補習天后Amanda

  話說公司於聖誕假後推出新的餵雞系統「豬菲小姐」一世,此餵雞系統乃用偉大的甲骨文作骨架開發。經過之前的一系列測試,我們發現就算提出意見改善系統,最終也只會招致母公司的「惡言相向」說你阻礙公司前進,所以講多都浪費GAS。但此系統的確減慢我們的工作程序,因為我們發現,只是要列印一張VOUCHER,也要經過重重覆覆的CLICK出CLICK入才能成功,做INTER-COMPANY TRANSACTION更加間中出現死機情況,真係嘔晒血。就是因為嘔晒血,小小餵雞主任旗下的一班餵雞文員,雖然接受了一系列紙上談兵式的訓練,也都出現了不同程度的恐慌性反應,包括於事前不斷將埋數文件趕住在新系統生效之前送到你枱面,拿住那本比電話簿更厚卻又大而無當又睇唔明的完全無用手冊在狂K,氣氛緊張。
  終於,新系統登場,要來的始終要來。各恐慌民眾無不爭相躲避,一於等待白老鼠的出現而去觀戰。餵雞主任對這個你等我我等你的情況忍無可忍,出手活捉了第一隻白老鼠,叫其試用新豬菲小姐。災民當然就是坐左係度,須要餵雞主任近乎拖住手教的方式,在千辛萬苦之下完全了處X下海的第一張INTER-COMPANY VOUCHER,而過程中,少不免有大量災民圍觀問長問短,由於餵雞主任的一一解答,漸漸這班災民就當了餵雞主任如補習天后般,一有唔識就大叫,如是者補習天后過了差不多一周的小組精補生涯。
  至於點解叫Amanda?話說其中一位著名「茂利」災民某天又想問人如何使用新系統,於是就向餵雞主任(即係在下)問東問西,但係佢一舉手開口第一句,竟然係:「Amanda呀,我係咪又要用呢個豬菲小姐架?」眾所周知,在下個英文名雖然少見D,但係絕對唔係叫Amanda,果一刻,我腦海完全浮現出TAXI裏羅拔迪尼路果句「Are You Talking to Me?」在呆了一下後,我終於反問佢:「你叫緊我呀?」雖然之後佢即刻問我個名點讀(有冇搞錯,做左三個月同事兼佢上級竟然都唔識讀)而我又教曉佢點讀,但其後佢依然叫左我做Amanda,在無GAS下都無多理佢,但係其他同事就逄要補習天后出動教書時,就會話CALL Amanda啦,結果Amanda成了今期代號,唉!

發佈留言

發佈留言必須填寫的電子郵件地址不會公開。 必填欄位標示為 *

*