夜宴 The Banquet

  估不到這套戲原來這麼的長,令原本打算花兩小時看完戲去跳舞的我,跳完舞回到家要補票看回後截,再加上一隻壞壞地的DVD(一到下一個Chapter會連跳兩回要手動返回前一Chapter),令這套戲顯得更加之長。一早聽聞這套戲是改篇莎翁的哈姆雷特,論劇情來說,可以算是比黃金甲好一點吧,我個人來說覺得開頭不差,但結尾來得有點求其及草草埋齋,一句講晒就可以是「青女惹的禍」!
  故事以莎翁的哈姆電特做藍本套用落去五代十國時代,皇叔葛優用了同一手法毒死了皇帝,又派那堆像極戒靈的殺手去KO太子吳彥祖,但太子受到一堆白衫白面具的能劇員工(某程度上我覺得似幽靈公主裏的樹精們)保護幸免於難,帶同那卷像爛布的越人歌回皇宮找他那再次當皇后的青梅竹馬婉兒,耍完一輪劍後又鬧番,皇叔又再度派使者出來打來打去,婉兒多番保護太子,但太子成件放棄款成日搞搞震話要復仇,實則無鬼用成件廢柴。至於太子個忠實女友青女就更加戇居,係唔適當的時候做唔適當的事,害到佢阿爹阿哥雞毛鴨血,最尾就皇叔原來不愛江山愛美人,佢一早自己搞惦咪收晒工囉!總之全部都香香完場。開頭的劇情推進其實我覺得是可以的,但結尾果場夜宴的推進就很奇怪,不知是否趕收工要快快推晒堆主角出來受死?青女突然彈出來,最尾婉兒自言自語,也是來得奇奇怪怪,成為套片的敗筆。
  角色方面,章子怡的婉兒唔錯,要嫵媚有嫵媚,要性感有肚兜,要靚衫有靚衫,發揮得唔錯。皇叔葛優成副縮骨咸濕佬般,完全睇唔出佢會不愛江山愛美人喎。太子吳彥祖那副廢柴樣真是要幾廢柴有幾廢柴,每次出場必製造不必要的麻煩,好煩又好廢。青女最愛在不適當的時候彈出來,一個天真及單純愛著太子的人,周小姐做得唔錯,無左佢就完全搵戲黎做。黃曉明的殷隼青女哥哥,實在是太過型仔太過靚仔了!無論將軍裝或者這個雪豹部隊裝,都是十分之型仔,點解要拍得佢咁靚仔?佢個角色又討好,搞到成套片淨係留意佢一個!變色龍殷太常咁牆頭草都係適者生存,下場又慘了些。
  場景及配樂都算唔錯,但時常有睇緊魔戒感覺,果堆黑武士最似。這個杖刑是十分之變態,其實可以唔駛打咁耐,睇佢畀人打到飛下飛下,打幾下仲可以,之後就覺得打這麼久還在打,好悶。夜宴中的毒來毒去好兒戲,個個都有毒藥,用不著特別去拜訪最毒人心毒藥販子。比起黃金甲,夜宴可以說是比較好了,起碼場景跟劇情也是配合著,頭開得唔錯,但尾後有點落雨收柴,無端端彈青女出來跟住來個大逃殺就算,破壞了前面的舖排。

發佈留言

發佈留言必須填寫的電子郵件地址不會公開。

*