首爾之旅.二:龍平度假村.38線.雪嶽山國立公園.韓華溫泉度假村

上山吊車上  第一晚都算睡得幾甜,可能因為凌晨機的關係吧?度假村酒店的自助早餐幾好食,食的地點又係冬日戀曲男女主腳拍拖場地之一。食完早餐,大部份團友都自費搭吊車往龍平山頂看看。導遊森美說昂平吊車未開前,這裏的吊車就算是亞洲最長的了。一架吊車可坐八人,冬天下雪的話,雪景應該會幾吸引。搭了廿分鐘左右,終於去到山頂。一離開山頂吊車站,強風一陣再加微雨,真係又濕又凍。呢個山頂也超過一千米,根據讀地理時講,每一千米跌六度,那山下十幾度,這裏不就是十度以下嗎?山上風景優美,我想冬天時白雪舖地應該會更美吧!不過現在風景也不錯,車站很古典,站內還有大火爐,上山之旅是值回票價的。也不過山上風大得很,非常凍(以夏天天氣對比),團友們在室外都不是捱得太久便紛紛閃回車站內,拍下冬日戀曲場景吧。到底冬日戀曲是說甚麼的呢?轉眼間又夠鐘下山,繼續下一站行程。

山頂車站 車站古色古香 裴哥與喊包皇后的電燈泡!

  轉眼間車車又車到另一景點——38線。最好笑的,竟然是有團友唔知38線係咩來的,以為南北韓三八分帳……我想38線這麼長,都有好多個交界位,只不過這個汽車休息站剛好設在38線,所以我覺得,其實這個並不是甚麼景點。不過既然都要停車抖抖,順道啦!38線到現在還是韓國的一條傷痕,但給我的印象卻又不像當年的柏林圍牆般,總之一句,都係有個牌你影下相咁啦。休息站望出去,好似有個海咁架,乜原來係海邊來的嗎?至於果兩隻熊,唔好問我,我都唔知乜來的。影番兩張招牌,去巡視一下堆小食店,又上車去下一站,開餐!是日午餐係石頭鍋飯配韓式火鍋,果然一如出發茶會所言,唔係燒烤就係火鍋。個飯我覺得跟冬天時大快活推出的石頭鍋飯差不多啦,還要沒甚麼肉的!又係泡菜送飯。
38線招牌 呢隻係咩熊來架? 石頭鍋飯

  車車開始越行越往郊區行,這一站是雪嶽山國立公園。當然,由於時間所限,我們去的,只是雪嶽山的一角,包括新興寺及統一大佛果一小段。睇這裏的地圖及導遊簡介,雪嶽山其實分內雪嶽和外雪嶽,要行晒真係有排。這個韓國的著名國立公園,風光也算不錯,其中公園內見到的登山吊車,長長的上山之路只有頭尾兩端有東西扯住吊索,望上去真的很恐怖!統一大佛如果對比起天壇大佛,當然是差幾廿個碼位,不過林中的建築,也算不錯。匆匆兜左一個小圈後,團友又要趕住上車,向著今天主菜水上樂園進發。
雪嶽山新興寺門口 又係熊仔做Logo? 統一大佛

  今日主菜其實是韓華溫泉水上樂園,落車整理好行李,便從度假村行過去了。這個溫泉水上樂園其實有著泳衣的溫泉水上樂園部份,及脫光光的純溫泉部份。由於昨天已經脫光光浸過了,今天全力玩水上樂園部份。室內的按摩池、蘋果池、二人木盆等等都差不多浸過玩過,之後入去玩室內部份。室內有個人造浪池,攪出來的浪都幾勁,幾好玩,不過限時供應。玩著玩著,阿姨提議去玩滑梯,我見既然有墊板的不用擔心滑串泳衣,就試下滑下吧。妹子先滑,在梯頂等的我只聽到梯內傳來妹子嘩嘩的尖叫聲,不是嘛……梯頂的工作人員阿叔好似有點難以置信的感覺。到我滑時,嘩!真係水流很急,轉彎時幾近個人反轉,還碰到頭啊!玩完一轉後,三女子都唔再玩這個滑梯了。總體來說這個樂園都幾好玩,但規定要戴泳帽的做法,加上在下頭大,俾頂帽紮住個頭咁耐攪到好頭痛啊!
韓華度假村 人造浪池 好激的滑梯

八爪魚,我又玩!  玩完水個人就特別累,於是也就乖乖俾錢幫襯導遊介紹的魚生餐,不過這檔野手勢麻麻,但肚餓囉喎,咩都會擺入口。韓國的魚生餐畢竟跟日本的魚生餐不同,沒那麼精緻也沒那麼好味。不過在這裏第一次食海膽,原來海膽都幾好味架!仲有那條俾我們玩到殘的八爪魚,活生生的八爪魚,係你面前動動下,咬住佢條鬚等影相,咬咪咬囉,但因為等佢地影相玩得太耐,隻八爪魚吸鬼住左我個嘴邊,攪到第二日紅左!攪錯啊!食飽返到度假村,因為電話位裝修遍尋不獲,後來幫忙的,竟是扮成筋肉型蜘蛛俠的工作人員,佢開聲果下至知……原來佢係女人黎架!是日由於溫度未達廿六,度假村話唔開冷氣就唔開,熱鬼死了……

發佈留言

發佈留言必須填寫的電子郵件地址不會公開。 必填欄位標示為 *

*