凌晨一點飛機起飛，這次的首爾之旅可謂玩足五日。大韓航空的機機是沒個人電視看，黑漆漆有甚麼好做？當然是睡！沒想到的是，凌晨機竟然也有飛機餐食！凌晨兩點幾，基本上都係唔多食得落，又唔知係咪珍珠的關係，飛機去到上海上空附近搖晃得幾勁，一路食野一路搖搖搖。大韓空姐的英文也頗嚇人，除了聽到Chicken外基本上聽唔到佢講有乜食，求其啦！轉眼間都感覺唔到有冇好好睡過，便到了仁川機場。此機場比起台北機場要好得多，但比起香港機場還是香港好。爽快地辦好入境手續（Scan左我果頁Passport，噢！還是九年前讀緊中五的傻樣啊）、領回行李並兌換了韓圜，個個團友成了萬元戶！一蚊雞換得百幾圜，真係一出手就萬萬聲！出到機場，見到導遊森美，稍為整理一下行李，向第一個遊玩點出發！
第一站是因凌晨機而加送的海水溫泉，目的是等這班無得睡的團友去Relax一下兼沖個涼執番好個樣。人家的溫泉跟日本的一樣要來個玉帛相見，脫就脫吧，怕你麼！場館那堆用電磁的Locker難倒不少團友，包括阿姨，攪極都開唔到Locker。正當我們脫清光一二三衝呀之際，一眾阿豬媽（韓國師奶）以韓文問候，原來我們班人未沖身就衝落去浸，壞了人家的規矩！有海水溫泉（真係鹹的）、淡水溫泉、冰泉同超熱泉，仲有一堆汗蒸設施，都真係幾Relax，對於那個拿麻包袋入內的傳統韓式汗蒸，眾團友都係開對門見識一下算了，無膽嘗試。玩兩野後趕急沖身，又預備下一個行程了。
首爾之旅第一個景點竟然就是大名鼎鼎的大長今村，雖說個名是這樣，說串了不過是在鄉下地方搭建的宋城、集古村之流的新建千年舊建築。要知道大長今在香港播放的時間與首爾播的時間有一段距離，所以這裏熱潮已過，六月後直頭要拆，我們這班團友可以說是趕及在這條村清拆之前來看看這套電視劇的遺址。
不知是否因為就快清拆缺乏維修，還是這裏真是屬於鄉下地方，大長今村的蚊子可真他媽的多！一落車已經是蚊子蚊子蚊子和蚊子，在裏面行時刻緊記唔好張大個口，惟恐有飛蚊飛入口……由於在下都唔係集集追，所以對部份場景無甚印象，不過以韓式及仿古建築來說，這裏也算不過不失，由大殿到退膳間到獄舍及德久叔那些平民村屋都有，影相也算是一個好景點，唯獨係要小心蚊子！裏面有地方供人試穿長今服飾（當然要收錢），所以也不難看到大量阿豬媽尚宮（還撲向閔大人影相）及波鞋皇帝等……
鴨仔團匆匆參觀完多蚊的大長今村，又到醫肚時間。首爾的第一餐係香菇火鍋，好清淡的一餐，沒料到打後的差不多每一餐都一樣咁清淡，可能韓國人就是習慣吃這麼清淡的菜色。鐵飯兜鐵筷子鐵匙，記住千萬唔好亂將筷子放入個鍋處煮，如果唔係會燙到咀架！話雖清淡，不過加埋泡菜（嗜辣狂徒是也）來食都幾好味。食完就繼續搭車車出發往龍平度假村，途中有小休站抖抖，這裏的汽車小休站流行賣的小食有紅豆餅（香港都唔多見的大福燒餅）、烤魷魚仲有……烤雞泡魚乾！立刻想起家裏堆小雞泡……
搭完兩粒多鐘車車，終於到達龍平度假村，原來這裏是那套韓劇冬日戀曲的拍攝場地，也是冬天的滑雪勝地。由於宜家係夏天，而我又未睇過那套冬日戀曲，所以個人來說只覺得這個度假村幾美，也幾有度假feel。導遊稍為介紹後，團友可以自由逛逛或返房休息（搭完凌晨機散散地），抖抖後就去左今日個Last景點古董音樂博物館。
古董音樂博物館其實係度假村的一部份，裏面收藏了很多同愛迪生有關的古董，那幾座特大號的古董留聲機，實在好勁！再原來這堆古董係韓國一個有錢佬的豪華玩意，更勁！參觀完堆古董，導遊叫我們班團友在樓下大廳睇兩個music video，第一個MV的劇情老土到令我好想睡，但又幾好笑。第二個MV是講明成王后的，原來明成王后係咁死的……一直以來明成王后呢個字眼的出現，只會令我想起阿姐唱主題曲，宜家多一番認識，又有些想看看究竟。
參觀完畢，又係晚飯時間，今日晚餐係韓式燒烤，但點睇都似火鍋多些，但個汁又算濃味，都可能係燒烤。我們的枱枱被安排係席地而坐的矮枱子，幾有特色。飲飽食醉，在度假村超市逛了一會，對那堆全韓文價目表真是投降，眾團友好似認圖畫咁先認到幾錢包野。買了電話咭，打電話跟阿娘報平安，嘩！呢度打電話好鬼貴呀！就咁就完結第一日足本首爾之旅。… 繼續內文
跟隨往年的習慣，今年也選擇在生日的附近出國旅行，一來這個時間是旅行的淡季，團費較平，二來這個時候工作上也較清閒，容易一點請假，但就是因為太淡，原本報的東Ｘ遊竟然不能成團，臨急臨忙之下火速跳槽往康Ｘ，真不愧為阿姨，拍住佢地去旅行一定包攪惦。今年也跟阿姨一家一同出國旅遊，地點是首爾，不過因為表弟的臨陣脫逃，結果是連同阿姨的友人一同前往。
Annual Leave再次囤積居奇，又放假陪家人殺上深圳。今次終於可以行e道啦！好似入車票咁，真係話咁就過關！有了深圳通嘟嘟搭地鐵，去東門話咁快啦！都係幫襯唐宮飲茶，今次記得同法國餐包影番張相啦！好味呀！再加上俾阿爹勁塞野食，真係攬住個肚走啦……食完再去行東門，依舊沒我想要的X畫集，卻有我想要的DVD！太陽廣場買一百送五十呀！買了衫衫再去幫襯可樂店呢！
下一站華強路，今次真係行左入去堆電腦商場。嘩！乜賣電子零件市場咁鬼似D中藥市場？一個個攤位，堆電子零件、電線等似成斤買藥咁款，個個攤位擺部notebook係枱就係開緊工，果堆電子板真係唔曉睇。過兩個街口（條馬路好恐怖），個商場行入去似旺角先達咁款，乜牌手機、MP4、遊戲機、電子狗（係防盜儀器，唔係果隻識Play音樂的狗狗呀）、音響設備等通通應有盡有。逛完電子商場，本諗住今日唔去茂業去萬佳百貨，點知行錯左路，怪不得行極也未到。最後反正都行了這麼久，索性轉去吉之島，途中見到科學館站，真正的深圳科學館了！不過，間野個門面咁殘的……吉之島依舊狂掃超市，蒙牛雪糕超大杯只售2.8！不過咁大杯點食呢，算數吧。買完一輪，向著今次總站中森明菜進發。由科學館站行去大劇院站，途中經過真正的深圳大劇院，原來成日講的那幅小平畫像就在這裏！
由於唔知中森明菜所在大廈的確實地點，行錯了小小路，原來由萬象城行過去就差不多。成間中森明菜都幾大下，兩層樓，仲有鐵板燒專區，下次要去試鐵板燒才成！兩層樓其實也有不少地方係間晒房，聽聞入房座底消費要千二！食物價錢來說，較香港平少少啦，質素普通，不過估唔到平日都咁Full，看來深圳的朋友也很愛吃日菜吧……
公司攪了個周年旅行，內容主力是燒烤節目，為左彌補上次流會的燒烤約會，再加上懶開就懶的心態之下，有人book好晒車又唔駛自己帶野，於是便跟同事們報名參加。懶洋洋的周日要人早起是有點難度的，所以一上車基本上都是想爭取時間KO，奈何有件唔稱職的Part-time領隊，加上兩件像開籠雀般的小朋友幫手甲及乙，沿途都很嘈吵，但這一小點嘈吵及太陽曬係阻止唔到KO之王的KO的，照訓得著可也！
第一站到達的是蕉坑獅子會自然教育中心，睇下花花草草瓜瓜菜菜，漫步於田園之間咁啦，果堆農館漁館郊野館都OK多野睇，堆模型都幾cute，不過人多了點，特別多婆婆嬸嬸……不過本來的預定項目探貝貝變了去這裏，好似都係探貝貝吸引些……
第二站到達的是雲泉仙館，都很久沒去過了，不知怎的鑊鑊去這裏，定必碰到菊花展。我們去的時間，還適逢下午食齋的時間，到處坐滿叔叔婆婆嬸嬸等眾。這麼久沒去過，館外賣奇怪貨品的小攤子竟也增加了不少，農產品（菜乾、豆、蕃薯乾）等還有像夜欄的商品，又是一大堆的人。無記皇帝御用花園個湖心亭等也在這裏見到了，不過季節不對，荷花謝晒了。