分類: 生活

　　又不知怎的傾談之下，昨天突決定放假半天去消閒一下，於是一班朋友仔就偷得浮生半日閒去了奧海城玩了半天。玩了一個保齡下午茶餐，本小姐果然不負「落坑王」的美譽，擁有超過一打的落坑……豈料朋友仔都不弱，三人完成十球之局後分數加埋總算剛過了一百大關……
　　接著又終於看了Big Fish，好一個吹水王的傳奇，兒子最尾吹的故事有小小感人，但我們一行三人覺得現實生活中也遇著一個這麼吹水的人。正當看完戲等位吃飯大家無聊繼續吹水談論現實中的吹水王之際，撞鬼事情發生了，呢位現實吹水王竟出現在眾人眼前！有說「日頭唔好講人，夜晚唔好講鬼！」時已日落西山，咁都撞得咁正，呢位肯定係鬼來的……呢位吹水王平時在公司已經聲大夾無論點，每次出現我都想向上司申請買耳塞，因為實在太嘈。今次居然俾我們撞鬼撞得咁正，真係要去作個法驅一驅邪至得。
　　卻說上回出現在對面大廈天台的神秘燈號今晚又再出現，還有一大班人又跳又唱，肯定係UFO招魂大會……嘈住晒，實在好想隻飛碟盡快出現接他們走。用望遠鏡掃一掃，人家竟然在天台開緊World Manager Meetings！雖然你們很開心，但不是人人也這麼欣賞那堆懷舊金曲，下次麻煩將音量收細……… 繼續內文

　　話晒自己讀會計時科Finance都拿過A+的，惜現在差不多全俾番獎勵先生，真是慚愧，於是在不知怎的情況下，決定下定決心溫書，不再做投資羊小姐，乜都咩咩叫……第一課首先找番筆記睇下Option、Future同Warrant的分別。
　　Option可分Call同Put兩種，根據筆記個定義為A contractual agreement giving the owner the right to buy/ sell an asset (Stock, Stock Index, Currency) at a fixed price on/ during a period up to a given date，仲有分American同European兩種（開始迷失中），用Put-Call Parity去定價（即刻浮出公海完全迷失）……再據友人提供，Future同Option差不多，但Option係定於一個價位來預升到乜價位芸芸，Future就係定一個價位然後估升或跌。
　　Warrant為Securities that gives holders the right, but not … 繼續內文

　　呵呵呵，又係八卦迷信時間，本小姐對這些八卦無聊之事最具興趣，今期方向日報又玩新野，我當然又不執輸地照玩可也，測試結果如下：
　　內在性格為八號仔，原文「性格健談，天南地北、上至天文下至地理的話題無所不談，但說話很有分寸，不易得罪人，是一個值得信賴的人。」都幾準，的確好喜歡雞啄唔斷，但我說話有分寸嗎？不知道……值不值得信賴更加不敢說……
　　外在性格為四號仔，「性格謹慎，凡事都深思熟慮，而且實事求是，做事非常穩陣。」唔，實事求是係對的，深思熟慮要視乎情況而定，我個人比較轉動得快，一時可以好深思熟慮（即係猶豫不決），一時又可以好快作決定（即係衝動囉），咁叫唔叫做非常穩陣呢？
　　整體性格係三號仔，「性格樂觀，凡事都向好的方面想，比較喜好玩樂及自由自在的生活，熱愛藝術。本身極具魅力，對異性尤其有吸引力。」本小姐對最後那句抱持超不同意態度！我都好想係咁……至於喜好玩樂及自由自在的生活，絕對正確，藝術呢家野，如果電視、電影同漫畫都劃入藝術呢個範疇，咁我都算熱愛的。樂觀都可以咁講，我的性格可以好快大起大落，呢一刻被完全擊沉，五分鐘後可以因為發小姐脾氣突然回升至頂點，問你怕未？長遠拉曲線來看都算屬樂觀一面。
　　好，玩完後覺得呢個占卜（或性格分析或心理測驗）都係差不多，同之前講的差不多，似玩完自己分析自己差不多。… 繼續內文

　　「呵呵呵，唔好提！」本身並非本人金句，而是隔離部門某人的經典金句，但非常合用，以後有乜事找我都係呵呵呵！有乜爆鑊野都係一樣呵呵呵！
　　「我係讀會計架，唔係讀電腦！」如果我係讀電腦的話，就唔會找份會計的工作啦！如果我係讀電腦的話，我就會去考CISA唔做會計啦，我的職位係做會計的，唔係問電腦hotline，唔該大家以後唔好一有乜Microsoft Office問題都來問我，我無考Office張Cert喎，熟都話幫你一、兩句，最激氣係那堆三唔識七的人打個電話叫得出你個名就問長問短，阿姐，我好似未見過你架喎，邊位呀？
　　「咩呀？」羊小姐格言，老闆問東西又係咩呀？聽到人言談些甚麼而自己又略知一二都係咩呀？聽到別人講自己壞話都係咩呀？不過以上的咩呀音調會有所不同罷了。
　　「得罪本小姐實無好下場！」同妹子一樣常掛在嘴邊的一句口頭禪，用於發洩時用，你以為我係咩呀？得罪我？以後有排你受，得罪女人都係無乜好下場，因為女人係好小氣的！雖然我只係公司內一個小小的小職員，但我要同你玩對抗我可以玩得好徹底的，一言九頂係我的強項，一個小職員要同大老闆玩對抗都有得玩架，睇下你損失大定我損失大？
　　「打爆你個頭！」都係發洩時自言自語用，係以前老闆變態經理一號的名言，家下學左呢句野，睇怕我都有潛質做變態經理……不過在俾人激度極度就爆時，呢句野真係減壓良方，怪不得變態經理一號成日都講……
　　「假紙遞俾他，須要理由嗎？」回應鵰兄唔俾人放假的命令，簡直豈有此理？真係有事情這麼趕緊都算了，無緊事做也不俾人放假，可惡至極，最憎人磨爛蓆，尤其係公司的人！明明可以辦公時間辦好的事，硬要拖到辦公時間之後才做，這樣做目的無非想人覺得這個人很勤力，做到超時工作也不計，老闆你喜歡這樣搏出位是你的事，我可不願做三陪小姐陪你超時工作，尤其係無必要要咁做的時候！
　　「食蕉啦今次！」自怨自哎時用，通常踩中陷阱或爆鑊時會用……
　　「無得做無得做！」舊同事臣哥名句，我都學埋佢，呢句金句用的次數正逐漸上升，間中會變奏為「做唔到做唔到」，用於催眠鵰兄之用，對於一個Yes Man來說，係時候要有一個人同佢Say No，因為有些事情做唔到就係做唔到，你點屈同點壓始終都係做唔到，一早同你講定做唔到好過被屈到結果做唔到的時候再講，係咪臣哥？
　　「又做假帳！」老闆們為了將盤數砌得好好睇睇，經常將那堆adjustment做來做去砌數，同做假帳根本就無分別，實在好乞人憎，雖然我呢個小職員都係無乜道德可言，但睇見他們那盤為砌數而砌數的爛帳，就簡直咬牙切齒！特別係要我們這些小職員幫他們善後收拾殘局的時候，今舖真係爆鑊好容易……
　　「乜太之嘛，我屋企都有兩件，有乜好驚？」寫字樓班男高層無鬼用，個個都驚姑姑乜太，有乜好驚喎，乜太之嘛，我屋企都有兩件，其中一件仲麻煩過佢多多聲，有乜好驚，真係廢柴。
　　好，今期發洩完畢，感謝大家看完我的一大堆廢話。… 繼續內文

　　繼去年的三三三之日，今年的四四四之日也要來個紀錄才成！零四零四零四正好是清明節，也是星期天，所以明天星期一有一天補假，許多大大小小的朋友今天也郊遊去也，我也乘著這個空閒的日子去舒展一下筋骨，踏著我的老爺車去一去馬料水。
　　回想起我這架老爺車，買了也有兩年的日子，但踩的時間很可能一星期也沒有，放得太久沒動，所以有點毛病，如剎車時會發出高頻率叫聲，前呔有點漏氣，車身有點氧化等，不過，它也還能捱到一段距離。基於老爺車的毛病，我也不敢踩得太遠，只踩到馬料水就收手了。今天天氣不錯，不太曬，所以很多家庭也踩車郊遊去。但我奉勸平日無踩車的朋友，千萬不要租情侶裝或家庭裝的車，因為這兩類車重量驚人，也不易控制，短途玩玩還可以，但以此類車種踩去大埔，我想你落車那一刻已想死了……
　　馬場後的一條跨城門河的橋仍然人頭湧湧，魚蛋檔生意超好，維修單車的伯伯也生意很好，但我覺得實在搵笨，補呔還可以，其餘的所謂維修基本上我有帶單車用士把拿我都可開檔，咁就收人幾蚊，好貴。也在這魚蛋檔外碰到了單車特警，單車特警的單車呈鮮黃色，三位阿叔級警察頭戴頭盔，著得有點像交通警，我想他們收阻嚇作用比實際作用為大。往馬料水方向經過了水警基地，以前在這裏已可望見馬料水碼頭，但現在竟然中間填海填到座山咁高，完全阻擋了視線，簡直可惡，破壞大自然及景觀！
　　終於踩到馬料水再去，整條單車徑被科學園及吐露港公路夾在中間，可恨的科學園，阻礙了整條單車徑的景觀！尤幸馬料水的新舊碼頭還在，我還是喜歡舊碼頭多些，某年被颱風吹甩的屋頂仍舊是老模樣，也有很多叔叔伯伯在釣魚，那隻古惑的海鳥在我替牠影完寫真後，叫埋兄弟向我飛來，嚇我一跳！也在這碼頭發現，由這裏出發去東平州的話，要八十個大洋！往塔門的話十幾蚊有交易，但是日尾班船在三點已開出。
　　就我個人來說，對這個舊碼頭有份獨特的偏愛，站在這裏遠眺馬鞍山及吐露港一帶，加上清風送爽，令人心情愉快。今天風勢也算強勁，踩來的時候是逆風，很是吃力。今天也很無聊地跟班少年一般，在落斜坡時全不按剎掣，瘋狂地衝入隧道再一股作氣地衝上去，感覺很爽，但事後就後悔。本小姐已不是十八廿二，這樣玩法很快沒氣了……回程時順道一遊了那個單車歷奇樂園，很不適合已沒氣衝刺的我玩，因為不停上坡落斜……算吧，看到我喜歡的碼頭還未拆，已經很高興了。… 繼續內文