周日閒置在家，剛剛才回帶睇完活得很滋味同Monster，熄機準備K書又或午睡之際，被爹爹叫了去大家齊齊研究EXCEL Macro創製更表之法。抬頭一望窗外，雖有陽光，卻煙霧迷漫，一看便知空氣污染指數奇高，天氣很差。又回想起午間新聞說颱風龍王爬左過台灣，一定是甚麼焚風影響，今天又熱又焗，唉，真是躲在家好過。
跟爹爹研究EXCEL很是無聊，他狂問我點解咁樣做唔到人家的效果，卻又不給機會人家去試，怎會曉喎？都唔知係咩問題，不過算啦……就是因為這般無聊，於是就隨口找些話題，例如講下天氣咁啦……「呀，咁好天有陽光又會係咁行雷，呢D旱天雷，天氣真係差了……」豈料說時遲那時快，呢D旱天雷越行越密，還突然閃左一下電，此時爹爹也跟我一起望向窗邊，我還說我有冇眼花，係咪真係閃電，點知跟住就勁了……
各位有沒有看過湯告魯斯套世界大戰，呢個時候的情景竟然跟呢套野開頭堆閃電有D相似！講完呢句我有冇眼花，之後果真再來兩下閃電，之後突然有一、兩秒的平靜時刻，我仲爆左句咩天氣呀！跟住勁了，平靜完果兩秒，突然吹起強風，一股仲勁過十號風球的強風突然吹來，我家所有向東之窗門應風被吹埋，向西的窗卻被強風吹開，廳中房中的雜物被吹倒。被這強風一嚇，正在研究EXCEL的兩人及廳中的阿娘立時將家中所有窗戶關起。這個時候，窗外的天色黑黑沉沉，很是恐怖。說時遲那時快，大雨跟隨而至，已經跑去關晒所有窗門的眾人，正準備繼續渡過閒置的星期日時，卻沒料到強風的程度已經超乎眾人所料……
繼續坐在機前的阿爹，突然呼叫說冷氣機漏水！我忙去看過究竟，竟見雨水像有靈性般從冷氣機、窗邊湧入房中，忙去拿布。沒料到原來除爹爹房外，我房及妹子房也有同樣情況！妹子擺在窗邊的工作紙沒了，而重災區竟然是我房！床頭濕左、窗旁的衣服濕了，水還從窗邊繼續湧入，還恐怖過鬼水兇靈啊！
如是者，周日的節目便是……抹窗抹地大行動，還有晾乾東西大行動了！… 繼續內文
分類: 生活
夾夾、夾麵機
掛著三號風球的長週，番工一開波接到老闆肥仔的電話號召，沒料到同一時間，小強像聲控一般也同時爬出，快些爬番入肥仔房吧！你係屬於果度的，只係上次肥仔房洗地毯你們才逃難的，番去吧！回應肥仔的電召入房，沒料到肥仔係因為寂寞得滯想搵人吹水，天啊！人家要做事的，你吹水找第二個吧。轉眼又到收工時刻，約了爹娘去食飯，不過食飯之前，陪爹娘去了郵局換即食麵清仔產品。估不到現在郵局乜生意都做，自負盈虧果然不同，郵差叔叔同郵差姐姐做得咁甘都係為左幫郵局賺錢錢。
換完清仔床單同夾麵機，去了德米創作料理試食，主因是因為阿娘寄去某節目抽獎抽中了張現金券，月尾到期，在不蝕底的心態下，怎也要吃！否則以「節儉為美德」的爹娘，係絕對唔會去大雞樂大快活美金快餐樓下茶餐廳以外的餐廳吃東西！說回今餐，作為阿娘生日晚宴的前哨戰，今回午市只是小試牛刀。德米的東西也幾特色及好吃，唯一問題係好細碟，看來阿娘生日晚宴要好好部署才成。不過如果係喜歡肉餅的朋友，德米飯（勉強可稱為中式壽司啦）應該會合你口味，有大量不同款式的肉餅啊！當我們看著侍應捧個吉鍋上來說是手唧魚麵時，我看見阿爹跟我一樣，眼中出現一絲疑惑，但又怕露出自己的大鄉里而保持沉默，原來手唧魚麵係會咁上檯的，呵呵！
番到屋企拿出清仔玩具出來玩了！夾麵機其實係一部玩具來的，但同親朋戚友談起時，個個都以為係用來夾即食麵，仲問駛唔駛要麵粉？會唔會好難洗？點知D麵熟未等等之類的問題，真係有點攪笑。夾麵機其實似冒險樂園那堆夾公仔機的縮小版，加番清仔清妹圖案，將公仔變左做即食麵玩具之嘛，唔係用來夾即食麵架！不過部機的設計也幾像真，要入錢錢先有得玩，又個夾同真的夾公仔機一般係無乜力的，所以都幾難夾，慢慢玩吧……
差點唔記得，今日開始又有Survivor做了！估不到Bobby Jon咁鬼Cheap，咁快反白眼，佢同Stephenie真係差得遠……… 繼續內文
敗家之旅
約了人去新城市廣場交收，將不要的東西拍賣套現，豈料擺低四本書，卻又買回兩本新出漫畫，沿途還看見心愛的大口仔2006月曆，仲有美輪美奐的魔女宅急便2006年Schedule Book，無錢袋入袋還要倒貼，真是敗家之旅。也因為這個新城市廣場之行，坐了很久沒坐過的沒冷氣巴士（熱狗），還豪吃了大雞樂的下午茶餐，大熱狗加火腿米粉再加蒟蒻雪糕紅豆冰，飽死之餘還要肥死，真係唔知自己攪乜錯食得咁鬼豪，夜晚還要做節出街食晚飯，真係要又飽又肥咁過中秋了……也因為幫襯大家樂，遇到一個考驗香港服務業人員的盲毛師奶，如果香港多幾個咁人，我睇怕幾好脾氣的人都會被激死。以下係案件重演……
事發當日大約兩點四十五分，本人正排隊幫襯某大雞樂的下午茶餐，因為剛剛落更關係，得番一個收銀姐姐（收銀）係櫃台，這時，一個拖住細路的盲毛師奶（盲毛）正排係我前面準備買野，而我身後排滿了等食大嬸們同等落注（是日跑馬）阿叔們……
收銀：要D咩食呀？
盲毛：（半鹹淡廣東話腔）火腿米粉。
收銀：無火腿米粉喎。
盲毛：我要火腿米粉。
收銀：火腿米粉係配茶餐架，無得就咁叫，你要咩茶餐配呀？
盲毛：我要火腿米粉呀！幾錢？（呢個時候佢件細路開始扭計）
收銀：（開始唔耐煩）都話要配茶餐架囉，咁你要咩茶餐呀？
盲毛：個牌有的嘛，我要火腿米粉！
收銀：無散叫的，要配茶餐架，你到底要D乜食？
（收銀姐姐眼見呢位盲毛身後有一眾越等越嬲的顧客，開始趕客了……）
盲毛：（個仔又再度扭計）唔好嘈呀！咁要茶餐啦！
收銀：你有冇睇個餐牌，有好多款茶餐，你要邊款呀？
盲毛：我要火腿米粉呀！
收銀：你到底要D乜呀？我地有好多款茶餐，你要講要邊款先得架！
盲毛：（就咁手指指個餐牌方向）我咪指左囉，要米粉呀！
（呢個時候我開始懷疑盲毛到底係咪唔識字……）
收銀：（開始被激死feel）我睇唔到你指咩，你到底要乜野呀？
盲毛：火腿米粉呀！我要火腿米粉呀！（開始歇斯底里）
（又係呢個時候，身後等左好耐的顧客開始空群而出……）
阿叔：求其叫個豬扒包死開啦！（呢位阿叔拿著馬經，好明顯開始火起。）
阿嬸：行埋一邊諗清楚先啦！阻鬼住晒！（阿嬸都好嬲。）
哥仔：（粗口）叫咩你呀？
盲毛：（再次指向餐牌中附係茶餐後面寫明加五蚊的火腿米粉果行）我要呢個火腿米粉呀！
收銀：（眼泛淚光）都話左果個係要配茶餐架……
（此時噓聲四起）
盲毛：（借個仔過橋，大力手握著一百蚊紙）我地都係唔食住，我地走！
收銀：（真係流出淚水）我講極佢都唔聽……（抹乾淚水向著下一個顧客即係我，又再次擠出那些微的笑容）請問要咩食？
多幾件呢D咁人，就算做到劉華所謂的服務態度，都係死……… 繼續內文
香港迪士尼樂園之熱
差點忘了近期的熱門題目，暫時全世界最迷你的迪士尼樂園今個星期一在香港開幕，如是者身邊所有話題都全指向迪士尼樂園了。甚麼大排長龍玩遊戲排隊食飯、玩到人嘔晒的太空山，種種新聞都成為一眾茶餘飯後的消遣話題。於我個人而言，這種種都不及發生在身邊的新聞來得有趣，目前想知的還是老闆肥仔苦苦訂番來的入場券，究竟佢拖住兩個仔要排幾耐隊去玩玩……
不過再攪笑的，莫過如樓下某某海鮮酒家為祝賀香港迪士尼開業而推出的歡樂全包宴，個菜牌睇完我簡直佩服改菜牌的人兄……
★ 米奇芝士焗海中蝦（送伊麵底） ← 到底同米奇有咩關係？難道蝦蝦會戴米奇老鼠帽？
★ 唐老鴨胸大拼盆 ← 劏左唐老鴨仲要淨食鴨胸？但唐老鴨好似個籮肉多D。
★ 公主碧綠花姿蚌仁
★ 夢幻千絲花姿球 ← 邊套野有夢幻二字？
★ 紅燒維尼四寶翅 ← 關小熊維尼咩事？有蜜糖？還是有熊掌？
★ 鬼馬蠔皇鴛鴦鮑 ← 點鬼馬法？
★ 海底奇兵大石班 ← 又再次將卡通人物生劏……
★ 巴斯沙薑走地雞 ← 同巴斯又有咩關係？巴斯光年雖然有對翼，咪當人家是雞……
★ 雪姑金銀饅頭 ← 原來白雪公主係整饅頭的！
★ 愛麗斯甜品 ← 即係有咩甜品？… 繼續內文
拼圖樂
星期日妹子親自開啟了一千塊夢幻街少女拼圖，開始全力協助砌砌砌，齋砌條白邊已經砌了成個鐘。這幅砌圖還要是比普通的一千塊來得較細，因為它的size只及平常的五百塊一般大小，可想而知這盒一千塊大約只等如平常的二分之一了。晚餐前試兩塊、早餐又砌兩塊，砌圖終於在今早由妹子接力完成，功成身退……
