I CAN’T SECTION

  平日在公司,時不時會接到些內部查詢電話,查問某些交易的入帳方法、公司內部指引、帳單銀碼計算等等,每當電話響起,都會很自然地說:「喂!Account」然後等班同事問野。坐在隔鄰的同事,時常笑我發音不正,說成是「I Can’t」,其實,有些情況之下,又真係愛莫能助,幫你唔到,I Can’t Help You。
  近來金融海嘯,好多客都話周轉不靈,欠租情況屢見不鮮,欠租扣按金、提前解約數目也有不少,租務部常日打來問可以點,仲可以點呀,公司雖然資金周轉尚無大問題,但欠租就是欠租,打來Account問完都係要去提前斬租約,扣按金,查錶截數,真係想講,唔好再打來問,我們餵雞部職位低微,無酌情權,打來都係I Can’t Help You,無謂再打來求情啦,我們深表同情,但無計,夠膽打去畀Director問囉。
  相對於租務部,銷售部近來電話都唔少,都係因為金融海嘯,都係因為周轉不靈,做Consignment Sales的同事紛紛接到堆客要求由之前的完成一個Consignment周期結算一次,變成每週結算一次,就算錢唔多都有幾多拿幾多。就因為這樣安排,令平時每完一個Consignment周期才做一次的工作,變成每週一次,工作量自然增多。至於有幾多錢又快幾多呢,不要忘記我們都有為數不少的信用卡過數,我們一樣是要等銀行過數才有錢做結算,日日打來問有幾多錢返到做結算都無用,無錢無數過,都要Sell得到才有錢的嘛,Sorry Can’t Help。
  撇除這些金融海嘯引發的問題,仲有一些事情是我們愛莫能助的,這就是蠢人蠢事!實在不明白為何公司會請了一班這麼不懂動腦筋的員工,那堆蠢人蠢事實在蠢得得人驚,隨時嚇死你。就好像今天,我老闆接到一張Fax後嚇得立即從房中彈出來,點解呢?話說我們公司每半年會出通知,提醒各分舵係時候幫堆夾萬轉密碼,轉完密碼後將密碼交到總部收存。豈料這位分舵主管,轉完密碼以後,竟然將密碼用普通Fax到總部,我老闆看到這張Fax當然嚇到彈起,蠢材呀!叫你交到總部收存,是要入晒信封Seal埋的呀,如果唔係駛乜叫做密碼呀,蠢到咁,點幫你呀,I Can’t。

發佈留言

發佈留言必須填寫的電子郵件地址不會公開。 必填欄位標示為 *

*