怪客列傳之182霸王花

  由於爆假關係,今天在家休養生息回帶睡覺,適逢舊同事嘉莉從加拿大回港聚舊,便搭乘182到港島參加飯局。在總站上車後,便霸著有利位置小睡一會,怎料182還未離開沙田,便發生事件,在新翠的站前,司機(司)停了車跟某阿嬋乘客(嬋)在嘈著。
司:喂,阿姐,入錢呀!
嬋:(帶有濃烈鄉音)我咪入左囉!
司:入左?你入左三個幾,未夠數喎!
嬋:我入左錢啦,你睇錯左呀嘛!
司:睇錯?你前前後後都用八達通,點會錯呀!
嬋:入左啦,快D開車啦。
司:開車?你禽日又係咁,禽日入五個幾,今日仲離譜入三個幾,我認得你,睇住你入錢架。
嬋:(前面較細聲聽唔清楚佢講乜)快D開車啦,入左錢啦你咪屈我。
司:各位乘客,唔係我唔想開車,但呢位阿姐未入夠錢,你可以過黎睇下佢唔夠數,未解決我我唔開得住。
  接著,阿嬋繼續跟司機互相爭吵著,車上其餘乘客開始不耐煩,紛紛叫這位阿嬋落車。
嬋:落咩車?我畀左錢架!
司:你畀唔夠錢呀,阿姐!
  司機與阿嬋的爭吵,開始演變成車上乘客與阿嬋的罵戰……
乘客甲:落車啦!
乘客乙:咪阻住晒,落車啦!
乘客丙:報警啦!
乘客丁:十六蚊車錢畀得三個幾,仲要發爛渣,有冇搞錯!
乘客甲:你無錢扮下可憐都話,但宜家佢擺明發窮惡喎!
乘客乙:有冇聽到,唔係第一次啦!
乘客丙:報警啦!
乘客丁:報警?搞好耐架喎!
在下:拍佢片擺上Youtube啦!
  經過車上乘客一輪圍攻,這位阿嬋終於叫做屈服,畀多五蚊雞……
司:收費十六蚊喎阿姐!
嬋:老人半價呀!唔得呀?(點睇佢都唔似老人喎)
  由於擾攘了好一段時間,站頭也要讓出給下一架巴士使用,司機在阿嬋給了八個幾車錢及乘客的「開車」聲之下開車了。車上有部份日日搭這班車放工的乘客說認得這件阿嬋,她應該也是因為放工搭這架車的。部份乘客討論說,既然日日搭那架車,日日碰著同一個司機,無理由可以騙得到車錢的,也有乘客認為,已經少放車資,還要聲大夾惡地發爛渣,就算真是經濟困難也惹人反感,實在無理。我只是想著,金融海嘯下其實人人也咬緊牙關過日子,司機其實可以不作聲,乘客也可以不作聲,但當看著自己努力別人卻白白坐享其成的時候,就真是忍無可忍,必定要起身反抗,伸張正義。

  1. Katy Wong

    應該報警!件事點都要鬧大一次,一了百了。好過日日都拖,日日阻住個地球轉。

  2. Carmen Lai

    巴士司機做得好! 唔出聲, 容乜易係記者/公司放蛇架?
    應該報警添啦! 佢知要入多幾蚊, 分明就係知道全費幾錢啦!
    至憎d人恃老賣老(呢件仲要可能未夠秤添) !
    應該影佢相, 貼向站頭添呀!

發佈留言

發佈留言必須填寫的電子郵件地址不會公開。 必填欄位標示為 *

*