寫字樓的白色聖誕

這般的白色聖誕,真係煩  近日寫字樓有很多事情發生非常忙碌。首先新的餵雞系統「豬菲小姐」即將隆重登場,很多截數日無端提前,而一眾下屬對於要適應新系統,部份人員出現恐慌及煩躁的現象而要加以安撫。新系統登場,不單改變了入數的方法,也對前線流程影響甚廣,要通知全線分店相關人員作出改變遷就,真是煩到你嘔。另一方面,即將成立的淋紅油小組須要在寫字樓安排工作地方,估不到由平面圖至電話線電線LAN線都要一腳踢搞晒,班人還對設計圖諸多意見,頂!我係餵雞的,唔係建築師設計師或裝修師傅,一早講左張圖未必依足比例畫,不可盡信,偏偏搞裝修的總務人員對設計圖左QUERY右QUERY,真係好鬼嬲,再嘈我KILL埋幅圖佢!
  今天是公司搞聖誕扒地的日子,對比起舊分舵來說,新分舵搞聖誕扒地的好處是不用夾錢便可食食食(當然是普通到會而唔係酒店貨色,不及舊分舵般HIGH CLASS)還有獎抽,但全程拿住隻碟又無枱去食,食完隻手都軟晒,不過估不到到會食物質素都幾好,我同事更加對甜品泡芙又食又拎。大老闆一面講開場白,下面班餓鬼已經個個拿定碟預備食野,佢一講完影緊高層大合照時,台下班餓鬼急不及待展開搶食大進攻,枱面的食物有如狂風掃落葉般轉眼消失,要到會人員不停補倉。今年大獎是LCD高清電視一部,嘩!論獎品級數,又的確比舊分舵勝一截喎。
  至於白色聖誕,唉!之唔係之前提的裝修事件囉!師傅原定23號完工,但平安夜一早回公司,發現只係拆左牆及堀左地,卻未填窿,查問之下,師傅說聖誕也還要開工。早知之前就不拆爛那堆白枱布啦!回來上班一天,又要舖過枱布啦。除了我那班處於地盤外圍的重度災民外,其他應該不受影響的旁邊鶴也說工程會影響他們而一個二個搞白色聖誕,結果差不多全層都「三級」包晒膠袋。希望今次整好,還要不要像今天般一早上班局部地區性斷電,事關廿七號「豬菲小姐」要登場架!

發佈留言

發佈留言必須填寫的電子郵件地址不會公開。 必填欄位標示為 *

*