分類: 渾渾噩噩

　　話說星期日晚正在邊玩緊NDS《The Sims 2 – Castaway》邊睇緊《一擲千金》許冠文vs張堅庭兼邊MSN中時，友人MSN問我家後山火光熊熊有何感想，我的第一個反應竟然是：呀？乜我後山火燭咩？掛住睇電視掛住玩，完全無留意新聞，加上我家雖然對住廣源村，卻不是望住起火那邊，所以無留意到。經友人提起，立即行出電梯大堂（因為向著山火現場）看看，嘩！真是火光熊熊，由於住得高，火龍彷彿就在隔壁，並傳來一堆乾柴烈火燃燒中的啪啪聲。由於風向並非向著我們屋苑，又不近民居（插桅杆村、牛皮沙村直頭在山腳），沒多理會便回到電腦面前跟友人繼續MSN。「唔怪得求先去廁所時聽到D啪啪聲啦！」這句實話結果換來友人的四隻大字：有冇搞錯！後欄火燭都唔知……
　　今朝一早，手電失常地沒有響到鬧鐘，卻被載水彈的直升機聲喚醒。單單是食早餐期間的廿多分鐘，已經看見直升機來來回回好幾次，而且飛得比對面汽水廠還低呢！結果山火在十一點幾終於被救熄，一切回歸平靜。
　　順帶一提，掛左三個幾星期的寒冷天氣警告終於落波，氣溫終於回升至十五度以上了！這個藍天行動雖然說要讓人感受一下冬天，但凍咁多日真的好難頂。另今日試過美心的日韓定食，個韓式炒粉絲除了採用韓式粉絲（粗一點？）及有芽菜外，感覺不到甚麼韓式，份量差不多，午市就沒有試人參雞湯，不知道除了韓式炒粉絲外，還有甚麼韓式食品？但總體來說，加左價呀！唔抵食！… 繼續內文

　　近日香港的熱門話題，非蝙蝠俠來港拍攝莫屬。荷李活的大製作，睇中香港美麗的夜景，決定叫蝙蝠俠來香港玩番轉，去完擺花街，又去玩下國金二期，仲要係維港上空兜幾廿個圈，這些難得一見的大製作雖然真是幾吸引，但圍觀的人群那一種有少許失控及羊群心態的舉動，似乎有點誇張。美國眾多英雄人物，在下雖最喜歡蝙蝠俠，不過人家都係打份工拍戲搵餐飯食，用不用圍那麼多人群？天天新聞報導那些拍攝蝙蝠機的市民，還比真正拍攝的人多，那舖天蓋地的報導，我卻看不到有任何宣傳的意味，有外國大製作這麼勁可推銷香港，那怎麼新聞報導不在這個方向多加努力？我只覺得，風光的背面，那種愛出風頭但缺乏內涵的感覺，有點討厭。
　　下周日就是四年一度的區議會選舉，但大眾的焦點不是落在蝙蝠俠處，便是落在港島區立法會補選的太太之戰身上，似乎對是次選舉著墨不多。本區今次有兩名候選人，一是由劉馬仔晉升至阿俊的現任議員，挑戰者則是隔鄰區議員的助手興哥。起初接到那堆選舉刊物，完全對興哥摸不著頭腦，後來才發現，我們選區及隔鄰選區互相派出助手過對方選區進行武將單挑，看看這個單挑結果如何吧！不過，選舉日在下有事務在身，有機會無法投票，睇下情況如何。今天回家路上，就看見雙方隔馬路進行拉票工作，睇落有點似楚河漢界，雙方鬥搶客，甚有氣氛，看來本周都會繼續見到如斯情況。
　　題外話，SURVIVOR叫人食埋果堆毛蛋，都幾核凸同幾嘔心下，好難怪人家吃不下去。公司發生了不幸的517事件，會計要做DOUBLE ENTRY，個爛鬼SYSTEM真係做左DOUBLE ENTRY，不過係一大堆ENTRIES變左DOUBLE咁入，今舖真係「DOUBLE」ENTRY囉，仲未知點收科，又給堆IT人點來點去，唉。… 繼續內文

　　今早起身看新聞，才醒起今日又是拼埋是070707之日，不過是日依然是無無聊聊地渡過。上週買的NDSL仍然努力打打打中，對於遊戲白痴的我來說，擁有一部NDSL已經是一大進步，目前嘗試著玩超執刀（正在拆彈那關玩到發火）、Cooking Mama（玩到懷疑是否Touch Screen反應遲鈍）、雷頓博士（解唔到堆日文題目，又話漢化版？）、逆轉裁判4（對白鬼死咁多，唔想再按掣）、Lost in Blue（成日食唔飽，遲早餓死）、Brain Training（得閒咪Train下）及右腦達人（玩到話我右腦退化，大煲！）。
　　午間看新聞時話外國人認為三條七是大吉，所以今日有大量人結婚。朱處長閃閃縮縮地走佬之照，不知今次又搞邊科，八卦報紙又要刊幾多日大版港聞。名牌環保袋都唔知搶黎做乜？另外之前威記化療失誤事件個女仔終於過左身，覺得有點傷感。再另外，從來也沒想過，會有港人去剛果旅行，還跌左落火山，真係估佢唔到，不過跌落火山喎！兇多吉少啦……
　　跳完Aerobic去了一城食飯，超人多。後來阿娘說今日是小暑，阿爹補多句：「大暑小暑，有米懶煮」，於是今日懶煮的一家齊齊去了大家樂食冬瓜盅。回到家中，跟爛鬼Notebook搏鬥足一小時，LOAD一個PDF足足LOAD左半小時有多，最後忍受不了熄機再開，有冇搞錯！今年一定要換過部Notebook！
　　回帶K書本週因NDSL強大魔力影響下近乎完全停頓，積存Prison Break六集、Ugly Betty六集、交響情人夢卡通四集、Death Note卡通兩集、The Closer兩集及其他雜項，約十本小說及圖文書。還有最最重要的，本週是偉大的作文週，周年員工評核報告五份未寫，同心愛香港篇文未作（已有IDEA，試試睇下有冇機票），總之作唔停。
　　好，七七七之日就由作文開始結束其無無聊聊極度頹廢的一日吧！… 繼續內文

　　昨晚正在上網回帶的時候，阿Sa SEND MESSAGE過來說跌左架昂平纜車落黎，嘩！唔係咁大鑊呀嘛！開左無幾耐，點會跌得架車落黎架！原來好多人也跟我有同樣觀感，大家都不約而同地問：點解會跌得落黎架！嗱嗱聲開電視睇新聞，真係好事不出門，壞事傳千里，個個台都影住架跌到散左的車車，跟住再加上多段資料報導，例如昂平360之前的故障事故，及外國的跌纜車新聞等，真係本來唔驚，睇得多都驚啦！仲要剛剛才停了三日年檢，真不知這是搞甚麼。
　　回想起之前10月尾，為食自助餐而搭過昂平360，那時的感覺也不是很差，還覺得這項工程偉大又厲害，跨山渡海，阿爹還計劃下次朋友來香港，帶他們去搭昂坪360及食自助餐，覺得行程安排正又有特色，豈料現在變成這樣，睇怕都有排至可以調查完及恢復市民信心搭了。到時，不知是否要權權帶三司十二局去搭搭，以證安全呢？… 繼續內文

　　今天收工回家上網Check Email，竟然見到有個Email話我得獎。一向對這類話你得獎之後其實係廣告等的Email懷有極重的疑心，心想唔係又騙人呀嘛？打開來看，竟然是Yahoo!告知蜘蛛俠個比賽抽中左，叫我去領獎。甚麼？到底我是何時參加了蜘蛛俠個比賽呀？毫無印象。抱著都無乜損失的心態之下，去了Yahoo!找門口姐姐拿了個獎品，是一張好大也印刷非常精美的蜘蛛俠3海報及一個同樣圖案的膠File，靚就真是是很靚，但實在是毫無用途！我那來這麼多地方掛這張海報！這簡真是戲院用來放燈箱的Size，真是雞肋，食之無味，棄之可惜！… 繼續內文