這一日的東涌昂坪之旅源自於一個自助餐。話說大約一個月之前，正在跟同事吹水談論如何跟阿娘慶祝生日，同事提議不如去東涌Novotel食自助餐，又話抵食云云，如是者便打電話打算Book枱。沒料到的，是這間酒店的自助餐竟是如此旺場，九月尾去Book，一訂便已經是10月尾才有位，結果慶祝生日變了純為去東涌食自助餐，又因路程太遠，再加上很久沒旅遊，於是由自助餐開始決定了今天的昂坪之旅。
吃過早餐，搭過E42後，只見昂坪360的東涌站又見人龍，唔係又停呀嘛？幸好，只是短短排了一會兒便買到票上昂坪360纜車。由於人數較多，工作人員安排每架纜車坐十人，每邊五個，都幾擠迫。昂坪360由東涌站開始，越過東涌灣就要第一次轉向，跟住跨海再上山，去到彌勒山再轉向一次，之後就會遠遠的見到大佛同落番山去昂坪車站。跟去首爾時搭的龍平纜車相比，昂坪360車廂更加大架，跨山跨海的幅度更廣。首爾龍平纜車只是沿著山上山，纜車跟地面距離不是太勁。昂坪360則跨山又越海，由機場島轉向站至北大嶼山郊野公園山頭的一段，長一長也沒有纜塔，真係厲害。也因為跨得咁勁，真係大風一點也都吹吹吹，尤幸這次搭纜車沒有停過！
歷時25分鐘車程，又到昂坪車站，臨落車不忘在那隻靈猴影相位擺Pose，點知個影相原來係慢一拍，拍出來變得有點騎呢……貼住車站的仿古昂坪市集，商舖一點也不古老，只見有勁多外國人係euro go go同Starbucks前的露天茶座嘆茶，好似去左赤柱。與佛同行同靈猴影院也在這裏，但好似無乜人入去。探完市集個廁所後，便向天壇大佛出發。跟爹娘談著，才發覺自己上一次去大佛竟是十年前！大佛依舊莊嚴的屹立在昂坪，但這十年我們卻改變了不少。大病後的阿爹還是夠氣跟我們走這麼多級樓梯上大佛，值得一讚呀！
從大佛下山後，見到有路牌指示去心經簡林，心想時間尚早，就去看看吧。不過心經簡林的指示牌很有問題，一個話15分鐘就到，一個就寫10分鐘，又唔係太大過，見到前往心經簡林途中的餐廳仔個指示牌仲多過心經簡林個牌。行去心經簡林的小徑，平坦又樹多，老人家行都無問題。不一會兒就行到心經簡林，不過大失所望，果度搭晒棚，唔知到底係度噴緊殺蟲水定攪防腐了，簡直大煞風景。阿爹直頭想投訴，攪到咁款應該係路口出指示話維修，而唔係等人行左15分鐘入去至見到如斯田地然後個個氣結。簡林的木都已經開始爆開，支支木頂都有鐵框夾實塊木，聽到有遊人話這個心經簡林係我地對抗大自然夾硬插些木條係度的惡果，係天譴而攪到宜家要維修，我覺得都講得幾對。簡林對住上鳳凰山的路口，遠望番呢個鳳凰山，都幾有氣勢。
由心經簡林行番出來，經過茶園餐廳食左個豆腐花，又去玩人家的聚寶盆，點解得阿爹整到水花架？行完順道去寶蓮寺望左一個圈，很多東西依舊，行入去感覺都幾清幽，除左見到好多外國人之外。逛完一個圈，又番到市集排隊等纜車出番去東涌。如果有時間的話，由這裏去大澳一遊也是個不錯的選擇。排了一會兒後上到纜車，今次工作人員安排八人坐一架，比從東涌來時坐得舒服得多，又不知甚麼原因，回程時車程快了，坐了20分鐘左右罷了。可能行完山比較累，今趟回程都係坐定定，間中跟對面線經過的纜車及轉向站的工作人員揮手致意。
回到東涌，再在東涌纜車站精品店逛了一會兒，就去東薈城逛逛。東薈城現在有很多名店Outlet，但我覺得，部分Outlet只係掛名Outlet罷了，舖位都不是很大，賣的東西也不是很平，並未能吸引到我們購物。終於到左今次旅程的重點自助餐了！正如開頭所講，這次去大嶼山遊玩的重點也是因為自助餐，再加上行完昂坪肚子餓餓，自助餐我來也！Essence果然名不虛傳，自助餐有好多款式，收碟速度快服務員態度亦非常好，食到飽飽。最攪笑的，是阿爹成日去阿叉前面等佢整薄餅，結果走人時阿叉整整下餅都同阿爹講Bye Bye。
就咁就完成了今日近乎完美的一天，好開心呀。