分類: 麻麻煩煩

　　最近灣仔區除了地鐵站附近多了檔無人理會的法輪大法反廿三條攤位外，也多了很多現代丐幫人馬，而且這班人馬手法極度……有問題，以下是小女子近日所遇到的其中兩位：
　　嫌疑丐幫一號：在太原街一帶埋伏，專向善心及好「蝦」人士埋手，看準目標後失驚無神彈出來，口口聲聲話成日無食過野問人拿錢開飯，完全搏同情。雖然香港地現在失業率高企，但未至於當街當巷問人拿錢才能開飯吧……初時一心想話俾五蚊打發她走，點知呢位丐幫一號竟然不知足，要拿廿蚊！大佬，麥記二三四套餐五蚊都可買漢堡飽加雪糕了！我一餐午飯仔都平過廿蚊雞啦！食乜呀你，行丐仲咁多要求，激起我把火話唔俾，呢位一號竟然死扯著我件衫唔放手。有冇攪錯，咁咪即係光天化日之下強搶？最後俾了五蚊雞後強行走人……一號仲多謝都無句……
　　嫌疑丐幫二號：在皇后大道東合和地段一帶徘徊，也是向善心人士埋手，尤好後生女仔，因為多數屬好人。也是看準目標無端出擊，初時以為佢唔識路，點知一開口劈頭第一句就係要錢，話山長水遠從元朗、屯門等地到香港鬧市搵女，點知個女上了大陸，現在無錢番屋企又唔識路，要求拿（注意，完全無個「借」字，傳統上問人拿錢都會話「借」，雖然實無回頭）廿幾蚊番屋企。雖然香港至元朗就車費真係幾貴，但個阿婆二號有乜理由自己一條友咁傻又無端端出來找女，而且長者有半價喎，做乜又廿幾蚊咁貴？經歷過一號事件後知道又係那班騙錢怪，一於唔理急步走人，換來是出現了一個在背後不停咒罵的阿婆免費替你下咒……
　　難道我個樣好「蝦」？短期內已遇到這類人兩次了。奉勸各位來灣仔要小心這類人士，尤其是你個樣和善又好「蝦」的……… 繼續內文

　　不要說我唱衰香港飲食業，但昨天跟今天所遇到的兩間食店的服務，真的是絕對需要改善！
　　先說昨天的午餐。前日跟友人吃完日本料理，覺得價錢及美味程度可以接受，便帶了我家妹子去幫襯，等其整牙前吃一下較高級料理，因為我家一向都不會吃這些，出街食飯頂多去快餐店，阿妹整牙後肯定有一陣子沒胃口吃東西，現在多帶她吃東吃西作補償。這間要被我點名批評的食店位在沙田新城市廣場地下名咖啡店對面叫雪Ｘ乜乜的日本食店，說裝修及其他屬一般水平。
　　事緣在等點了茶等待期間，侍應生剛要為鄰檯上茶，但她又不出聲叫我借借，致令其不夠位過，她又捧不穩東西，結果一碗麵豉湯淋了在我身上！之後成店的侍應個個好似傻了般企係度望住我，望乜？仲唔幫手？只得那個姐姐仔立刻拿了紙巾及毛巾起勢幫我抹，個貌似經理都有幫下手o既……不過她們抹完一輪後完全當無事發生過般行開了。唔係呀嘛大佬！雖然你碗麵豉湯唔夠熱，無燙傷我（其實隻手都紅左一陣，因為碗湯始終係熱湯），駛唔駛當無事發生過？第一攪成個客咁理應收錢俾番個折呀？唔俾折頭都算，咁俾杯free drink都不算太過份，作道歉補償嘛，你攪到個客咁喎！都唔俾都算了，幫我換個個位都得啦！都唔識做，真係完全當無事發生！真係激氣呀！上次同班friend去唱K，朋友俾玻璃碎（上手留下，掃唔乾淨）割傷小小，人地個經理立即送果盤及俾折頭，咁先係做生意的態度，客人先會順嘛……呢間舖唔駛旨意我會再幫襯！
　　點名批評食店之二位於灣仔合和中心低層，今天去飲茶下單叫食物竟等了差不多廿多分鐘才上點心，而那些點心只不過是出面擺檔隨時叫的款式，即係在出面拿入來便可以，等了這麼久！明知午市個個趕住食完做野嘛！更離譜是叫了一碟炒麵等了差不多一小時也不來，期間起碼叫人追了四、五次，每次個侍應好似無反應，叫佢追之後好似無回事，最後在甜品都食完叫佢取消之際竟然捧碟炒麵出來！趕住走點食呀！仲要態度非常之差喎！
　　真係學華仔話齋：今時今日，咁o既服務態度點得o架？我都唔係好過份o者？我只係要求些合理的待遇之嘛！… 繼續內文

　　自上星期開始，病況始終反反覆覆，時好時壞，已經乖乖照醫生吩咐吃那些令人昏迷數小時的藥仍未見有很大起色，由重感冒變成嚴重傷風咳，好辛苦呀！
　　最慘番工不能隨時咳嗽，因為這樣會很討人厭，而且因飲水太多時常去廁所，成日行出行入實在唔好意思，但我又不能因這樣而請病假（已經請了一天了），唯有頂硬上，真係好囉命！死啦！食了藥後完全打瞌睡，怎也集中不到精神溫書，就快又考試了……咳咳！一係快些俾我咳到嘔血咁就唔駛番工啦！現在吊住吊住，唔知點算好添。… 繼續內文

　　今早一起身就知自己開始唔妥，一早已包了n隻雲吞，今次仲唔死……未算，今早下大雨，回到公司縱然早已摺起褲腳預備拖鞋，仍然難敵公司的無敵大冷氣，雲吞絕技繼續，喉嚨開始黎料，死直。再加上突然而來的工作死線，好趕呀！又再衝呀衝，現在開始反應遲鈍，個頭開始出現多舊雲團。
　　最慘係，阿爸無端打來說上月未過數。甚麼？唔係呀嘛，過了很耐了喎，點解次次都係人無乜無物之下問人野，申請信用咭又係咁，邊有人行行下街隨身攜帶收入證明……我又點會番番下工無端帶埋存款通知書出街……激死，加上已開始作病，家陣非常火起，燥火出來了，好辛苦呀！… 繼續內文

　　由於多手之故，差點毀壞了一家的美好回憶，罪過罪過！
　　事緣昨天放工回家後，想上網看看，豈料和記唔多生性，竟然發生機件故障，上不了網（枉為寬頻啊），於是忽發奇想，不如將上次的數碼相寫入光碟處吧。一切都幹得非常妥當。但當我把燒完的光碟拿起時，看見其邊緣有「起邊」的現象，心想都是裝飾用的貼紙罷了，不如手多撕下來吧！怎料不撕尤自可，一撕之後竟發覺露出了透明狀的光碟！「死！」心自知不妙，「拿拿聲」塞番隻碟入去，果然！隻碟已好不幸地完全不能讀入，慘了！我最寶貴的畢業相、旅行相通通放晒入這隻碟兼無做到BACKUP，天啊！那晚真係喊到阿媽都唔認得，點算呀？點陪番D回憶俾屋企人……
　　阿爸安慰我話仲有得救，仲打去問人用埋D好「不文明」的方法如兩隻碟一齊放去架機睇下讀唔讀到等也無效……又上不到網問人，心情完全失落至影響第二日番工及玩的情緒。
　　第二日放工回家立刻試搵晒所有所知的方法，幾經翻查之下俾我抄到隻免費的光碟修復程式，竟然救得到部分重要的資料！（好在我多手只撕了邊緣部分小小反光面，所以只是後期的相片毀掉了，早期的畢業相、旅行相還在，謝天謝地！）太好了！這個故事教訓我以後千萬不要多手，還有原來隻光碟咁「化學」，好易死，真係要做多些BACKUP才成。… 繼續內文