分類: 飲飲食食

　　最近每天都給死肥野激死，發覺講多他也不會明白，很多問題不是出現在過程上，而是大原則上。當一艘船的羅盤出現問題，在茫茫大海中沒羅盤掌舵，就算如何努力也不會到達目的地。在航行的過程，可能會無風或不太懂掌帆，但只要還有一雙手，總會有日划到目的地。死肥野做事從來不定目的地或者不看羅盤，只著眼於如何掌帆或安些船首像祈求風平浪靜，那我們這班水手又如何能到目的地呢？因為根本大家都不知道到底要划去邊？唉，懂駕駛船隻固然重要，但有羅盤更加重要啊！又想起Mr Holland’s Opus校長的一番話：「A teacher has two jobs; fill young minds with knowledge, yes, but more imporatant, give those minds a compass so that knowledge doesn’t go to waste.」家下我地成班水手堆knowledge俾佢waste晒啦！
　　今日下午返了公司總部上堂，嘩！很久沒試過齋坐這麼久，簡直坐到腳痺，又唔敢亂動齋聽，聽班茂李高層想當年及講廢話，都幾浪費時間。聽完Talk，跟同事阿Sa去了學整餅，都幾好玩。今次整焗西米布甸同香橙梳乎厘，都幾易整，應該會試下係屋企整，等我得閒去買D材料整下先。兩樣都幾好味，但個梳乎厘似乎甜左D，卻估唔到妹子竟然話這種甜味才合佢口味！
　　星期日食蕉俠侶就大結局了，沒了靚仔楊過看添！不過都係覺得黃曉明在大漢天子時扮漢武帝比較型些，個樣夠串嘛！哈哈哈！… 繼續內文

　　由於是日阿爹有飯局，妹子又脫逃，剩下我跟阿娘兩母女，阿娘當然休業一天，於是放工約了阿娘去第一城那邊食飯。第一城的居民，到底是否不太煮飯？一直以來都懷疑第一城有這麼多食肆，生意一定是搶生搶死，但只要你在晚飯時間去一去第一城，嘩！間間食肆都爆晒棚，由貧窮快餐到貴格食店，都可以坐滿人，實在恐怖！
　　到達大家樂，還幸算幾容易找到位子，阿娘先睇餐牌，回來order要新出品雞燉翅套餐配燒味雙拼，跟住到我出去買票。不知是我還是售票姐姐（售）出了問題，這個order一直重覆又重覆……
售：呢邊呀小姐！
我：兩個新出雞燉翅套餐呀唔該，一個要……（話未說完收銀counter電話響）
售：唔好意思，等我聽聽電話先。（大概是廚房打來叫佢某某菜式除牌）
售：唔好意思，請你再等等……（走左出counter攪菜牌）
售：（返來啦）唔好意思，你要D乜食呀？
我：兩個雞燉翅套餐呀唔該，一個要果個燒味雙拼，一個要果個咩菜膽雞。（此時電話又響）
售：（叫隔離果個收銀姐仔聽電話不果）唔好意思，等我聽埋個電話先，唔好意思呀！（又再聽電話）
售：（半喝罵隔離果個收銀姐仔出去攪餐牌）唔好意思，你要D咩食？
我：（又問？）雞燉翅果個，要燒味雙拼同菜膽雞。
售：雞燉翅套餐，即係要D乜？
我：（唔係呀嘛？）兩個雞燉翅套餐，一個要燒味雙拼，一個要菜膽雞。
售：咁你要D乜？
我：（仲問？）要兩個雞燉翅套餐，咁其中一個要燒味雙拼，另一個要菜膽雞。（講到明兩個囉喎！）
售：雞燉翅套餐，一個要菜膽雞，係咁你要D乜？（終於開始打單）
我：（終於開始明白阿姐問我D乜）你係指燒味雙拼要D乜？乜要宜家揀埋架？
售：（阿姐終於也明白我唔明D乜）係呀，咁你要咩？（始終也不直接問我要乜燒味拼）
我：哦，咁……（弊！阿娘無講明要乜野喎，淨係話燒味雙拼）要油雞拼叉燒啦唔該。
售：（打單啦！太好啦）堂食架可？
我：堂食！呀唔好意思，我八達通俾錢。
售：（終於買到啦！）得啦，你嘟卡啦！
　　經過一輪你來我往，終於去到搶食階段，豈料燒味部大排長龍，於是阿娘的燒味雙拼再度延誤，也加上事先無同阿娘溝通個燒味雙拼，要走埋去同阿姐講唔要油雞改要燒鴨，等左成十分鐘終於有得食啦！菜膽雞同燒味只是好一般的貨色，隻雞仲要細得可憐，至於雞燉翅都尚算足料，湯幾濃幾甜，翅都OK足數，三十幾蚊算係咁啦。食完飯經過隔離宋家皇朝，不知怎的門口有一打以上人物示威抗議，話老闆欠薪，現場還有足一打食Q加警察看守，而又結果，第日上左報紙了……… 繼續內文

　　終於食晒麥記新推出的清新滋選三款烤餅及乳酪，若將熱量及膽固醇置之不理，只以口感而言，我覺得麥記都係做番漢堡包好過。
　　雞扒烤餅：三款烤餅中最好食的一款，醬汁有小小酸酸地，幾能吸引食慾，雞肉都算嫩滑，塊車打芝士夾左落去都唔覺得太滯，配合上來幾好味，但同麥記中最愛食的雞腿包比起上來，仍有距離。
　　韓式牛肉烤餅：韓式燒汁原來有少量辣味，但堆牛肉覺得極度鬆散，無乜口感，基本上食唔出有乜牛肉味，不知是否因為選用之牛肉質料太差。燒汁量尚算可以，但也因為牛肉太鬆散，未打開包裝堆牛肉已跌落包裝紙底，咬個烤餅時乜牛都幾近咬唔到。
　　黑椒豬柳烤餅：黑椒汁量不足，配襯這類比較乾身的烤餅實不太適合，豬柳咬落去比較乾身及老，而且黑椒汁配那堆生菜及紅蘿蔔絲不太夾，呢隻配合可算三款烤餅中最差的。
　　蜜桃藍莓乳酪：試過方知難頂，仲要十蚊咁貴！堆乳酪食落實在有點……食緊漿糊的感覺，堆藍莓也完全唔惦，蜜桃也不甜，反而覺得有點酸酸地，成杯野最好食可能係堆燕麥片！沒錯，乳酪食完一定比食雪糕來得健康及清淡，但呢杯野真係幾難食。俾我選我寧願要回士多啤梨雪糕新地，肥就肥吧。
　　總結，就如開頭所講，麥記都係做番傳統的漢堡包算吧。… 繼續內文

　　有睇開我日記又或識我的朋友，都知我經常幫襯屋企附近的太興餐廳，呢間餐廳都可算是伴著我在新居的日子。記得當初搬去愉翠苑時，附近可說是一片荒蕪，甚麼商舖也沒有，連最基本買份報紙或者買罐汽水都要步行十分鐘起碼至第一城才能解決，而呢個時候，太興就已經存在了，可說是伴著愉翠苑的成長。太興雖然是一間平平無奇的餐廳，可其出品無論是西餐、中菜、大大份鐵板都非常有水準，非常美味而價錢也適中（要食豪些咪貴些囉！），款式又多，伙記勤快有禮，雖然成間餐廳得兩個伙記，但接待客人比商場間五、六名伙記的同級茶餐廳還來得快及有禮貌，真是一間非常高質素的餐廳。可是，今晚是太興的最後一夜了……
　　自從太興隔離的同名太興酒家在某年回歸後失驚無神摺了以後，太興餐廳會摺的消息不絕於耳，直至大約一周前老闆終於承認因為業主不肯續租，所以無奈結業。業主不肯續租的原因，聽聞是想將太興、隔壁空置了的原太興酒家及樓上一個一直空置的舖位合埋租給中聯辦。抗議呀！又不是中旅社，開一間中聯辦又唔食得，開來把鬼！快D叫長毛去抗議示威呀！今晚是太興的最後一夜，多名熟客都前來光顧，包括我們一家在內。晚餐仍然維持水準，客人們都依依不捨地拍照留念。一想到過往太興陪伴我們的日子，就越是不捨，尤其是去年阿爹阿娘去旅行時，我跟妹子在太興渡過多少晚的晚飯，現在太興要結業，真是對其難捨難離……
　　老闆及老闆娘，記得擇地重開時要叫我們去賀你們開業啊！… 繼續內文

今日是母親節，可是仍然要上堂……給了學費，無道理不上。不過始終難忍那位名師的無條理教學方法，如期上堂釣魚，不如早點回家。拿回家厚厚的一大堆筆記，有機會在考試前看完嗎？這仍是一個未知數…… 　　既然是母親節，就請了媽媽到樓下的茶餐廳來個母親節大餐。樓下的茶餐廳實在太神奇，西餐出奇地「正」！答應了老闆娘將她們的出品放上網，就讓我介紹下今晚的菜單： 頭盤：日式廚師沙律 　　這個正到爆！點解連青椒都咁好味？番茄仲正，妹子當然雞絲及火腿最正（食肉怪！） 湯：田園南瓜忌廉湯配大蝦 　　這個我沒試，但看不太飲湯的妹子也喝到照鏡，我想一定好正。 　　主菜：神戶牛尾鍋配香菌烏冬 　　個湯好甜，牛尾炆得好好，連湯都俾我掃埋，媽子就食晒所有蔬菜！ 甜品：芝麻紅豆慕絲 　　老闆娘送多個，又係好正，繼芝麻紅豆雪糕後又一巨獻！ 餐飲：凍檸茶 　　這個……差不多啦！ 　　另外，我的主菜是這個： 金菇芝士釀雞胸拼南瓜牛油飯 　　點解都係咁正？好鬼好味呀！ 　　結果這篇變成了美食介紹……記住牛皮沙太興餐廳，有機會記住要去試下！

… 繼續內文