將軍返黎啦

將軍返黎啦  被老麥收埋一時的將軍漢堡又返來啦。回想當年新推出時,簡直瘋狂地迷上此飽,幾近次次幫襯麥記都要食這隻飽。昨天看廣告見到將軍重出江湖,又今日因工作趕急未有足夠時間,便去幫襯老麥試下今次的將軍漢堡,可是卻大失所望。
  不知道是我幫襯的那間老麥有問題,還是今次老麥真的有所調整,整個將軍漢堡的SIZE感覺縮水!我柯打了一個將軍漢堡餐,心想這麼趕時間可能未必吃得晒一個餐,可卻發現當我吃完一個餐,還不是很飽!整個將軍漢堡好像給壓扁了般,首先望見已經不是太開胃了,裏面的醬汁依然是甜甜地的,還算保持水準,但那堆生菜,唉!大概十隻手指可以把那幾條生菜數完,心想真的有冇搞錯!至於薯條,這間老麥更加的神奇,薯條是激幼類!從來未試過食的薯條是這麼幼條狀的,這真的算是中薯條嗎?總之就是食完後一股被整了的想法湧上心頭。估不到之前的美好回憶就給一間馬虎的老麥恨恨地摧毀了。
  家下價錢又貴,野又不好食,從前價廉造福學生的麥記睇怕已經一起不返了……… 繼續內文

重慶森林食咖喱

  去完印度實習定交流的未來醫生表弟某天打來我家,說要請我們去重慶森林吃咖喱。雖然一直也有聽聞重慶大廈有很多好吃的咖喱店,但對於並不熟路的普通人來說,實在不敢貿貿然闖入這個重慶森林裏面。既然表弟說請我們去吃,有得吃當然我們一家義不容辭,應約前去。久居鄉郊地區的表弟錯誤估計星期五放工時候的尖咀車站人流,約我們在尖咀車站恆生銀行等,單是被人潮撞來撞去都撞到散了,等了一會,終於集齊人馬殺入重慶森林。
薄餅、燒雞仲有咖喱,預備開餐!  重慶森林果然一如所之充斥著無數的印巴籍人士,個個都體格魁梧,非常健碩。絕不是歧視,但是當你走在街上如果被一大堆彪形大漢包圍,縱然對方無所企圖,你也會有些心理壓力驚驚吧,所以無人帶我們絕不會貿貿然自己走入重慶大廈。表弟訂了位去一間在七樓的7E咖喱館吃咖喱,之前阿娘聽錯,還問甚麼乞衣咖喱館。一架小小的電梯,只能坐最多九人,但有阿爹搭乘,七個人已經閃了閃客滿燈,就是因為電梯小,等電梯也花了不少時間。終於到了咖喱館,外表看來一如想像是唐樓般入面有些小餐館的模樣。坐下不久,侍應放了一客脆餅及一個綠色醬料說是送的。一看綠色醬料,滿以為是甜酸汁或醋類,便把脆餅沾來吃,入口覺得醬料有少許酸酸地,以為是甜酸醬之流,怎料吃下不久,口中散發著一種強勁的辣味,而且還持續揮之不去。不吃得辣的阿姨當然猛飲水,我們一枱也不禁叫「乃野」。
  看著餐牌,大家都望著表弟看看他有甚麼推介,結果表弟只望了一眼個餐牌,然後舉手叫了聲「Where is Johnny?」,就叫了Johnny出來幫我們發板,叫了咖喱羊、雞、牛、魚、雜菜及咖喱角,燒雞還有四款薄餅。原來餐牌不是用來看的,在座枱枱都幾乎是舉手叫Johnny,餐牌是叫Johnny!菜式都是叫Johnny,原來如此……不消一會,菜式飛快地上晒枱,咖喱角普通啦,跟在灣仔的乜乜咖喱館差不多,那個有磨碎合桃的咖喱牛幾好味,所謂消脂咖喱雞有小小甜甜地唔錯,咖喱羊算幾辣,不太吃得辣的阿姨、妹子及阿爹對咖喱羊宣佈棄權。芝士薄餅好正,在洋葱、薯仔及原味相比之下最好味,但吃得多很「膩」,很快便飽了,我想如果用來送飯會比較好,無咁滯。
  埋單總結,每人都是六十幾元,算幾經濟。不過對比之前吃的咖喱館,及食物的Size,又好像沒想像中那麼特別,不過都算是一種經歷啦。… 繼續內文

食LUNCH也很難

終於有得食啦!  今日跟同事阿SA去食LUNCH,本來阿SA提議去食餃子,好衰唔衰我又多口話餃子舖老闆的惡行被人POST了上網,道德評價低,於是就因為這個無聊理由轉移陣地,亦就咁開始左今日的LUNCH長征之旅……
  第一選擇餃子店被道德評審OUT了後,阿SA又提議去食生果炒飯餐,我話好呀,又健康又好耐無食,仲可以食燉蛋呢!正當我一路行一路盤算緊叫炒飯食再加個燉蛋食會唔會太飽之際,噢!出現在眼前的竟然是落了閘的舖頭,望埋去直頭是關門大吉FEEL!只是一排無食,咁對我地呀!既然都行左一段路程,我們立刻轉移去第二選擇,到閣樓餐館食泰國野!正當我又諗緊今日有冇冬蔭公湯飲時,砰!泰泰餐館無開到門,唔係又執笠呀嘛?遭遇連番挫折,心想已經行左咁遠去食LUNCH,不如再行遠些去新開商場試新野,點知問過食蕉,原來未開舖!出面張海報大大隻字寫翡翠拉麵小籠包,但行OPENING SOON字細到幾乎睇不到,頂!
  經歷完一輪挫折,又行左這麼久,我們終於決定去超級大後備上海菜館食客飯吧!又經濟又實惠,仲可以食小籠包,點知去到街口,登登登登!連舖都唔見埋,現場遺址已經化身成一間廁具店,我們還未食LUNCH,唔駛咁快幫襯廁所住!天呀!到底做錯左咩,去親邊間餐館都執晒笠架?一日最衰都係餃子店老闆!我的燉蛋呀冬蔭公呀仲有小籠包呀全部都無晒,一於入晒佢數!
  終於在上海野遺址隔離,幫襯左一間都唔知轉左幾多手的西餐廳食了個SET LUNCH,終於有得食啦!咩都好啦,行左咁耐腳仔軟又肚餓,有得食就算啦,嗚嗚!飯後阿SA再去試試諗住幫襯阿伯買番個砵仔糕做甜品,果然又不出所料,影都唔見,最衰都係餃子店老闆,搞到我們今日幾乎無飯開!事後,事前衰多口話唔幫襯餃子店的在下,當然地遭受指責,成為今日幾乎無得食的LUNCH之旅的千夫所指,唉!… 繼續內文

原塊豬扒扭扭粉早餐……No GOOD!

  不知是否之前放假太多,過完本星期,實在覺得散晒咁滯,星期三打後放工回家已經無晒精力,想話回下帶K下書都無力,結果令到床頭那堆書越堆越高,不知何日才可清理書債。經過一晚非常好的睡眠後,今早跟妹子去了樓下老麥試試新的豬扒扭扭粉。樓下老麥的服務水平與往常一樣是如此的差。櫃台那班姐仔不單速度慢又無禮貌,還像遊魂般時常拿漏野,隔離枱對母子買熱香餅套餐,又無刀叉又無糖漿,激到幾鬼嬲。廚房班哥仔個個企係度,淨係識出早晨全餐,熱香餅呀扭扭粉呀仲有包包一律唔識出,淨係聽到班人猛話DOWN乜DOWN物,即係話乜都出唔到啦!如果唔係近都好難令人幫襯。
豬扒扭扭粉  講番這個原塊豬扒扭扭粉,首先別看映出來這麼大碗,實際上的份量要來得小得多(不知是否樓下麥記服務差所致),豬扒基本上是採用之前咖哩豬扒包那款豬扒,真是非常爽口,但就只得爽口二字,食不到豬肉味,感覺尤如咬任何弄到很爽的肉類一般,再加上本身已算淡口(無乜味唔代表清淡!)的扭扭粉,實在麻麻地好食。豬柳蛋扭扭粉都叫有隻蛋,這個豬扒扭扭粉就連蛋都無,淘大出個叮叮豬扒通都來得比老麥個扭扭粉好食,花近廿蚊食這個早餐實在不值!平價老麥時代已經過去,接下來只有這比較「健康」也比較貴的老麥快餐店罷了。
  附帶一提,是日上完Aerobic後見到隻大狗,身上穿著件「POLICE DOG」的狗狗風褸,陪主人在某某餐廳門外買叉燒飯。係真唔係呀?係咪退役警犬?定係佢主人同佢裝假狗?… 繼續內文

和民食食食

  因為贈券就快到期的關係,相約了妹子及白賴仁到和民食左張贈券佢!一直以來雖然知道和民是出名,但基於吝嗇的性格使然,一直從沒踏入過和民半步。今天一約就去了尖東的和民,去好似好高尚的地區食食食。由於順路關係,搭了好久沒坐的天星小輪,估不到今日搭的那隻船已經48歲,也估不到原來除了火車地鐵會有前面列車尚未開出塞車之外,船都有前面碼頭小輪尚未開出,本班船將稍遲片刻,不便之處敬請原諒。但要知道船在海上但車在路上,陸上停車當然就是停係度,但海上停船就會被浪攪到拋拋下,真係好玩囉……

和民沙律 和風比薩好好味! 這個焗飯的味道很特別及古怪
刺身好食 燒餅也非常好味

  講番主菜和民,食物的確幾好味,我們三人Order了和民沙律、牛舌燒、和民海鮮燒餅、和風比薩、三文魚刺身及海鮮焗飯,全部都幾好味。沙律好好味,和風比薩同燒餅都幾特別,好好味。食到飽飽,拿出贈券準備找數,豈料侍應姐姐拿帳單來的時候,一看嚇了一跳,一百三十幾?有沒有攪錯?咁平早知叫多些……再看清楚一點,原來姐姐已經幫我地用贈券扣埋數,傻仔啊!食完還跟妹子笑說這些高檔食肆有排都唔會再食,怎料回到家卻見到……沙田和民重開大優惠券……呵呵呵……… 繼續內文