今日AM730登了一則外國新聞，加拿大一公司研發出一種近似隱形的布料，如果研發成功，真的如哈利波特的隱形斗蓬一樣可以隱形。就著這單新聞，今日公司內展開了一場無無聊聊的討論。
同事Ａ：如果真係畀件隱形衫你，你會諗住做乜呢？
同事Ｂ：如果畀我隱形，咁咪可以去偷窺人地沖涼囉？
眾同事：乜你咁架，一諗諗埋晒堆衰野架。
同事Ｂ：乜喎，睇多拉Ａ夢成日都係諗住偷窺人地沖涼啦！咁隱形咪可以免費搭巴士囉。
同事Ａ：吓！乜你要求咁低，淨係免費搭巴士就得架啦？
在下：家下你隱形咋喎，唔係穿牆，隱咗形但你一樣塞住個位，咁人哋咪坐落黎囉。
同事Ｃ：隱咗形就可以免費去大家樂食野囉！
同事Ｄ：大家樂賣飛架喎，隱咗形點買飛呀？去櫃檯見鍾意食就攞？
在下：咁咪好恐怖，啲人見啲野食會自己飛下飛下……
同事Ｄ：去銀行偷錢咪無人知囉！
在下：都話係隱形而唔係穿牆囉，點鼠入去櫃檯偷啫？
同事Ａ：畀我隱到形的話，一於免費搭飛機！
在下：隱咗形你點通關呢？又偷偷地鼠入去？
同事Ａ：唉吔！唔得喎，隱咗形咪空姐咪唔派飛機餐囉？
同事Ｃ：咁鬼煩，隱形都係留番軍事用途做間諜算啦。
討論固然係無聊，但亦可看出我們同事幾咁知足，隱到形都係免費搭下巴士食個大家樂就算了，都無人話去搞一番大事，亦無人諗到可以搞甚麼大事，真係得啖笑。順道一提，今日係本世紀最後一個年月日相同的日子，也是同事Ｃ小姐結婚的日子，祝福同事甜甜蜜蜜，白頭到老！