原本的設計是給人玩遊戲的（上網要一百日元十分鐘！），所以Block晒所有Check Email功能，但卻給我們上到ICQ和在留言版留到言，奇怪奇怪！終於領隊浦頭了，原來不是假證件，是一位人兄換了人出境，又不作聲，令他的機票名不對證件名，阻礙了成團人的行程，真是累街坊……
