Spider-Man 3

點解搞到綠魔咁型仔?  拍下拍下,蜘蛛俠又拍到第三輯,這些大製作就入戲院看一看吧,但估不到因片長關係還要加十蚊!遲些上映的魔盜王第三集片還更長,加錢也要多五蚊,真是有冇搞錯!今輯的奸角沙人及毒液,好似出場時間不是太多(沙人我果時睇卡通片完全唔覺佢出過場),反而被時正時邪又靚仔裝備又型的綠魔二世搶晒鏡,真係要講句,哈里好型仔啊!
MJ越來越順眼  劇情方面,都係果堆邪不能勝正,你誤會我我又誤會你果類,但某些部份來得有點兒嬉,及好似夾硬搵戲來做的感覺。Uncle Ben的死好夾硬的和Sandman扯上關係,Harry的轉變也奇奇怪怪起落之快快到離譜,最後大戰,既然Sandman話佢原來唔想咁,咁又加埋Venom做乜鬼,都無解釋?死的戲就真是搵戲來畀個角色死,都唔想講了。特技方面,我只感覺到正在看3D動畫,大量電腦合成科技,好似為秀3D動畫而設計有關的對打場面,打打下已經變了動畫了。配樂好似換了人,今次麻麻地。較為可取的,是對Gwen Stacy及Mary Jane的描寫,兩個都幾合情合理,也算討好,尤其這種介乎霧水的三角關係。其他想講的有:
.開場片回顧:花費不少吧?一路出演員表一路回顧,怎麼第二集無乜提?連導演也唔想提?
.Harry vs Peter Round 1:飛飛下變左睇電腦動畫,這一頭部重擊是否因為人物太多而要暫時離場?算,睇在靚仔份上忍受你那幼稚劇情。
.老總的震震Call枱:真係好搞笑!我都想整張畀腦細,等我地成日Click掣震下佢!
.法國餐廳:呢位餐廳帶位真係神來之筆,唔識法文去咩法國餐廳?果兩個棒香檳侍應都好搞笑。
.唔梳頭的Peter:被毒液搞到學壞的Peter,成日係條街度跳埋果隻騎呢舞,班人唔會覺得佢發神經?仲有果執頭髮唔梳,搞到佢好樣衰。在酒廊跳舞果一幕,是向MJ表示他也跳得兩野嗎?
.Harry vs Peter Round 2:神奇管家登場!點解之前從未見過這件管家?佢的出現加上綠魔的裝備房間,頗有蝙蝠俠老管家艾發的味道,順帶一提,綠魔雖然你半邊面毀容,以Osborn的財力,磨完皮包你繼續靚仔。
.Sandman:得啦得啦,堆沙沙特技駛唔駛成日出呀?佢個女條鍊無落離心機咩?佢連件衫一齊分解,咪成世都要著果件肉酸綠間條?
.Venom:樣衰就樣衰啦,每次揭開個人樣顯得更加樣衰,做乜仲要露番個人頭出來,演員抗議?
.老總:唔怪得咁熟面口,原來係The Closer的Asst. Police Chief,好唔同的演繹,沙塵招績市儈吝嗇,一樣搞笑。
.Spider-Man+Goblin vs Sandman+Venom:為左製造完場大戰高潮而戰,為大戰而特別安排的動畫大戰。鑊鑊受害人都係MJ,班人唔會覺得奇怪?黑蜘蛛網加十八銅條陣都算有點新意,但要死的死就好無聊,難道因為演員選擇唔再拍而安排?果然每人也有得揀……

發佈留言

發佈留言必須填寫的電子郵件地址不會公開。

*