聖誕節.睇功夫

借newsgroup的圖,大口仔萬歲!  Merry Christmas!是日是聖誕假期的開始,不過今早也不是太晚起床,原因早早買了便宜晨早場的功夫戲票,所以都要早早起身出門去睇戲。聖誕假期晨早樓下商場也不是有太多的人,可能平安夜很多人也玩得很晚吧。話說回來,昨天跟同事仔又受到寫字樓一班禽獸折磨,攪到昨晚又發惡夢,夢中都做緊公司野。成日都係咁,日頭發生甚麼事,夜晚就會發番晒,真係發夢時間都俾公司佔據,黑!
功夫官網圖片  是日場功夫都幾滿座,無計啦,聖誕差不多都無乜好戲上畫了。有假期留港消費的港人多數都去睇電影(不論租碟還是單撈還是入場),平價晨早場又係一眾小市民必定進取的小優小惠,到我們買時好位已所餘無幾,所以今次都半玩野咁買左絕頂尾行的怪位,入場至知呢行位咁怪異,個款有點似小包廂,不過就絕對無人阻,都算幾好,下次可考慮買呢行位。功夫一片未上畫前RoadShow已日日播預告同製作特輯,所以都令人幾期待。睇完呢套片覺得都唔錯,特技配落去係將堆功夫做得幾誇張(有時覺得用不用誇張成咁?不過都仲接受到),但功夫呢個主題星爺發揮得唔錯,那種一山還有一山高,隱姓埋名的英雄好漢頗有點點俠的味道等,笑中帶有小小深度。
功夫官網圖片  其實呢套功夫星爺是否想向各電影致敬呢?很多電影著名橋段在這套片中也不難發現,但功夫一片也用得算幾融會貫通,不會令人覺得太突兀同夾硬來。一開首斧頭幫的琛哥邊殺人邊跳舞,立即令人想起危險人物肥尊同奧瑪花曼那隻舞,跟住在斧頭幫大廳越跳越多人那個場面,不知何解令我立刻想起韓國果個D-Player,可以SET到成TEAM人一齊跳舞果個場面。成打斧頭幫操出來,大家一看便又會聯想起Matrix果個Agent Smith大混戰了。斧頭幫的訊號彈有點似蝙蝠射燈,蜘蛛俠的名句With great power there must also come great responsibility也套用左不少,還有鬼水兇靈的水花四濺、星爺跑到有點似阿寶翠怡咁款、少林足球的盛世、大戰出埋堆貌似魔戒的亡靈士兵,看到也令人會心微笑不少,星爺,你都看不少戲的喎!
功夫官網圖片  「大隱穩於朝,中隱隱於市,小隱隱於山」,縱然如何絕頂的高手,也不能長駐江湖的腥風血浪之中,總有退隱埋名尋常之家的一天,這很切合中國傳統的中心思想,那些處於絕頂武林高峰之中的高手,與那堆身在官場名利圈高處的人,個個的理想都是歸隱深山。另一要提的,是臥虎藏龍,千萬不要小看那些平凡百姓,其實可能有好多高手如豬籠城寨般暗藏實力的啊!
我的聖誕禮物  好,影評完畢,順帶一提今日買了不少聖誕禮物俾自己,呵呵呵!包括很少見的真皮大口仔銀包(上一個爛了的已有十數年歷史)、魔戒Return of the King加長版DVD(250分鐘,我來也!)及阿Sa送的小羊匙扣(越來越多羊了,就快淨係識咩咩叫),好開心呢!加埋之前一堆錄了未看的電視及電影,還有床頭一堆放了成兩個幾星期未惦過的書,今個聖誕有排忙了!

發佈留言

發佈留言必須填寫的電子郵件地址不會公開。 必填欄位標示為 *

*