經過酒店及冷氣舒舒服服的一夜後,精神回復不少,少說昨天也叫行過遊玩過一個公園嘛。在首爾早餐不是在酒店食的,要搭車車出外吃。今早吃早點的地方是位於當年奧運運動場附近的一間食店,都算幾多野食,還有多士玩啊!食完野等車期間,看見附近的建築物好有香港的公屋feel,其實首爾都有不少類似的建築群。食完早點,首站是去泡菜學校整泡菜。話雖這樣說,其實都係過下癮玩下吧,這小小的一段時間那會記得入腦呢?不過都幾好玩呀,但妹子試過那個韓國宮廷茶點,她說好難食,唔明點解會係宮廷茶點!玩完整野食,該處有些韓服試穿可以影相留念,個個團友都非常雀躍,跑來跑去影相。很多長今呀、乜大人同乜將軍等,你影下我我影下你咁,個個嘻嘻哈哈不亦樂乎,原來只係這麼小小的裝束扮下野,不論男女老幼都可以好快樂的!影完一輪,又繼續下一個行程了。













終於去到今日行程最後一站樂天世界。導遊說由於樂天世界之前攪免費入場發生踩死人事件,結果遭受部份韓國人抵制,現在遊人不多。入到場,果然水靜河飛,同之前去的夢幻樂園真是差天共地,以一個遊樂場來說,這樣的入場人次,真係點捱?入面的寬敞度,同迪士尼海洋絕對有得Fight!其實這個樂園都唔錯,由極度刺激(人肉洗衣機到過山車)到老少咸宜(小火車)也有,有室內又有室外,室內冷氣供應,玩得幾舒服。一開波導遊叫我們玩那個仙巴冒險,坐船仔都幾好玩,雖然堆公仔造得比較醜,但估不到船程也幾長。是日晚餐也在這裏解決,價錢來說並不貴,都好鬼飽。食飽飯諗住唔好咁刺激去玩那個汽球飛行,怎料原來個汽球裏面無凳坐的!企足十分鐘!玩完汽球又匆匆走去玩法老的憤怒,這個仿Indiana Jones式的搭車車冒險,又係黑呀噴風呀左右搖下的車車,唔知係先進定復古,去到法老墓果度,堆火係真野黎架!成間室的溫度真係好高!之後還有鐳射激光表演,但個Show麻麻地好睇,最後趕在收場前坐埋懷舊咖啡杯,就咁就完成今日行程。不過如果時間再多一點的話,這裏可以再玩久一點,讓我們有多些時間逛逛商店。


