乜乜風暴——真人版

　　自從樓下的茶餐廳被領匯買起重新搞作以後，對要每周六日幫襯老麥早餐已經越來越忍受不了，所以許多時候都會選一日去馬鞍山或是新城市廣場食早餐。今天又好像平時星期六日般去新城市廣場食早餐，卻碰著一個令人哭笑不得的細路哥。
　　話說在新城市廣場大雞樂食完早餐正在嘆阿華田之際，隔離檯突然傳來一陣哭聲，一名貌似五、六歲的小孩正在哭著向她的祖母扭計：
小孩：我要買呀……嗚嗚……我好想要呀……嗚嗚……買畀我呀……（一貫典型的扭計買玩具格，雖然唔知佢想買乜）
祖母：……（無答佢，繼續自己飲野）
小孩：嗚嗚……（繼續扭計中，越來越大聲，祖母繼續無理佢）
小孩：（突然大聲叫喊）你唔買野畀自己唔緊要，但你一定要買野畀我！
　　此時旁邊食客無不呆了一呆，甚麼？一定要買野畀佢，皇帝咩？祖母繼續無理佢，杯野飲完準備走人。
小孩：你唔要啫，我要呀，買畀我呀！（開始一副命令口吻）
祖母：（執好袋，離開坐位，向著細路講）走啦！
小孩：（坐係位度唔肯離開拍檯兼大聲講）買畀我呀！買畀我呀！
　　祖母已經行到差不多大雞樂門口，這位小朋友開始發難並爆出驚人語句！
小孩：吓！你就咁就走左去？你真係夠膽就咁走左去？嗚嗚……你咪走呀你，你走唔甩架！你小心D呀你！我唔會放過你架！（邊大聲叫喊邊追著祖母向著門口跑去）
　　我相信，如果無人睇到是小孩與祖母的話，還會以為是爛仔打鬥，甚麼我唔會放過你，你睇住黎之類的說話，雖然無粗口夾雜，卻也已經一副吵架勢。小朋友扭計也很正常，但對著自己的祖母吵鬧成這樣，真是少見，到底是小朋友不明白所說之話的語氣重量，還是他根本就習慣這樣對家中各人呼呼喝喝？小朋友很容易耳濡目染身邊的一切，這些尤如那堆乜乜風暴中的勾心鬥角對話，還是留待小朋友懂明辨是非時才教吧，說到底，家教真的很重要，否則真的很易失禮全家……