阿爸阿媽終於旅行完回來，家裏擺放了一大堆的手信及看了超過一千張相（數碼相）。星期六終於看完了MATRIX 3，又係時候寫下觀後感。強烈警告！未看M3而又不想知劇情的人請從速離開！
首先講下整體感覺，我個人覺得M3未能做到像M1的驚喜及M2的用腦，這集只是將故事盡快說完，無錯綜複雜的情節只有一條大路行，所以我覺得實在麻麻，特技也未算出色（如果你喜歡星球大戰般的太空戰爭片你可能會喜歡），Neo大戰Agent Smith像極打X PS遊戲機時在個大結界裏無分上下左右亂打般，有點像看Eva加星球大戰加星河戰隊再加日本機械卡通片。差不多沒了第一集視覺唯之震撼的子彈時間慢動作，打架時無乜特別，預告已將整集最精采的地方一次奉獻，我只能說這是一套不過不失的片集，如果不是挾著1及2之勢，3絕對不會有如此票房。
與劇情或許有關聯的感想：
◇究竟法國佬Merovingian出來有乜用？講兩句廢話請幾個保鑣弄些打鬥場面外，其實佢究竟有乜用？上集都話鎖住個Keyman，今集完全唔知做乜？請佢番來講法文乎？
◇勁級廢柴法國佬老婆Persephone更加唔知出來做乜？秀身材乎？她的對白有沒有超過五句？
◇Trainman又係一廢柴角色，無性格兼又係唔知做乜。
◇Sati幾可愛，Niobe超型，Morpheus今集同上集基本上都勁廢，Trinity個樣繼續殘，Agent Smith都係扮番Elrond好些，The Oracle原來係幾有機心，上集同今集係度攪風攪雨，Seraph係今集都算最出風頭人物，Kid同Mifune這一對幾討好。
◇Zion大戰仿如睇緊星球大戰，真係想那段快點完，明知係電腦動畫。那個鑽鑽有點像Eva裏鑽到地底總部那隻使徙，看時真情好有Eva feel，奈何我係唔鍾意Eva架！
◇點解無死光槍架？仲要用裝子彈去補給，齋補給一次起碼死五、六件，簡直係失敗的設計，有這樣的武器，難怪Zion會失守。
◇Niobe型到極點，將其餘兩個廢柴艦長（包括Morpheus比下去）！
◇Neo今集麻麻地靚仔，不如期待佢下一套Constantine。
一知半解估估下的劇情理解：
◇因為前兩代Matrix的失敗，所以Architect整了個有瑕疵的Matrix Version 3出來，又加了個The Oracle落去作為聯系及衡量情感的程式，佢自己就保持最後理性的平衡，即The Oracle所謂齋睇Equation的Architect。但人類的情感是最為難以猜透的東西，The Oracle因為屬於感性方面，對受Matrix支配的人類產生了感情，所以引導Morpheus等人希望對Matrix作出改變。
◇Neo係個有瑕疵的M3中每隔一段時間就會出現的Bug，可能是因為某些人類天生有特異功能（如果生個磁力王肯定Matrix即刻攪惦，一個電磁波已經可以攪惦晒那些八瓜魚），又或腦電波特別發達而致。當Neo出現就代表部大機Matrix已經出現了太多累積的Bugs，要Reboot先得，所以要The One帶領X男X女去重建Zion。
◇因為Neo違背了Architect預言無去Reboot，程式出現異常，加上人人有線上網，Neo就無線上網，Matrix偵測到異常程式所以就像普通防毒程式般，將Neo送了去隔離區（Station），要找Trainman將佢放番出來。
◇The Oracle一開波第一集已想改變今次Neo，就教唆Neo身邊的人夾埋改變Matrix，點知整左個Virus定木馬程式Agent Smith出來，於是就將計就計利用Agent Smith去變相要脅Architect。
◇車站裏個阿爸程式話每個程式生存在Matrix都係有作用，否則就會被Delete，所以佢地好擔心佢地個女，因為佢個女係唔知點解生左出來所以唔知有乜用途，如果無法國佬幫忙就可能會俾人Delete。佢本身就實Delete硬，佢負責發電廠程式，上集俾Trinity等人攪破壞，現在都不用他去控制發電廠了，還不Delete？
◇點解要Neo先可以攪惦Agent Smith？我猜由於第一集時Neo穿過Agent Smith的身體，攪到兩個程式中間混了對方的code，就像你用用下某Programme然後突然異常終止，那程式便會說被某某鎖定，所以Neo及Agent Smith互相鎖定了，連齋Delete都唔得，除非Format過個Matrix。所以當Agent Smith上Neo身時兩個程式同時釋放，Architect便能Delete了Agent Smith。
◇我猜Neo可以在現實世界攪惦隻八瓜魚，係因為佢身上沾了Agent Smith的code，所以有些Machine特異功能。我比較Buy新聞組朋友說所以他能看到Machine偵測的東西，卻看不到Trinity身中多箭。
◇最後Delete了Agent Smith後，本被入侵了的Oracle都回復正常，再加上Sati話弄個太陽給Neo看，而先知Oracle又話總有機會，我想臨尾被入侵了的Neo都仲有機會未死，記得第一集他在Matrix中死了但也能番生，現實中佢只係身在Machine World之嘛。
終於一口氣寫了這麼多，學Oracle句名言，「Everything that has an beginning has an end.」今日影評到此為止。