近期由於工作漸入境地，多了些時間看看電視，也想藉看電視及睇書，減少玩電腦的時間，事關日對夜對電腦，有時會感到頭昏腦脹，但結果卻又是令電視迷繼續不停睇睇睇。
亞記播的《詠春》，論卡士真是非常強，有洪金寶、元彪及謝檸檬，本來我沒有追看這套劇（因為開始時在看其他外國劇集），但之後見阿爹睇開又跟住睇幾集，發覺劇情簡單直接，不拖泥帶水，打也打得幾好看，便跟著爹娘看了。摒除謝檸檬因素，其實套劇拍得並不差，也因這套劇令我上網查得更多跟詠春有關的事情。劇中人物黃華寶、梁贊、梁璧、梁春及找錢華應是真有其人，連之前套搞笑方世玉裏的嚴詠春、五枚師太都可能有此人，不過，他們有否如劇中人物的經歷就當然是作多過堅了。元彪扮贊先生幾有台型，洪金寶有氣勢，但我睇就尚欠一種味道，令人睇時只覺他是洪金寶，而不是劇中人。至於謝檸檬，可能因配角太勁，又或角色問題，無乜色彩。
至於《靈舍不同》，好大原因會看是因為陳展鵬，他是近年我比較留意的一個演員，因為買了亞視隻經典金曲碟，才知陳生唱歌都幾好聽，又算幾靚仔，加上套劇只是半小時，輕輕鬆鬆胡胡鬧鬧，播出時間九點又剛好食完飯，有空有吉檔咪睇睇。煎PAN跟樓南光之前拍過檔做《一雙筷子走天涯》，今次扮兩父子都OK，小雪呢，抱歉，除了知道她常春某牌子服裝做模特兒外，其他不詳，演出非常一般。套劇都幾胡鬧，但間中又要班演員唱番兩嘴，當笑劇都會繼續睇下，希望不要像《同事三分親》般越睇越無癮吧。
受到newsgroup一眾網友影響，今季追看了福山雅治及柴咲コウ主演的ガリレオ，一個用科學角度去分析案件的物理學家湯川學，加一個有點傻大姐的內海薰，再加上有點似推理的案件分析，實屬剎食招數。福山雅治都有番咁上下，仲同肉酸托腮一樣Keep得幾好，他扮演的湯川學其實根本是一個不折不扣的御宅族，只是他是專攻物理學罷了，性格古古怪怪。不過，有時覺得強以科學角度去介釋案件，缺乏人心理的推敲，再加上硬要切合副教授的身份去迎合故事，覺得有點牽強。湯川教授的招牌寫Formula破案，有時覺得勁多餘，可否減少其寫與案情無關的Formula時間？
同期還有其他追看（或眼尾望一望）的電視節目如Survivor: China（今輯暫時來說比較悶，主要是看外國人眼中的中國）、CSI（雖然Michael Keppler木口木面，但就真係估唔到就咁出一出就玩鬼完佢）、ER（嘩！自從Mark Greene走後無睇，面目全非差點連人都認唔到）、靚太（暫時來說，一個悶字）及Heroes（呢套正，集集追），希望仲有時間K埋堆書佢啦。