港燦深圳一日遊

  由於成大半年沒放過假,加上囤積居奇,再不放假便會爆假,所以今天便放一放假。適逢家中病人在家養病多日悶得發荒,便一同上深圳逛逛。都差不多成年沒去過,今日一去便發覺自己的OUT,故不得不自稱港燦。
第一站:羅湖
  去到羅湖時傻左咁跟左人家排錯左去e道,雖然在下已經夠期換高智能身份證,但我係未拿到手的!排乜鬼e道,拿住舊身份證,走番去果道啦……整個白痴行程起碼俾三件入境人員見到,鬼咩,原來宜家咁鬼多e道架……OUT!跟住去到深圳果邊,人家又走晒去行e道,我雖拿住回鄉卡,不過要去等整番個認證手續至可以行e道,又要人家等,點解咁鬼OUT架我……
第二站:老街
  到搭深圳地鐵時,同行者無不拿出深圳通(深圳的八達通)嘟嘟,我卻要去買個綠色大餅,後來阿爹終於忍受唔住,幫我買張深圳通……去到東門,又去幫襯唐宮飲茶,見到那一堆點心,好奇怪啊!甚麼是法國餐包?點心?仲有越式蒸糕,還有日式點心,乜原來宜家深圳的點心咁中西合璧架?(中西合璧呢個字眼亦都已經OUT了,應該用fusion啊……)不過話時話,個法國餐包好鬼正,仲以為係硬的包包,點知夾落個皮軟軟的不在話下,仲有本人至喜歡的奶黃做心,香噴噴,勁正!隨此外還有元貝粉絲,好好味!同場樓下原來還開了席殊書屋,很乾淨的一間書店啊!
第三站:華強北
  華強北可說是深圳的電腦集中地,不過我們幫襯的卻是位處這裏的茂業百貨公司!原來深圳都已經用電腦出紙的免費Locker!(又再次大驚小怪)用紅外線嘟嘟便可以了,好鬼勁!個超市好鬼大,東西又平平,怪不得阿娘這麼喜歡北上消費!在這裏,阿爹還買到他一直嫌貴的可樂水晶,這裏有八一折!(怎麼大陸這麼喜歡攪這些三八折、七八折咁精細的折頭?)
第四站:西湖春天
  都不太知道這裏是甚麼地方(好像係福田區,搭完地鐵仲要搭公車),只知有一間勁級MEGA百佳,由家電到衫褲鞋襪到單車到球拍到食品等等,簡直應有盡有,起初還有些行緊實惠的感覺,去到中段好似去左玩具反斗城,最後就當然似番百佳超級廣場啦!行完去左西湖春天食杭州菜,十分之有水準。Order了叫化童子雞、干炸響鈴、香干馬蘭頭、寧式鱔絲、東坡肉及清炒毛毛菜,真係好好味!叫化雞雞味濃郁,一夾就散;響鈴入口即碎,夠脆夠薄夠鬆化;馬蘭頭刀工細緻,切得勁細粒!不過留意,深圳的西湖春天個招紙無寫香港有分店,所以香港的西湖春天跟佢應該係唔同機構攪的,不要相提並論。
  好了,飲飽食醉仲買完野,宜家好鬼攰,都係早點抖,明天還要番工啊……… 繼續內文

深圳一日遊

  為補祝父親節,是日特別請假陪爹娘殺上深圳遊玩,也試搭了深圳地鐵,行程如下:
09:05—朝早搭馬鐵去到沙田圍站時,雷電交加,不知劈中甚麼,本來開出的車車及車站突然缺電兩秒,至令車車急停,幸好沒有PK。
10:15—到達羅湖地鐵站,買了價值兩蚊的單程票,原來深圳地鐵的單程票像個籌碼一般是個綠色大餅,入閘時輕輕拍一拍,出閘時掉入個回收洞度才可出閘,也原來,深圳地鐵要十五分鐘一班!
10:30—在大劇院站出閘C出口到達深圳書城,勁挫書田,有Batman漫畫賣呀!
12:00—書城後面就是新商場萬象城,入面格局極度似又一城,仲有冰場的(不過都要四十蚊踩一場啊)!去到新聞報導的可口可樂專賣店,阿爹話好貴喎,混吉一輪後繼續行商場,阿娘睇中左一個非賣品(要買其他產品加錢換的)的煲煲,拿了介紹單張就閃人了……
13:00—因為大雨關係,搭的士去左紅嶺唐宮食飯,四位人兄叫左超多野食,我覺得蝦餃皇、流沙包同個日式芋餅好好食。
14:XX—行左去吉之島逛街,驚見深圳吉之島之崇日風氣(怪不得那時俾人掟咁多雞蛋),也驚見祖國偉大的嬰兒購物車(設計獨特,惜不准影相),去超市雪拼一輪後,我家帶去的行李車車,車轆宣告爆破……
15:XX—繼續前行至科學館站,搭番轉頭去左老街站A出口,亦即東門,爹娘開展他們的尋行李車之旅……繼續百佳超級廣場雪拼,太陽廣場逛逛逛,之後輪到東門唐宮晚饍,阿爹的積分咭繼續儲分……
19:XX—飲飽食醉,搭番地鐵番羅湖站,去羅湖城最後沖刺……
21:XX—過關番歸……… 繼續內文