強戰世界 War of the Worlds

  七一回歸紀念日,已經開始演變成香港人的遊行活動日,就好像每年一度給怨氣甚重的港人一個發洩的機會,成為一個遊行嘉年華。至於一向對這類活動無興趣的我來說,今日假期當然是出街玩玩玩,今日就約了同事仔去睇強戰世界。
強戰世界官網圖片  將強戰世界當作打怪獸片如Independence Day來看的話必定大失所望,因為無乜劇情講班人點諗計打怪獸,反而有大量劇情講班人點走難,同係呢D絕境中人們的反應,例如人性本來就係自私,湯告魯斯偷左唯一會行的車車,班人見到架仲會行的車車大搶特搶你開槍我又開槍打來打去,仲有一開波成班八卦群眾係都要走埋去睇,又走唔切等等。至於當怪獸片睇的朋友,大概會對佢那快過落雨收柴的結局破口大罵,甚麼也沒說隻怪物自動攪惦迅速被埋單,成班人根本好似甚麼也沒有做過,套片也沒解釋過就完場。睇番newsgroup,大概係因為外星人對地球細菌沒抵抗力,又加上他們以人血作飼料,中晒菌所以天然攪惦。都唔奇,我地用咁多抗生素整出堆咁強的菌……
  至於特技方面,成日都係彈開堆野,地面裂開、強風掃落葉等,係精細但不太突出。隻外星怪獸戰車的雷射光就好恐怖,一射就變人粉,名乎其實的粉人就係這些。不過唔係太明點解開頭就係咁射到堆人變粉,之後又要逐件捉來吸血,但那個血的世界真係幾恐怖,偏紅的月色,仲有滿佈血樹根的地面,又嘔心又恐怖。
  睇完強戰世界,順道去了血拼德福,不過其實我係Window Shopping Only,同事甲終於整番套老西,平時牛仔褲T-Shirt,著番套老西果然唔同樣,男仔著起老西始終形象都係會有所提升。同事乙就繼續向餅神進發,也買了東東……佢地大出血囉今日。

發佈留言

發佈留言必須填寫的電子郵件地址不會公開。 必填欄位標示為 *

*