垃圾會新界東選舉亂談

  昨天看了有線的新界東選舉擂台,那兩分鐘互相毆鬥時間都幾好笑,嘈到幾乎聽唔到班人講乜,反而民賤聯同豉油黨互相做馬仔還讓大家聽到他們講乜,不論他們講的是廢話還是狂言,最起碼是聽到他們說乜,長毛都唔錯,一講就說你唔駛答,不讓別人浪費那兩分鐘SHOW OFF時間。言歸正傳,四年一度的垃圾會選舉將在九月七日舉行,今屆可能因為受奧運影響,總覺得選舉的氣氛不及上屆濃烈,在收到眾候選人的簡介後,即管等我亂談一下。
  首先當然要掌聲鼓勵那兩張有機會損失五萬保證金的高危名單:2號蕭思江、容超榮及6號李子榮!蕭思江自上次港島區補選的騎呢招式後已教人認識,但睇其的簡介還更爆笑,著有文學小說並八獲提名諾貝爾文學奬?佢自己提名自己呀嘛?佢兩個騎呢做乜無端端走去新界東玩呀?至於6號李子榮,雖然他的政綱都相當關注民生,但以無政黨無人氣無人識的情況下,再加上無乜往績,果五萬蚊都凍過水。3%選票,起碼萬五張至穩陣,上屆曹博士咁有人氣都未能突圍,呢兩位都係祝君好運,也只可以說句,真是有米。

淨係記得隻雞的7號一早褪晒色的3號卿姐無乜建樹的8號捲土重來的4號

  泛民方面,掛正牌的佔了四張名單,其實是上屆彩虹聯盟分拆出來的,有上屆排首位的7號鄭家富名單,標榜環保不派傳單,成班人肉街牌日日企街,還有陰陽路式站在沙田火車站(有冷氣連城廣場內)揮手,你試下企火車站出面無冷氣果度揮手呀,我睇你企得幾耐。政綱無甚突出,印象只停留那張雞仔海報(還要只記得隻雞仔)!3號卿姐名單沙田區無乜做宣傳喎!配票策略?不能褪色?但卿姐你褪晒色呢,今屆垃圾會完全無乜見過你做野喎,政綱亦得個講字,親疏有別,個個人都親疏有別架啦。8號湯家驊名單,我上屆都已經非常唔LIKE佢,完全空降新界東黐落彩虹名單,個人無魅力無政績,挾公民黨之名行走,政網廢到我都識講,齋批評,畀D SUGGESTION好喎。4號黃成智名單捲土重來,上屆我已經覺得佢好唔抵,亦因為唔LIKE湯家驊而沒投彩虹名單一票,今次選舉我會好好考慮考慮投唔投佢。
選舉時才行出來的1號田大少鐵票力量的10號題材空泛的9號師姐堆字好深的5號長毛

  保皇黨背景的1號田大少名單及10號劉江華名單政綱都係廢廢地,講左等如無講的予欲無言般,田大少似乎都係繼續靠食飛哥的豉油黨餘蔭及中產票源,劉江華在沙田區創立的公民力量真的迎成一股公牛力量,具一定的鐵票效力,但北區那邊都還是要靠民賤聯的力量。陳克勤的競選海報都幾靚,個設計唔錯,加上公牛力量,都會將佢列入考慮行列。9號龐師姐,政綱空泛,連選舉論壇時的表現亦都無乜料到,就算是師姐都無情講,不作考慮,但以背景來說,佢可能會分薄田大少票源,有另類效果。至於5號長毛,上屆投佢是想睇下佢點玩轉垃圾會,但表現未如理想,多次被范太紅牌趕出場,個政綱又用埋晒D咁鬼深的字詞,但上屆政綱之一的董伯伯下台又真係做到,都不知好嬲定好笑,都會考慮下會否繼續投佢睇佢點玩野。
  亂談完畢,其實大家想投乜都是閣下自由,不過都像政府宣傳般呼籲一下,用你的公民權,投票表達意見!

發佈留言

發佈留言必須填寫的電子郵件地址不會公開。 必填欄位標示為 *

*