分類: 迷失東京

　　晨早起床，又係時候去個有監獄飯堂feel的酒店早餐部食早餐，又在電梯大堂打蛇餅……食完早餐就番房收拾行李，雖然我兩姐妹不是購物狂，但個行李都係要兩姐妹坐落去至合得埋。落大堂Check Out，今次位服務員的英文水平終於比較高，沒甚麼多餘支出，可以正式跟行李一起長征了！之前也說過腳程快的我們由華盛頓酒店行至新宿JR站也要十分鐘，所以當我跟領隊說我打算去上野搭機鐵時，他也對我的決定感到驚訝。拖住件行李咁行法真係唔野小，但因為要省錢，又想行多個地方，所以唯有頂硬上，叫妹子拿著手提行李，我就緩慢地推著行李箱慢慢向JR站進發。
　　因為覺得咁行法實會好慢，於是晨早九點就出發，碰巧是上班的時間，人多車也多，我們的前進速度更加之慢，在此真要奉勸各位購物狂的朋友，唔捱得千祈唔好學我們咁行，拿咁多東西，隨時攞你命……終於行了大約廿分鐘捱到新宿JR站，拖住堆行李找月台，才發現新宿站雖然加裝了電梯，卻只有單方向的上而沒有落，天啊！硬著頭皮都要抬件行李落月台，真係好在平時有踩開車，咁頂法都幾係野。因為一拖四行李，找了車尾位置上車，在繁忙時間迫下迫下終於又捱到上野站。可能上野有機鐵搭，月台總算有電梯，抬少一次了！
　　出左站去了機鐵京成上野站找個Locker放低件行李，車站阿伯對我們這樣的旅客已經見慣見熟，也很熱情地過來幫手。這個站的職員英文水平要算是這行東京之旅遇過的最好的了，還懂得問我們要Smoking or Non-smoking Seat，非常好！買了票心也安定下來，於是即刻衝過對面Yamashiroya逛逛。這幢玩具雜貨店可以說是選搭機鐵的旅客掃貨之地，有很多食玩盒蛋賣，較Out的至新的也有，玩具也有不少，入面都找到些講廣東話的水貨客在掃貨，兩丁友狂掃一隻唔知乜蛋，一買買成十幾廿隻仲唔係水貨客？行完這幢野就向著上野中央通り及アメ橫通り逛逛，這裏真的很像花園街，有很多魚魚同乾貨買，想買魷魚絲、元貝甚至魚腩的朋友，上野真的賣得很平，但其他如手錶及用品等，就要提防像旺角般買到假貨了。

  
　　逛完一圈，兜路到了旅遊書介紹的中谷商店買手信，真的很平宜，比領隊向我們兜售的平了差不多一半，如果要大量購買手信的朋友，記緊要來這裏買！之後又去了旅遊書介紹的二木の菓子店，一入去我妹就話乜咁似裕記，睇真些個格局都幾似，入面又遇到一大班廣東話朋友在選購貨品。這裏賣的零食真的幾平，由普普通通的朱古力到餅餅到草餅都有，卡通零食及食玩盒蛋都比出面市價平宜，果然係一間日本裕記，來這裏買手信真的省回不少。行下行下離機鐵開出時間也差不多，於是買了個飯盒跟妹子去了上野公園（京成上野站隔離）吃。人家說如果去的時候是櫻花季節，上野這裏就是賞花勝地了，不過現在是炎炎夏日，以公園作家的露宿者就見到很多。

　　轉眼就夠鐘上了Skyliner，日本的火車真的很準時，幾多分鐘到哪裏真的一分也不多到達。往成田空港的途中，窗外盡是是樓高兩、三層的樓景，這樣看了一會兒已令人想睡，同車的還有水貨客兩件（成三、四箱紙皮箱同行）。此車坐位舒適也很方便，這令我覺得今早搬鑊甘都是值得的。到站後就已經有保安哥哥Check證件，都幾嚴。這裏的行李車可以跟人一併搭扶手電梯的，幾有趣！在成田空港的商場作最後衝刺後，寄埋行李拿埋窗口位，就搭乘超準時的國泰回港了。今次架機遇到小小氣流，番到香港又閃電，睇住舊雲閃下閃下都唔知好嬲定好笑……落機搭埋A41回到屋企，終於正式結束今次的迷失東京之旅！… 繼續內文

　　是日完全係自由行，亦係此行迷失東京之旅的焦點所在，因為早早訂了票是日去宮崎駿美術館。無Morning Call不過有鬧鐘，晨早就起身了！推窗一望，東京都廳果然在我們左近，喂！庚快點走出來，我們來找你了！呵呵！朝早又再一次見證華盛頓酒店的cheap，昨晚Check In時那位接待連講多句英文都唔識，今早食早餐就更加恐怖。晨早早餐部的人龍長到排到出電梯大堂再在電梯大堂打蛇餅，而原來這間酒店的早餐係成班人排隊拿食物後才自己找個位坐低食，即是話食物只可拿一次，食完就要拿拿聲走人，同巨蛋酒店真係差得遠了。早餐食物款式都是一般，唯一係有東京都廳美景陪著你食。食飽飽後，又沿著甲州大道向新宿JR站出發。
　　早早在香港時已經去日航天地買了宮崎駿美術館的票，因為有限定日子的規定，各位要訂好日子才買。去到日本才買係仲要指定入場時間，所以雖然香港貴點，在香港買始終好一點。去三鷹這個地方，要選搭JR中央線（快速）往立川、高尾方向月台，中央線是橙紅色的，可能此線較少遊客乘坐，所以指示一貫係日文，自己要留意月台看看車車開到邊個站了。落車後也有很多指示牌指示三鷹之森美術館的方向，所以不會迷路。傳聞的貓巴士原來不是架架也會塗上龍貓等圖案，騙人的！不想花二百日元一位的代價，就好像我跟妹子般直行一公里吧！基本上係一條大路，而且還有指示牌指示你還欠幾多米的，沿路也綠樹林蔭，所以行也不是一個問題。約行十分鐘便到了宮崎駿美術館！

 
　　宮崎駿美術館其實不是很大，我們去到時也未夠鐘開門，不過已見不少人在門外等候，也見不少工作人員在抹扶手和掃地。後來工作人員放我們入去裏面再排隊，不過排隊之前別忘了到後門位置找龍貓售票員影相！（不過佢個位反光，其實幾難影到佢！）排隊時個個必須出示那張換票證，工作人員一見我們那張與別不同的換票證，立即懂我們是「Hong-Kong-Des!」憑著這張換票證，入門時會換一張菲林票給你的，今次有幸抽到千尋同阿白門票啊！成間館其實真的不大，不過裏面設計也不錯，那些通道是不規則地貫通，選了一條樓梯要直上三樓才有其他路轉去其他地點，選不同路也有不同結果。館內謝絕攝影，不過戶外地方則不在此限。
 
　　地下的是介紹動畫的展示室，妹子對此發晒青光，因為佢現在正讀緊跟動畫製作有關的課程，這個展示室簡直開正佢果範！三樓有大大架貓巴士，如果係小朋友可以入去跟眾小朋友和貓巴士肉搏！三樓也是海盜部！有大量精品及書籍，會令你荷包被洗劫一空！二樓有有關宮崎駿製作動畫的介紹的常設展示室，也於此室碰到很多講廣東話的人士，事關香港售票一日限售三十，如果件件都好似我們這般晨早就去，咁你會碰到三十個講廣東話的！我們當天也肯定最少碰到十個講廣東話的人，包括三人組哥仔同情侶檔！其中一件哥仔更跟我們一同往土星座睇Pixal的短片介紹。天台的天空之城機械人及飛行石也是不能錯過，因為這裏絕對是設計給人影相之用！再過小小有飛天紅豬俠餐廳（雖然很貴也很快爆滿！）及仿龍貓的科學井，小朋友都爭著排隊去打水。還有些要注視的，是館內的玻璃窗，全都是跟宮崎駿作品有關的故事圖案，實在很美！
  
　　行完美術館也十二點幾，根據旅遊書所指，行往吉祥寺跟行回三鷹差不多路程，不想走回頭路之下便往吉祥寺方向走去。吉祥寺也有不少購物的地方，但也同樣不太合我兩姐妹的口味，頂多幫襯大型百貨公司……的廁所！吉祥寺算是一處幾平民化的地方，就像鑽石山廣場、大埔市中心般的地方，是居民購物的一個中心點，有一般的連鎖店及食肆，基本上那堆商店到處也有，如果不想如新宿、涉谷般人多，吉祥寺也算一個不錯的選擇。也可能因此地不像新宿等著名旺地這麼人多，吉祥寺的單車比其他地方算是多，所以要小心避車。在這裏選了間快餐店攪惦個午餐，日本的快餐店也是兩個人可以攪惦，一個負責煮，一個負責清潔及遞餐，去快餐店更加連日文都可以唔駛講，睇完那堆相後認住個日文，入到去部售票機入錢同認番個日文按鈕就攪惦！呢間舖頭人人都食豚肉飯，係大碗同細碗之分，我們也叫了一碗大號豚肉飯兩姐妹兩份食，三百八十日元找數！
　　又搭乘JR，今次去池袋，呢程車亦算咁多程JR中最貴！坐到就快新宿時，隔離件師奶無端端用普通話問我是台灣人嗎？於是我用普通話話香港人，點知佢應該齋識呢句中文，跟著以為我係上海人，直至我用英文話Hong Kong！佢至知我係香港人，師奶！你都幾八卦喎！池袋都可算我們此行掃貨最勁區域，因為此處有比較多賣動漫精品的舖頭，也有很多識途老馬水貨友來此地掃貨！行入Saniro店，又碰到廣東話人士，又係拿著同一本旅遊書，又相認了……
　　去池袋絕不能錯過Sunshine City，沒錯，哪吒好似住係呢度樓下！（X停畫，但劇情依舊上腦！）不過我們迷失東京兩姐妹，明明有條地下通道行過去Sunshine City，卻走了地面通道兜大圈，於是我又再次奇怪點解行來行去都未見Sunshine City，不過今次沒發現又行錯路，因為轉眼間我們兩姐妹已經俾K-BOOKS2同成幢animate吸引了過去，荷包大放血！池袋果然係買動漫精品的好地方，有好多好多正野買，正當我們兩姐妹瘋狂掃貨之際，身後突然冒出一位四眼哥仔，無端端行過來用廣東話說：「你地又黎呢度掃貨呀？」下？同行識同行，不過此君的突然彈出卻令我們兩姐妹啼笑皆非。
  
　　掃貨完畢後終於在地面找到了Sunshine City，裏面有個NAMJATOWN主題遊樂園，為左去門口影相我們又再迷失，上多了一層樓猛話點解唔見左，之後無功折返落一層時驚見門口的出現！這個主題遊樂園裏有餃子城同雪糕城，奈何我們二人也不想入去食餃子同雪糕，所以只在門口影相便算了。Sunshine City裏還有龍貓共和國、Disney及Hello Kitty專門店，這間Hello Kitty更加厲害到，日本乜地方限定的貨品也有得賣，例如涉谷限定一、二、三代金版銀版也有貨可買，想扮去過邊度都得，公仔、毛巾、電話繩及麵食等都係乜限定都有，根本不用花心機去第二度搜購。
 
　　行完一輪後在池袋車站前的食堂食埋晚飯，這間舖頭也是認著幅相的日文再去買票就可以了，妹子又叫了拉麵作晚餐，我本來想叫炸豬扒飯，但身上散子剛好不夠，於是叫了個平一點的親子飯食。食堂果然係食堂，大多數幫襯的都是中年阿叔同學生哥，望落去都無乜好似我同妹子咁款的人去食飯。食堂除了自己買票自己拿食物外，水要自己斟，連碗也要自己執，於是又見識了日本的平民飯堂文化。
　　是晚經過上一日的失敗經驗後，不再迷路直從新宿JR站返到酒店。梳洗一輪及執拾行李後（第二天便回港了），竟發覺電視正在做緊日文版的百萬富翁！挑戰者還挑戰最後題目（竟然問鐵達尼號航行了幾多日沉左？）不過失敗了！日本版的主持阿叔原來興即刻撕爛張支票，睇落都係百萬泰做得好點。執好野後都係時候覺覺豬了，第二天還要跟行李一起長征……早抖！… 繼續內文

　　因為就團友返港執行李，是日十點半才出發。再度享受巨蛋酒店的美味早餐後，把握時間再在巨蛋球場附近再行一趟。雖然等到十點，後樂園遊樂場還是未開門，少年JUMP專門店前卻有成班人排隊，這我們才知道這間舖頭的厲害！巨蛋酒店向前行可至JR水道橋站，向後行則可至營團後樂園站，晨咁早除了番工的人外，竟也有班青年人在遊樂場前等待，還衝入巨人隊精品店掃貨，巨蛋果真不愧為巨蛋。
　　終於夠鐘上車，店卻也仍然是未開。今日行程先到淺草，而去淺草也當然例牌地去雷門觀音寺影相，去仲見世通商店街買人型燒啦！三年前在那裏落車，三年後照舊那裏落車，名勝古跡依然是老模樣，連仲見世通的店舖也差不多模樣，妹子又幫襯番那間舖頭買人型燒食，我就不停搜尋有否增強賭運及愛情運等手信買，不過掃晒成條大街都唔覺有賭運增強的東東賣，算鬼數，買條金運增強頂住先啦！基於時間唔多夠，今次都係在外圍打個白鴿轉兼搵埋廁所，咁又夠鐘上車了。

  
　　下午又再回到新宿食燒烤兼火鍋，好人領隊哥san著團友在新宿掃貨最後衝刺一小時，然後利用這一小時帶我們兩件去今晚下榻的華盛頓酒店。如是者也就第一次搭東京的的士，一起咪錶六百六十日元，尤幸無再跳錶！也在坐的士的途中，見到唔肯載我們至酒店的大大架交叉遊旅遊車，咁大目標個死人司機又話條路駛唔到，明明三對眼見佢經過！至酒店未夠鐘Check In，哥san幫我們寄存行李後，帶我們行至新宿JR站一次。原來呢間酒店離JR真的幾遠，我們腳程這麼快的三人都足足行左十分鐘！好！行到返去開餐地方，團友都掃貨完畢回來，原來一個鐘內呢班執好晒野的團友仍然可以掃到很多貨，厲害！吃過燒烤火鍋後，跟領隊說聲拜拜，迷失東京之旅正式展開！
　　一出閘首先搵番個新宿JR車站才成，摸清方向後向著My City直闖。新宿JR站何時也是這麼多人，等一輪摸到架售票機後，買了票向第一站涉谷出發。山手線都很易認，綠色線同寫到明涉谷方向，實唔會錯。山手線可能遊客坐多，新車已有LCD顯示及英文廣播，但英文廣播又如何，將個站名變番做英文都唔識啦，我們習慣認漢字嘛！涉谷個日文拼音咁鬼長……聽左咁多次係唯一識新宿Shinjuku！遇著舊車又無顯示又日文廣播，唯有留意站外月台寫乜站囉。
　　搭JR山手線話咁快就到涉谷了！一出站當然要去忠犬八公像前影番幅，Logo嘛！涉谷的大電視及109大廈就在眼前，跟著就行了入109掃貨。109充分反映了涉谷的格局，內裏裝修同旺角商場很似，但價錢就等同金鐘咁價格，一件普通的Tee閒閒地成二百幾港紙，真係貴到飛起！同妹子左行右行都實在買不落手，後來在一鞋店的大減價櫃裏，妹子終於找到對買得下手的高底鞋，這個時候身體語言又出動了！兩姐妹手口並用同呢位真係連英文都唔識的姐姐講要試鞋，都唔理佢俾唔俾就試左先算，妹子對腳又好野喎，一試就惦。於是即刻俾錢了！今次終於聽得明Sales姐姐講的一句「Size Okay?」而又懂答佢一句「Size Okay.」了！
  
　　行完呢幢109，原則上涉谷已經沒甚麼好行。根據旅遊書的指示，涉谷也有間BURBERRY，於是便跟妹子向著BURBERRY進發。一入到BURBERRY，又聽到熟悉的廣東話，另幾位自由神好明顯也跟著書中指示來此地掃貨，所以話，拿住呢本旅遊書，東京相認無甩拖！可惜行到呢間第三間BURBERRY，仍然係沒有背囊的款式，連男裝部都睇埋了……也由於行到呢間BURBERRY，已經等於涉谷同原宿之間距離的一半，反正涉谷沒太多東西行，於是兩姐妹轉戰原宿！
　　行到原宿，發覺原宿的東西比涉谷更適合我們行，雖然都係同涉谷一般旺角格局金鐘價格，原宿比較多些小舖頭及有條類似花園街兩邊有小舖頭的竹下通可以行行，也起碼有間SNOOPY TOWN可以睇下Snoopy精品。另外，原宿還有間明治神宮，不過我們抵達時已六點，公園收六點十分，看更阿叔已開始落閘，恐怕關閘後自己不懂走第二條路出番來，所以拍了兩張照後匆匆閃人。著名的神宮橋聽說有很多cosplay人出沒，但我們卻見橋上貼了張告示，一堆日文中估計說叫那班cosplay不要在橋上聚集，所以是日我們甚麼cosplay人也不見。
  
　　逛到這裏後，也差不多留番精力明日決戰宮崎駿美術館，於是乘JR返新宿，並在近車站的思こ出橫丁求其找了間拉麵館攪惦埋個晚餐。今次衰在呢位老闆改埋晒堆靚名俾佢的湯麵，甚麼月見、月乜兒，都唔知係乜，穩陣起見唯有指著唯一看懂的餐牌「肉」叫了兩碗，原來日本呢類小型食肆興落order時已俾錢，於是見人點做照跟囉，八百日元已攪惦二人晚飯了，又可見識一下這些小型食肆的風味，不錯不錯。
　　醫飽個肚就係時候回酒店了，從車站沿著甲州街道直行，行行下妹子指著間吉野家話應該呢度轉入去，就因為呢句說話開始了迷失東京之旅……後來才發覺原來我們轉早了兩個街口！間酒店明明在東京都廳隔離，我們卻已行到都廳後面都仲未見到間酒店，就快行到新宿公園去左人地露宿者之家了，我說沒理由，酒店明明在都廳隔離，怎麼會唔見左架！總之認住都廳，酒店一定在其附近的。如是者二人就圍住個都廳轉左大半個圈，之後終於見到華盛頓酒店了！可能之前那間巨蛋酒店太好，對比之下對華盛頓酒店的感覺是很殘及Cheap，連衣櫃也沒有，所以各位一定可以放心，不會忘記東西在衣櫃內。成間房得一隻窗，不過算啦，有個地方睡就已經可以了。
　　早早休息，第六日決戰宮崎駿美術館！… 繼續內文

　　貴酒店果然係貴酒店，巨蛋酒店個自助早餐都好食過人，個乜乜蛋餅好好食架！仲有意粉生果任食，簡直係正呀！朝早要食飽些，因為迪士尼裏食店太貴，早餐食飽些，午餐可以Skip齋食晚餐得了，可以省回荷包不小。食完早餐，眾團友就向迪士尼樂園出發了！大部份團友都向原案迪士尼進發，但三年前我們來的時候，已經連無無聊聊一堆日文的灰姑娘鬼屋都掃埋，真係無乜野無玩過了，所以就決定去迪士尼海洋，全團得另一對富豪夫婦跟我們一樣決戰海洋。在原案迪士尼門口等領隊安頓好那一堆家庭裝團友後便向迪士尼海洋出發。但出發時竟然發覺多了一對母女去迪士尼海洋，原來她們兩邊也去，還自費三百幾四百蚊港紙一位入海洋，果然是有錢人家，有錢亦豪至此，莫說香港人無錢呀！
　　入場前已聽過同事朋友及領隊對海洋的評價，「細、無乜野玩、幼稚」，亦由於這個評價，一直認為可以海洋可以慢慢行、慢慢玩，不過當捱到出場時，回頭一想其實係不應抱這樣的心態的。無錯，迪士尼海洋對比起原案迪士尼來說的確細，無太多機動遊戲，而機動遊戲對比於環球片場、富士急等來說是幼稚的，但絕不代表要行晒是件易事。說回正題，一入場見到那個地球，就不其然想起環球片場個Logo，再行入點就進入第一個區地中海港灣。這個區域的建築物的確幾似地中海建築，幾漂亮。呢個區域有貢多拉坐，那位划船的哥仔的確幾熱情，我見隔離船那個船夫都不像我們船那個那麼喜歡講野（一堆聽不懂的日文），還唱了兩嘴意大利歌……

  
　　由於領隊的極力推薦，於是一開波就跑去失落河三角洲地段想玩Indiana Jones，怎知經過發現港區時發現n年前Twins拍音樂特輯時的水上逗趣船無人排，於是拿拿聲入了去玩，還要左邊一次右邊一次咁連玩左兩次，後來夜晚又行番黎呢鼠再玩第三次，簡直欲罷不能，此船其實有點像水上咖啡杯，在水上不停咁轉來轉去……玩完逗趣船後見另一重點遊戲風暴騎士都無人排隊，於是又走去玩埋先，簡單來說呢個遊戲就是動感映院再加噴水噴風功能，都算好玩的。
 
　　終於跑到Indiana Jones處，發覺根本用不著拿Fast Pass，因為實在係無乜人排隊！這個遊戲係坐車車入去探險，基本上係黑、噴風、同左右搖搖咁，不刺激，但幾有趣。出來後發覺原來最尾滾大石閃電時係影左相的，影出來的效果又係有兩條傻婆在傻笑，不過隔離那張仲攪笑，有個小朋友用手掩面唔敢睇，睇到我們成班人笑到扒晒地。呢個區域無太多遊玩設施，影相位也不多（可能懶得滯無行晒），於是又匆匆向下一個區域進發。
  
　　阿拉伯海岸亦即阿拉丁遊玩設施的基地，因為家人對神燈老妖的特殊癖好，對這區任何關於燈神精靈的陳設也特別注意。燈神旋轉木馬妹子當然霸住隻精靈來坐，令人比較意想不到的是神燈劇場，起初以為只是普通立體劇場（戴個3D眼鏡），豈料是一個真人魔術表現配合卡通人物同時演出的節目，兩者配合得很好，最最稱奇是精靈會跟你開個玩笑的！咪當齋睇戲咁簡單！另外這區亦有個辛巴達七海航行，又可以坐船船去睇木偶公仔，這個船船入面的木偶弄得很精美，會眼眨眨同口郁郁的。
  
　　下一個區域係小魚仙主題的美人魚礁湖，有室內同室外設施，室外有個超短程過山車同彈彈下的旋轉寄居蟹，這個旋轉寄居蟹可說是成個迪士尼海洋最激的一個了！轉轉下會擰轉頭彈彈下的，不過對比其他遊戲仍然是超幼稚……區域的室內部份裝修得像水晶宮般漂亮，也估不到在幼幼稚稚的噴水區域穿來插去竟然是好有趣的，可能平時太少機會咁樣玩水。室內所有幼稚玩兒全被我們掃場，咖啡杯更加玩了兩次！我懷疑阿妹真的很久未玩過咖啡杯，她對迪士尼海洋裏任何轉轉的玩兒也特別有興趣，包括轉來轉去的逗趣船及咖啡杯！裏面仲有個美人魚劇場，以空中吊起那堆魚蝦蟹營造海底效果，尚算新鮮。
 
　　玩餐飽後行番去地中海區域睇巡遊，我們去的時段真的不太好，地心探險之旅不開放，夜間巡遊也不做，只有白天的巡遊可以看。海洋的巡遊當然也在水上發展，米奇老鼠等全部坐好漂亮的船船出現，另加一大班英雌駕水上電單車在湖上穿插，真的大部份駕水上電單車的都是女人來的呀！眾多船船之中，唐老鴨的那隻算最矚目，因為有條唔知乜龍跟住隻船後面。這個巡遊另一攪笑地方是美妮會上了岸跳一會舞，之後棄船再俾米奇拐帶上第二隻船，於是睇完後我就說了句：「有冇攪錯！米奇拐帶美妮呀！」也於睇巡遊期間，我們打開乾糧袋，吃著那個奶油包同豆沙包，攪惦左個午餐。呀！差點忘記了，自從九一一後，入迪士尼要查袋，帶乾糧千祈唔好帶得咁誇，會俾人收左架！
 
　　充完電後，去了神秘島區域，地心探險之旅不開放實在係太過份，亦令這個區域無晒野好玩。海底兩萬哩實在係好幼稚，無人排隊兩丁友可以坐晒成隻潛艇，入面又焗又睇堆假魚，一睇就知個潛水效果係隻窗放水啦，我妹話唯一仿真度高係潛艇裏面又熱又焗，真的好像不夠空氣般……匆匆睇完就向美國海濱區進發。美國海濱區就更加乜玩野都無，唯一係影下相咁囉，隻大郵船係餐廳來的，唔幫襯無得入，吝嗇！不過這區商店較多，同埋賣的東西較其他區靚同實用。
 
　　原則上去到這個時刻已叫做大致上行晒成個迪士尼海洋，於是我們就放軟手腳再返去某些區域玩多幾轉同找卡通人物影相。精靈是必然要找的人物之一，米奇同美妮因為太多人排隊俾我們放棄了，唐老鴨、高飛狗、精靈、松鼠等全部都掃晒，最難頂要說阿拉丁同茉莉公主，我想這對演員可能都會同樣覺得惡頂，終日扮恩愛望得多都厭啦！隻馬騮就好攪笑，成日滿場飛跑來跑去搵番阿拉丁，搵完又分開再跑過。精靈就麻麻煩煩，成日擰來擰去個頭，等左好耐佢至肯擰完影相。就咁行下行下，當行到五點幾時，才發覺錯過了個要塞探險同隻古船，果度都算幾靚架嘛，於是又再去兜番個圈。要塞裏有不同建築同一隻古船，那邊亦有堆大炮。大炮雖然係假，但拉下掣都會發出炮響同噴煙，算幾有氣氛。就咁行下行下又坐下貢多拉，係時候食晚飯了。是日晚飯要算自己掏腰包最豪一次，兩丁友食左成百六蚊港紙食兩碟意粉，好貴呀！
　　食完飯基本上已開始覺得累，不是十八廿二的我開始頂唔順，於是開始掃埋那堆小火車同蒸汽船，貪佢有得坐下抖抖。行多陣再掃下商店，已差不多放煙花。其實迪士尼海洋的夜景都算幾靚，地中海港灣望過去真的很有去了地中海的味道。開始見到人霸位後，我跟妹子也求求其其找了個位，向著原案迪士尼裏座城堡方向望過去等待。迷失東京果然係迷失東京，原來個煙花唔係係城堡頂的，係在其後方，但亦因為這個錯誤的以為，自己個求求其其的位竟出奇不意地變了個絕佳的睇煙花位置！無心插柳竟然霸到個好位！太神奇了！
  
　　睇完煙花都差不多夠鐘，去番入口等領隊來。玩完一日覺得長此下去，迪士尼海洋都可以考慮執笠，因為無乜人又無乜野玩，再俾佢發展新玩意的空間又不大，不過如果迪士尼個版權都夠佢捱咁日子的話，都可以拖下的。上車時遊原案迪士尼的家庭裝團友大多滿載而歸兼累得睡到死豬般。個個玩到創晒的團友番酒店後就係整頓行裝的時候，因為這群團友明天就要回香港了。我跟妹子Stay Behind的，所以今晚我得好好執拾好行裝同想清楚有冇野遺漏，但妹子也是累得很快睡到死豬般……… 繼續內文

　　是日在溫泉旅館吃過自助早餐後，旅遊車向著多摩市進發！多摩市，多麼動聽的小鎮，也好像是動畫夢幻街少女的背景藍本小鎮，整個多摩市都充滿著一種假日氣氛，沒有繁華急速的感覺，很是舒服。說回正題，其實是日去多摩市的目的，是為了去HELLO KITTY LAND。領隊見我們呢團小朋友眾多，於是決定延長逗留時間至兩個半鐘，但午餐就要自己攪惦埋。未去HELLO KITTY LAND前，已聽朋友同事領隊等說這是個幼稚的地方，算吧！反正我也是個幼稚的人。整個HELLO KITTY LAND主要圍著那棵生命樹去建設，棵樹的確幾靚，樹裏面有個HELLO KITTY祈願地方，及有魔鏡玩等等。

  
　　入到去當然不能錯過整個樂園最值得玩的船船，坐去睇一眾Saniro人物陳設。但是……點解無大口仔架？我去HELLO KITTY LAND目的係為左見大口仔，點解無大口仔架！嗚嗚！終於到船船臨完場的人物大聚集時，見到大口仔的蹤影，於是亡命狂影，連大眼青蛙叫我們望鏡頭也不知道，結果影出來的相就只見兩個傻婆在拿著相機影相……另一值得玩是那個3D劇場，今期公演的是3D One Piece，由於基本上是為活動坐椅而設，劇情就唔好提了，最後硬整一幕櫻花飄落配合索帕劇情其實幾夾硬黎，不過那堆櫻花又整得幾立體同噴埋櫻花香味，算最為可觀的一幕咁啦。
　　行下行下轉眼間又兩個鐘，行去HELLO KITTY LAND的購物部，感覺同行入香港任何一間Saniro專門店實在找不到多大分別，尤其是大口仔的東西比香港還要小，有冇攪錯！也基於同香港Saniro幾近差不多樣又裏面的東東大部分Made in China，所以HELLO KITTY LAND的收鑊係零。行到十二點四匆匆衝出HELLO KITTY LAND往多摩市集直奔，發覺呢個市集實在很美，應該早點衝出來行，但現在發現已經太遲，我們的時間只夠衝入麥記買外賣套餐。係呢個時候身體語言又再發揮作用，手指指買個套餐，麥記阿姐也很醒目立刻拿出一個英文Menu給我們指，基本上我們係認圖唔認字，跟著好隱約咁聽到佢堆日文問題中有Set呢個字眼，於是答佢Set-Do！Take Out！呢位阿姐都算醒目，明白我們在攪乜，好，就咁就攪惦個午餐了。
　　食完麥記上旅遊車向著東京市中心出發，下一站銀座！銀座也是三年前來過了，今次鎖定目標為博品館及佢隔離的BURBERRY！博品館果然有很多有趣的玩具，但價錢同樣地很有趣……銀座BURBERRY仍然是沒有背囊款式的袋袋，不過我都照掃了個手提款的，因為我原來連一個手提袋也沒有……掃貨完畢循例地去銀座嘜頭車站留影，迷失東京主題又再度發揮，唔記得左個車站位置，又向著錯的方向搜索……今次給妹妹找到正確方向，速速影完相番上車向著六本木進發。
　　在往六本木的途中，旅遊車終於很近距離地經過了東京鐵塔一次，妹子很興奮，因為她很愛呢個鐵塔，我一見個鐵塔就想起神威和X，跟著就想起佢爛尾的事實……六本木是因為近年落成的Roppongi Hills同Mori Tower至興起成為旅遊點，但裏面的店舖全都是高檔路線，連豪情團友都忍手無買野，如果不是有個朝日電視台有些精品同可以同甩鬚叮噹影相之外，我想留在這裏多點時間我會發呆同睡著……
  
　　遊覽完六本木後，我們又再次返到新宿豪買同豪食。團友全向新宿的伊勢丹、OI系列掃貨，我跟妹子則跑了過Times Square行TOKYU HANDS同紀伊國屋書店。TOKYU HANDS果然好多奇怪野買，但最好都係買食玩盒蛋，睇住佢上架可立即掃心頭好，呵呵！紀伊國屋就單行地下層漫畫都可行了大半個鐘，堆畫集竟然有開封裝作Sample試睇，實在係正！就咁行下行下又夠鐘今晚豪食，是日晚餐長腳蟹任食自助餐，原則上我係唔多識食蟹，但無理由咁蝕本，所以點都食番小小，食落又唔知有乜好食，加左檸檬汁咪得個凍字同檸檬味囉……妹子原來唔聲唔聲，攻左好多壽司我都唔知，我就乜都食下咁囉，呢餐應該無蝕本掛。
　　是晚由於新宿太子爆棚，所以我們升grade了去TOKYO DOME酒店，酒店後面就是有名的巨蛋球場（童夢個巨人隊個場呀！）同後樂園！後樂園個遊樂場有著名的穿摩天輪穿大廈過山車，望埋去都好激下！但時而夜深甚麼也沒得玩。是日球場休息無波打，所以附近商場也很靜，而我跟妹子竟發現這裏有間少年JUMP專門店，門口已經好吸引，真的想入去看看，但開成十一點，都跟團出左去玩啦，睇鬼睇馬咩……
  
　　是晚酒店果然係靚，也睡得很舒服，沖涼房也很正，很快覺覺豬，第四天待續。… 繼續內文