分類: 生活

　　話說某日放工繁忙時間，本小姐在金鐘站由港島線轉荃灣線並擠上了一架準備開往荃灣的列車，由於是繁忙時間，車廂很是擠迫，幾近沙甸魚的程度，這個時候，有一位打著最新NINTENDO DS的打機青年（機青）因為太過擁擠的關係，迫到了站在旁邊的一位中年白領阿叔（阿叔），阿叔似乎為了保護身旁的一位同行女性（老婆？女友？同事？朋友？），唯有硬食這位機青的成個身位。
機青：唔好意思呀！對唔住呀！（依然打著NINTENDO DS，但都算幾有禮貌的青年）
阿叔：哦！算啦！唔緊要啦！（跟住繼續跟同行女性搭訕）
　　接著又有幾個人硬要迫上這架列車，於是又再迫一迫，機青又撞到阿叔了……
機青：對唔住呀！我都唔想架！（估唔到哥仔會講埋出口）
阿叔：我都知你唔想！（繼續護住同行女性）咁又可以點呢。算啦！
　　同站於這個門口的乘客，無不會心一笑，嘟嘟嘟嘟嘟，終於關門，下一站尖沙咀……… 繼續內文

　　由於是日阿爹有飯局，妹子又脫逃，剩下我跟阿娘兩母女，阿娘當然休業一天，於是放工約了阿娘去第一城那邊食飯。第一城的居民，到底是否不太煮飯？一直以來都懷疑第一城有這麼多食肆，生意一定是搶生搶死，但只要你在晚飯時間去一去第一城，嘩！間間食肆都爆晒棚，由貧窮快餐到貴格食店，都可以坐滿人，實在恐怖！
　　到達大家樂，還幸算幾容易找到位子，阿娘先睇餐牌，回來order要新出品雞燉翅套餐配燒味雙拼，跟住到我出去買票。不知是我還是售票姐姐（售）出了問題，這個order一直重覆又重覆……
售：呢邊呀小姐！
我：兩個新出雞燉翅套餐呀唔該，一個要……（話未說完收銀counter電話響）
售：唔好意思，等我聽聽電話先。（大概是廚房打來叫佢某某菜式除牌）
售：唔好意思，請你再等等……（走左出counter攪菜牌）
售：（返來啦）唔好意思，你要D乜食呀？
我：兩個雞燉翅套餐呀唔該，一個要果個燒味雙拼，一個要果個咩菜膽雞。（此時電話又響）
售：（叫隔離果個收銀姐仔聽電話不果）唔好意思，等我聽埋個電話先，唔好意思呀！（又再聽電話）
售：（半喝罵隔離果個收銀姐仔出去攪餐牌）唔好意思，你要D咩食？
我：（又問？）雞燉翅果個，要燒味雙拼同菜膽雞。
售：雞燉翅套餐，即係要D乜？
我：（唔係呀嘛？）兩個雞燉翅套餐，一個要燒味雙拼，一個要菜膽雞。
售：咁你要D乜？
我：（仲問？）要兩個雞燉翅套餐，咁其中一個要燒味雙拼，另一個要菜膽雞。（講到明兩個囉喎！）
售：雞燉翅套餐，一個要菜膽雞，係咁你要D乜？（終於開始打單）
我：（終於開始明白阿姐問我D乜）你係指燒味雙拼要D乜？乜要宜家揀埋架？
售：（阿姐終於也明白我唔明D乜）係呀，咁你要咩？（始終也不直接問我要乜燒味拼）
我：哦，咁……（弊！阿娘無講明要乜野喎，淨係話燒味雙拼）要油雞拼叉燒啦唔該。
售：（打單啦！太好啦）堂食架可？
我：堂食！呀唔好意思，我八達通俾錢。
售：（終於買到啦！）得啦，你嘟卡啦！
　　經過一輪你來我往，終於去到搶食階段，豈料燒味部大排長龍，於是阿娘的燒味雙拼再度延誤，也加上事先無同阿娘溝通個燒味雙拼，要走埋去同阿姐講唔要油雞改要燒鴨，等左成十分鐘終於有得食啦！菜膽雞同燒味只是好一般的貨色，隻雞仲要細得可憐，至於雞燉翅都尚算足料，湯幾濃幾甜，翅都OK足數，三十幾蚊算係咁啦。食完飯經過隔離宋家皇朝，不知怎的門口有一打以上人物示威抗議，話老闆欠薪，現場還有足一打食Q加警察看守，而又結果，第日上左報紙了……… 繼續內文

　　八月開始未認真寫過東西，不是太忙，只是太懶，也沒用心去認真回想自己的生活。現在想起這麼頹廢的生活，簡直不堪回首，不知所謂。也八月頭，只是出現小小傷風毛病，卻也足足病了成個多星期，真是身子弱，得好好鍊練才成！好，首先匯報一下社區新聞，八月開始，愉翠苑街市因為領匯班叻仔加租，攪到雞毛鴨血，紛紛執包伏止蝕離場，只淨下十多間繼續艱苦經營，苦了檔主，也苦了居民，真是可憐……
　　這個暑假雨水可謂非常充足，想享受一下陽光與海灘的機會很少。但當與光同行的日子，卻又驕陽似火，熱到多走一步也不願。今日大雨落不停，黃雨警告了整日，令到家中門口淪為雨傘展示區。晨早出門口返公司拿東西，同事話我短周也撲返公司，簡直神經病（請用國語腔讀出），其實確有小小，但你估我又想的嗎？當你個腦應該一片空白的時候，腦海中竟然浮現工作出事的情景！當你想打機睇書玩的時候，當你沖涼最relax的時候，腦中自動彈出「死定了！」的警示訊息，為了令自己稍為安心，唯有拿小小東西返家以鎮定心神，所以各位同事，絕對不要將我劃為勤奮類或工作狂，其實懶鬼只係求其拿點東西令自己求其放心罷了。也請各位放心，我還未痴線！… 繼續內文

　　一年一度的香港書展又來了，今年當然又去朝聖。由於答允了同事又答允了妹子（舊年佢因為整牙，書展時段得乖乖留在醫院）的關係，今年還入了場兩次！先說星期五去的小試牛刀日，過了六點入場有半價，人卻依然是很多，跟同事走馬看花般匆匆走了叫做一遍後，已經是兩個多小時的光景了。由於要保留實力第日再戰，收鑊一般。
　　下半場於星期六展開，由於遷就妹子放工（暑期工）的關係，在旺角新世紀食完LUNCH才出發。也由於受阿爹的唆擺，選搭了104號車車（早知去聯合才搭，平成五毫一位！），卻又遇著曼聯對港聯賽事，紅隧塞車，結果四點才到達會展！不過去到會展也沒用，給警察叔叔指了往鷹君中心排隊，雖然人龍無乜停過，但這樣繞著幾幢大廈來排隊，入到書展會場已經四點半了。
　　一入會場，人山人海，擠得水洩不通，真的說想行快一點也不行，因為實在太迫人了！我們的要求只是很低，務求整個會場行一遍，但為了完成這個要求，也足足讓我們行了五個半小時！途中經過小食部，受不了肚餓及香味的誘惑，敗家地跟妹子一人半隻熱狗。不過隔枱的小朋友還要厲害，連飯也一併帶入場，正在抓著自家飯盒不停地扒炒飯！這位小朋友的媽媽實在太有先見之明了！可能多得媒體報導，有很多買餸車仔、拖豬、BB車等，令已經擠迫的會場更加連腳也難以放得下……
　　行完一遍，時已十點，場外食肆也都關門，索性回家幫襯波仔叮飯，今趟收鑊不少，主要係妹子的Design書貴，今次敗家了……… 繼續內文

　　響應這麼炎熱的天氣，昨晚不停打瞌睡，未捱到十二點已經前後睡著了無數次，結果一事無成，最後敵不住周公子的誘惑，倒頭大睡。最近工作不算是太趕及太忙，卻瑣碎繁複，小小事也勞心勞力兼勞氣，對住本著「家家有求」的老闆肥仔更加是無佢咁好氣，估唔到日日三娘教子老闆肥仔依然係不思長進，真係無氣……
　　今朝天雨路滑，樓下往廣源方向反了貨車，地上一大灘油蹟又有消防又有警察，阿爹仲叫我出埋去睇野，有乜睇呀？頂多咪又係睇班警察係度做野囉。
　　每年一度給員工寫成績表時間又到了，從前就只會收到別人給自己的成績表，今次輪到自己給別人去寫，真是佩服以前班主任，點解可以諗到四十個唔同寫法去寫班學生？現在我齋寫十份也想嘔，要諗唔同的東西，而寫左又同無寫分別不大的東西，講左好多次，作文並不是本小姐強項。不過作為一個負責任的小小管工，做好做醜都唔好寫得咁求奇，始終Staff Management都係工作的一個重要原素，雖然唔想管人，但既然係自己責任就唔好咁衰……呢個就係我做人的宗旨，絕不主動乃野上身，但一但上身就應該盡量完成負好責任。
　　是日家中新購了一個大雪櫃，高度比我還要高（雖然部分原因亦因為我生得矮），好大的雪櫃啊！以後可以雪勁多凍飲了！
　　也匯報一下書債仍然持續嚴重，清還速度雖然比新債速度為快，但因積存太多，依然睇到嘔。目前睇的書目：看電影05年14期（已經脫了幾期未睇）、交換日記8、地瓜男的純愛日記仲有蝙蝠俠漫畫，新買的Angel Heart都仲未開封，清還書債之長路仍然漫漫……… 繼續內文