由於閏年關係，突然多出來的二月廿九日成為一個特別的日子。有乜咁特別？特別在今天特別多野做囉！月尾要埋數，本已經是一個比較忙的日子，可奇怪事也往往排山倒海般在同時間發生……
首先，本公司自認好勁好厲害好叻的發達窿收費機器，過得到千禧年，卻不能過渡閏年！今朝收到公司電郵說部份發達窿機器記帳部份有可能在二月廿九日出現問題，命令售貨部同事今晚不要上載發達窿帳目，待明天才補載帳目。睇到第一時間的反應是：有冇搞搞搞搞搞錯呀！四年一閏都頂唔順，還要其他部份無事，只是帳目上載部份有問題，真是嘟嘟嘟嘟（爆粗自我嘟嘟），月尾埋數先來壞機，真是離嘟晒大譜！只望求神拜神，明天補載時沒出現問題，否則有乜冬瓜豆腐漏咁幾部收銀機數上唔到，仲要月尾趕埋數先來玩野，實畀總公司疲勞轟炸。
總公司學人玩內部監控，請班PKMG人落黎睇我們運作，本來招呼柯跌打係一般指定額外食鐘工作，可柯跌打早唔落遲唔落專登揀月頭埋數最嘟忙果幾日落來搞搞震，試問邊件友得閒招呼佢？經理實唔係一同人打完招呼就點左我去招呼咩？下面班細的又要做日常工作，實係我這些夾心階層去招呼佢地啦。人未到今日就打來叫我地影定堆野畀佢地等佢地玩WALKTHROUGH，唔得閒理佢地，等佢地自己WALK啦，難道我地WOK咩。
總公司除了派柯跌打落來，今日唔知又做乜無端端問各分公司旗下OT情況，CLAIM錢就話公司有記帳，補鐘呢家野就麻煩。公司政策補鐘的話由每組經理自家搞惦，我組經理又完全求其地將補鐘記錄亂FILE，實不知道去那裏堀番堆補鐘記錄出來填RETURN。最後，在經理的催促之下，求其作左一些（靠個別員工的爛紙），唔知食鐘又可唔可以報呢？
除此以外，仲有BOOK錯數事件，BANK錢BANK左ACCOUNT事件，新SYSTEM要上又要UAT事件等等已經無精神兼無心機再記錄，只是多左一日咁大把，駛唔駛用咁盡呀？